រាជធានីភ្នំពេញ ៖ សម្តេចសាយ ឈុំ ប្រមុខរដ្ឋស្តីទីនៃកម្ពុជាបានបញ្ជាក់ទោះបីជាប្រទេសកម្ពុជា និងប្រទេសថៃកំពុងប្រឈមទៅនឹងជំងឺរាតត្បាតកូវីដ-១៩យ៉ាងណាក្តីក៏ប្រទេសទាំងពីរនៅតែជួយគ្នាទៅវិញទៅមកក្នុងនាមជាអ្នកជិតខាងល្អ។
ការបញ្ជាក់បែបនេះ ខណៈអនុញ្ញាតឲ្យគណៈប្រតិភូគណៈកម្មការស៊ើបអង្កេតអំពើពុករលួយ ការប្រព្រឹត្តខុស និងពង្រឹងអភិបាលកិច្ចល្អនៃព្រឹទ្ធសភាថៃដឹកនាំដោយឧត្តមនាវីឯក សិសថាវ៉ាត វង្សសុវណ្ណ ប្រធានគណៈកម្មការចូលជួបសម្តែងការគួរសម នាថ្ងៃទី២៨ ខែកញ្ញា ឆ្នាំ២០២២ នៅវិមានព្រឹទ្ធសភា។នៅក្នុងជំនួបសម្តេច សាយ ឈុំ បានសម្តែងសេចក្តីរីករាយដោយមើលឃើញទំនាក់ទំនងមិត្តភាព និងកិច្ចសហប្រតិបត្តិការនៃប្រទេសទាំងពីរ មានការរីកចម្រើនជាលំដាប់។
សម្ដេចថា ការរីកចម្រើននេះ ស្តែងឡើងតាមរយៈការផ្លាស់ប្តូរទស្សន កិច្ចគ្នាទៅវិញទៅមករវាងថ្នាក់ដឹកនាំ និងមន្ត្រីជាន់ខ្ពស់នៃប្រទេសទាំងពីរ។ប្រមុខរដ្ឋស្តីទីក៏បានគូសបញ្ជាក់យ៉ាងដូច្នេះថា ៖«ទោះបីប្រទេសទាំងពីរបាននឹងកំពុងប្រឈមទៅនឹងជំងឺរាតត្បាតកូវីដ១៩ យ៉ាងណាក្តី ក៏ប៉ុន្តែប្រទេសទាំងពីរនៅតែបានជួយគ្នាទៅវិញទៅមកក្នុងនាមជាបងប្អូន និងជាអ្នកជិតខាងល្អ។ ខ្ញុំសូមថ្លែងអំណរគុណដល់រាជរដ្ឋាភិបាលនៃព្រះរាជាណាចក្រថៃឡង់ដ៍ដែលបានផ្តល់ជំនួយដល់រាជរដ្ឋាភិបាលកម្ពុជាក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ និងគ្រោះទឹកជំនន់កាលពីឆ្នាំ២០២០កន្លងទៅនេះ ព្រមទាំងជួយសម្រួលបែបបទដល់ពលករកម្ពុជាទៅធ្វើការងារក្នុងប្រទេសថៃ ការជួយតបណ្តាញអគ្គីសនី និងការតភ្ជាប់ហេដ្ឋារចនាសម្ព័ន្ធភ្ជាប់ជាដើម»។
ជាមួយគ្នានោះដែរ សម្តេចប្រមុខរដ្ឋស្តីទីបានវា.យតម្លៃខ្ពស់ចំពោះការបន្តរីកចម្រើនជាលំដាប់នៃទំនាក់ទំនង និងកិច្ចសហប្រតិបត្តិការល្អរវាងសភានៃប្រទេសទាំងពីរដែលត្រូវបានលើកកម្ពស់ឥតឈប់ឈរ និងមានការគាំទ្រគ្នាទៅវិញទៅមកក្នុងក្របខ័ណ្ឌទ្វេភាគី និងពហុភាគី ដែលតែងតែជួយគាំទ្រគ្នាទៅវិញទៅមកលើឆាកអន្តរជាតិ មិនត្រឹមតែទទួលបានផលប្រយោជន៍សម្រាប់ប្រទេសទាំងពីរប៉ុណ្ណោះទេ ប៉ុន្តែបានរួមវិភាគទានចំណែកដល់ការថែរក្សាសន្តិភាព ស្ថិរភាព សន្តិសុខ និងការអភិវឌ្ឍនៅក្នុងតំបន់ និងសកលលោកផងដែរ។
ក្នុងឱកាសនោះឧត្តមនាវីឯក សិសថាវ៉ាត វង្សសុវណ្ណ បានគូសបញ្ជក់ថា ព្រះរាជាណាចក្រកម្ពុជា និងព្រះរាជាណាចក្រថៃឡង់ដ៏មានព្រំប្រទល់ជាប់គ្នាប្រជាជនមានទំនាក់ទំនងយ៉ាងជិតស្និតមានវប្បធម៌ ទំនៀមទម្លាប់ប្រពៃណីស្រដៀងគ្នា ជាពិសេសប្រជាជនរស់នៅតាម បណ្តោយព្រំដែនតែងតែងមានការពឹកពាក់យកអាសារគ្នាទៅវិញទៅមក តាំងពីយូលង់ណាស់មកហើយ៕
ចែករំលែកព័តមាននេះ