រាជធានីភ្នំពេញ ៖ បន្ទាប់ពីមានការរិះគន់ជាបន្តបន្ទាប់តារាចម្រៀងចាស់វស្សាលោក ណយ វណ្ណេត បានចេញមកធ្វើការឆ្លើយតបប្រតិកម្មទៅវិញជុំវិញការចោទប្រកាន់ថា រូបលោក
រាជធានីភ្នំពេញ ៖ បន្ទាប់ពីមានការរិះគន់ជាបន្តបន្ទាប់តារាចម្រៀងចាស់វស្សាលោក ណយ វណ្ណេត បានចេញមកធ្វើការឆ្លើយតបប្រតិកម្មទៅវិញជុំវិញការចោទប្រកាន់ថា រូបលោកជាមនុស្សឈាមខ្មៅ ជុំវិញការទទួលមរណភាពពីសំណាក់ភរិយាដើមរបស់លោកកាលពីពេលថ្មីៗនេះ។
ភរិយារបស់លោក ណយ វណ្ណេត ដែលមានឈ្មោះ សាវឿន បានលែងលះគ្នាអស់ជិត៣០ឆ្នាំ និងបានទទួលមរណភាពកាលពីចុងខែកុម្ភៈ បានធ្វើឲ្យមហាជនមានការភ្ញាក់ផ្អើលយ៉ាងខ្លាំង បន្ទាប់ពីមានការទម្លាយពីកូនស្រីថា ម្តាយរបស់ខ្លួនចង់ឃើញមុខស្វាមីលោក ណយ វណ្ណេត ជាលើកចុងក្រោយ តែមិនបានដូចបំណង ត្រឹមតែអោបរូបថតរហូតដល់ដង្ហើមចុងក្រោយ។
ត្រង់ចំណុចនេះលោក ណយ វណ្ណេត ត្រូវបានទទួលរងនូវការប្រមាថ និងរិះគន់យ៉ាងខ្លាំងពីសំណាក់មហាជនមួយចំនួនថា ជាមនុស្សឈាមខ្មៅ ដាច់ធម៌មេត្តា ហ៊ានចាកចោលភរិយាដើម និងកូន ហើយសូម្បីតែមុខចុងក្រោយក៏មិនអាចទៅជួប។
ការរិះគន់នេះបានធ្វើឲ្យម្ចាស់បទ «សម្រស់បុប្ជាកំពង់ធំ» លោក ណយ វណ្ណេត ហាក់នៅមិនស្ងប់ ទ្រាំមិនបាន ក៏ចេញមកបញ្ជាក់ពីមូលហេតុពិតនៃការលែងលះពីភរិយាដើមរបស់លោក និងបានចាត់ទុកការរិះគន់ និងការប្រមាថលើរូបលោកនាពេលនេះ គឺជាមនុស្សដែលមិនបានដឹងរឿងរ៉ាវផ្ទាល់របស់លោកច្បាស់។
តាមរយៈវីដេអូដែលបានបង្ហោះតាមហ្វេសប៊ុកលោក ណយ វណ្ណេត បានអះអាងថា ក្នុងពេលដែលលោកមិនទាន់បានចូលប្រឡូកក្នុងវិស័យសិល្បៈច្បាស់លាស់ លោកបានចាប់ដៃគូជីវិតជាមួយភរិយាដើមរបស់លោកដែលជាកូនអ្នកមានមួយរូប។ លោកបន្តថា ការរស់នៅដោយភាពក្រខ្សត់របស់លោកគឺត្រូវបានទទួលការម៉ាក់ងាយយ៉ាងខ្លាំងពីសំណាក់ម្តាយក្មេក រហូតជម្រុញឲ្យភរិយារបស់លោកលែងលះជាមួយលោកថែមទៀតផង។
លោកបញ្ជាក់ថា បើទោះជាមានការមើលងាយពីសំណាក់ម្តាយក្មេក និងភរិយារហូតដល់ដៀលលោកឆ្កែឆ្មាយ៉ាងណាក៏ដោយ ក៏រូបលោកនៅតែសុំអង្វរកកុំឲ្យលែងលះ ព្រោះដោយសារអាណិតភរិយា និងកូនទាំងបួននាក់។
ទោះជាយ៉ាងណាបន្ទាប់ពីមានការសម្រុះសម្រួលគ្នារហូតដល់ទៅបួនដងនៅមិនបានទទួលលទ្ធផលជាវិជ្ជមានទៀតនោះ រូបលោកក៏បានសម្រេចចិត្តចុះចេញ តែលោកបានសុំកូនទាំងអស់ដើម្បីយកមកចិញ្ចឹម ហើយបើមិនបានទាំងអស់លោកសុំចែកគ្នាពីរម្នាក់ ដោយលោកសុខចិត្តប្រគល់ដីផ្ទះទៅភរិយា។ ប៉ុន្តែភរិយារបស់លោកមិនបានយល់ព្រមឡើយ ហើយមិនដឹងធ្វើយ៉ាងម៉េច រូបលោកក៏ព្រមផ្តិតមេដាយ ដើម្បីឲ្យភរិយាលោកមានការស្ងប់ចិត្ត ដោយរូបលោកបានចុះចេញត្រឹមតែសម្លៀកបំពាក់មួយកំផ្លេតាមខ្លួនប៉ុណ្ណោះ។
បើតាមលោក ណយ វណ្ណេត ក្រោយពីលែងលះជាមួយភរិយានោះរួចមក រូបលោកក៏បានមករស់នៅភ្នំពេញ ប៉ុន្តែភរិយាដើមរបស់លោកនៅតែតាមទារលុយពីលោកក្នុងចំនួនមួយដ៏ច្រើន។ ដោយសារចិត្តអាណិតដល់កូន និងភរិយា លោកបានខិតខំរកប្រាក់ផ្សែផ្សំគ្នារហូតនៅសល់ហើយបានផ្ញើឲ្យភរិយានូវមាស១តម្លឹងកន្លះនាឆ្នាំ១៩៩០-៩១។
ត្រង់ចំណុចនេះលោកចង់បញ្ជាក់ថា អ្នកដែលបានប្រមាថមកលើរូបខ្ញុំគ្រប់បែបយ៉ាងក្នុងរយៈពេលប៉ុន្មានថ្ងៃនេះ សូមធ្វើការពិចារណាឡើងវិញ ព្រោះបើទះដៃមួយលឺលោកព្រមទទួលកំហុសទាំងនេះ តែទាំងអស់នេះទាល់តែទះដៃពីរបានលឺ ។ ដូច្នេះមុនពេលដែលអស់លោកហ៊ានសរសេរមកប្រមាថមើលងាយលោកនោះថា តើមានគិតថា មានបាបកម្មវិញដែរឬទេ ក្នុងពេលដែលលោកក៏ធ្លាប់បានបួសជាលោកសង្ឃដែរនោះ តើអស់លោកបានដឹងរឿងគ្រួសារពិតរបស់លោកដែរឬទេ?
ដោយសារការប្រមាថមើលងាយលោកធ្លាប់បានសច្ចារថា នឹងមិនជួបមុខភរិយាដើមរបស់លោកទៀតឡើយ ចាប់តាំងពីបានបែកគ្នាអស់ពេលជាង២០ឆ្នាំមកនេះ រហូតដល់កូនស្រីបានទូរស័ព្ទប្រាប់លោកថា ម្តាយឈឺ ប៉ុន្តែគាប់ជួនពេលនោះលោកមានភារៈជាប់ច្រៀងនៅឯក្រៅប្រទេសដោយខានពុំបាន។ បន្ទាប់ពីមកពីប្រទេសក្រៅវិញ លោកក៏មានភារៈកិច្ចជាប់ច្រៀងការគេ២ថ្ងៃជាប់គ្នា រហូតដល់កូនស្រីបានទួរស័ព្ទមកប្រាប់ថា ម្តាយបានស្លាប់ហើយ ហើយលោកបានសន្យាថា ស្អែកលោកនឹងទៅ។
លោកបញ្ជាក់ថា លុះដល់ពេលស្អែកឡើងលោកក៏បានទៅជួបមុខភរិយាដើម ហើយពេលនោះហើយដែលលោកគិតថា រាល់ពាក្យសច្ចារបស់លោកត្រូវបានរលាយ ប៉ុន្តែដោយសារការអាណិត និងភាពទំនូលខុសត្រូវរបស់លោកជាឪពុក ទើបលោកត្រូវតែធ្វើ។
ទាំងអស់នេះ តើរូបលោកជាមនុស្សឈាមខ្មៅឬយ៉ាងណា ក្នុងពេលដែលកូនរបស់លោកនៅតែទទួលស្គាល់លោកជាឪពុក ហើយរូបលោកនៅតែដឹងថា ពួកគេទាំងនោះជាកូន ជាឈាមរបស់លោក។
យ៉ាងណាក៏ដោយលោក ណយ វណ្ណេត បានសំណូមពរដល់ទស្សនិកទាំងអស់កុំមានការយល់ច្រឡំចំពោះលោកជុំវិញបញ្ហាមួយនេះ ហើយក៏សុំកុំឲ្យមានការប៉ះពាល់ដល់ភរិយាក្រោយរបស់លោក ព្រោះយើងទាំងពីរបានចាប់ដៃគ្នារកស៊ីអស់រយៈពេលជាង២០ឆ្នាំមកហើយ ទម្រាំមានមុខមានមាត់ដល់សព្វថ្ងៃនេះ៕
ចែករំលែកព័តមាននេះ