អភិបាលខេត្តព្រះសីហនុ ផ្តល់ថវិកាដល់ប្រជានេសាទ០៤នាក់ ដែលជួយសង្គ្រោះជនជាតិចិនលិចទូក
ខេត្តព្រះសីហនុ ៖ ព្រឹកថ្ងៃទី២៧ ខែកញ្ញា ឆ្នាំ២០២២ លោក គួច ចំរើន អភិបាល នៃគណៈអភិបាលខេត្តព្រះសីហនុ…
ខេត្តព្រះសីហនុ ៖ ព្រឹកថ្ងៃទី២៧ ខែកញ្ញា ឆ្នាំ២០២២ លោក គួច ចំរើន អភិបាល នៃគណៈអភិបាលខេត្តព្រះសីហនុ…
ខេត្តព្រះសីហនុ ៖ ព្រឹកថ្ងៃទី២៧ ខែកញ្ញា ឆ្នាំ២០២២ លោក គួច ចំរើន អភិបាល នៃគណៈអភិបាលខេត្តព្រះសីហនុ បានផ្តល់ថវិកាលើកទឹកចិត្តដល់បងប្អូនប្រជានេសាទ ចំនួន០៤នាក់ ម្នាក់ៗ២លានរៀល ដែលបានជួយសង្គ្រោះជនរងគ្រោះលិចទូក បានចំនួន០២នាក់ និងជួយដឹកសពជនរងគ្រោះ០២នាក់ផ្សេងទៀត ដែលស្រង់បានពីកណ្តាលសមុទ្រមកដីគោកប្រគល់ជូនអាជ្ញាធរមានសមត្ថកិច្ចនាពេលកន្លងមក ។
ក្នុងឱកាសនោះ លោកអភិបាលខេត្ត បានថ្លែងអំណរគុណ និងកោតសរសើរដល់បងប្អូនអ្នកនេសាទ ដែលបានខិតខំជួយរុករកជនរងគ្រោះជាជនជាតិចិន ដែលបានជួបគ្រោះថ្នាក់ក្នុងហេតុការណ៍លិចទូក កាលពីវេលាម៉ោង១០និង៣០នាទីព្រឹកថ្ងៃទី២២ ខែកញ្ញា ឆ្នាំ២០២២ ស្ថិតនៅចំណុចនិយាមកា ១០.២៥N ១០៣.១៦E នៅចន្លោះពយសារឿង និងកោះតាង ក្នុងភូមិសាស្ត្រខេត្តព្រះសីហនុ ។
ជាមួយគ្នានេះ លោកអភិបាលខេត្ត បានដាក់ចេញនូវបទបញ្ជាដល់អាជ្ញាធរ កម្លាំងមានសមត្ថកិច្ច ក្រុមជួយសង្គ្រោះ និងមានការចូលរួមពីក្រុមហ៊ុនទូកទេសចរណ៍របស់លោកឧកញ៉ា ទៀវិចិត្រ ចេញជួយសង្គ្រោះបន្ទាន់ និងបានប្រកាសជូនដំណឹងដល់បងប្អូនប្រជានេសាទ និងក្រុមជួយសង្គ្រោះផ្សេងទៀត ក្នុងករណីសង្គ្រោះបានជនរងគ្រោះចំនួន០១នាក់ នឹងផ្តល់ជូនថវិកាលើកទឹកចិត្ត ចំនួន២លានរៀលផងដែរ ។
គួរបញ្ជាក់ផងដែរថា ជនរងគ្រោះដោយករណីលិចទូកមានចំនួនសរុប៤១នាក់ និងត្រូវបានជួយសង្គ្រោះ និងស្វែងរកឃើញសរុប៣៣នាក់ (ស្លាប់០៣នាក់) នៅបាត់ខ្លួន០៨នាក់ ដោយសមត្ថកិច្ច និងក្រុមជួយសង្គ្រោះកំពុងស្វែងរកអ្នកបាត់ខ្លួនបន្តទៀត ៕
ចែករំលែកព័តមាននេះ