តំបន់ចំនួន៤នៅអ៊ុយក្រែនគ្រោងបោះឆ្នោតប្រជាមតិបន្ទាន់ ដើម្បីចូលរួមជាមួយរុស្ស៊ី
អ៊ុយក្រែន ៖ តំបន់ចំនួន៤របស់អ៊ុយក្រែនដែលស្ថិតក្រោមការគ្រប់គ្រងរបស់រុស្ស៊ី បានប្រកាស
អ៊ុយក្រែន ៖ តំបន់ចំនួន៤របស់អ៊ុយក្រែនដែលស្ថិតក្រោមការគ្រប់គ្រងរបស់រុស្ស៊ី បានប្រកាសផែនការធ្វើប្រជាមតិបន្ទាន់ស្តីពីការចូលរួមជាមួយរុស្ស៊ី ដែលនឹងត្រួសត្រាយផ្លូវសម្រាប់ការបញ្ចូលតំបន់នោះជារបស់រុស្ស៊ី។
យោងតាមប្រភពទីភ្នាក់ងារព័ត៌មានរដ្ឋរបស់រុស្ស៊ី TASS បានរាយការណ៍ថា មន្ត្រីបំបែកខ្លួននៅតំបន់ភាគខាងកើតនៃ Luhansk និង Donetsk ក៏ដូចជាតំបន់ Kherson ភាគខាងត្បូង និងតំបន់ Zaporizhzhia ដែលកាន់កាប់ដោយផ្នែកបានប្រកាសថា ពួកគេនឹងរៀបចំការបោះឆ្នោតក្នុងរយៈពេល៤ថ្ងៃ ដែលនឹងចាប់ផ្តើមពីថ្ងៃសុក្រសប្តាហ៍នេះតទៅ។
ការឈ្លានពានរបស់រុស្ស៊ីបានជាប់គាំងក្នុងប៉ុន្មានខែថ្មីៗនេះ ជាហេតុនាំឱ្យអ៊ុយក្រែនបានដណ្តើមយកមកវិញនូវទឹកដីជាច្រើននៅភាគខាងជើងឈៀងខាងកើត។ ប៉ុន្តែឥឡូវនេះ មន្ត្រីដែលគាំទ្រដោយរុស្ស៊ីនៅភាគខាងកើត និងខាងត្បូងរបស់អ៊ុយក្រែនបាននិយាយថា ពួកគេចង់បានការបោះឆ្នោត ដើម្បីចូលរួមជាមួយរុស្ស៊ី។ ការលើកឡើងនេះ ត្រូវបានគេសង្កេតឃើញពីការដើរលើដានចាស់ នៅពេលរុស្ស៊ីបានបញ្ចូលឧបទ្វីបគ្រីមៀ (Crimea) ក្នុងឆ្នាំ ២០១៤ បន្ទាប់ពីការបោះឆ្នោតមួយត្រូវបានធ្វើឡើង ហើយដែលក្រោយមកទទួលបានការថ្កោលទោសយ៉ាងខ្លាំងពីអន្តរជាតិ។
ទោះយ៉ាងណា រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយកាលពីថ្ងៃទី២០ ខែកញ្ញា ថា ការធ្វើប្រជាមតិក្លែងក្លាយនឹងមិនផ្លាស់ប្តូរអ្វីនោះទេ។
គួរបញ្ជាក់ថា សហគមន៍អន្តរជាតិមិនដែលទទួលស្គាល់ការបញ្ចូលឧបទ្វីបគ្រីមៀនោះទេ។ ប៉ុន្តែច្បាស់ណាស់ថា រុស្ស៊ីមានបំណងចង់បានតំបន់ដែលខ្លួនកំពុងកាន់កាប់ផ្សេងទៀតរបស់អ៊ុយក្រែន តាមរបៀបដូចគ្នា។
រុស្ស៊ីបានបើកការឈ្លានពានរបស់ខ្លួនកាលពីថ្ងៃទី២៤ ខែកុម្ភៈ ឆាំ្ន២០២២ ហើយមានការរំពឹងទុកថា រុស្ស៊ីអាចនឹងប្រកាសអំពីការចល័តទ័ពទ្រង់ទ្រាយធំ ដើម្បីពង្រឹងកម្លាំងរបស់ខ្លួននៅប្រទេសអ៊ុយក្រែន។ ទន្ទឹមជាមួយគ្នា នៅពេលសភារុស្ស៊ីបានអនុម័តការដាក់ទណ្ឌកម្មកាន់តែតឹងរ៉ឹងចំពោះឧក្រិ.ដ្ឋកម្មដូចជាការរត់ចោលជួរ ការខូចខាតទ្រព្យសម្បត្តិយោធា និងការមិនចុះសម្រុងគ្នា អំឡុងពេលនៃការចល័ត ឬប្រតិបត្តិការប្រយុទ្ធ៕ (ដកស្រង់ចេញពី BBC, TASS និង NBC News)
ចែករំលែកព័តមាននេះ