ខេត្តព្រះសីហនុ ៖ ព្រឹកថ្ងៃទី២០ ខែកញ្ញា ឆ្នាំ២០២២ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានអញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការ…
ខេត្តព្រះសីហនុ ៖ ព្រឹកថ្ងៃទី២០ ខែកញ្ញា ឆ្នាំ២០២២ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានអញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារតេជោព្យាបាលជំងឺកូវីដ-១៩ អគារមន្ទីរពិសោធន៍ និងអគារផលិតអុកស៊ីសែន ស្ថិតនៅក្នុងបរិវេណមន្ទីរពេទ្យបង្អែកខេត្តព្រះសីហនុ សង្កាត់លេខ៤ ក្រុងព្រះសីហនុ ក្រោមអធិបតីភាពដ៏ខ្ពង់ខ្ពស់ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុគូសបញ្ជាក់ថា សប្បុរសជនជាតិ អន្តរជាតិ បានបរិច្ចាគថវិកាដោយស្ម័គ្រចិត្ត ដើម្បីសាងសង់អគារតេជោព្យាបាលជំងឺកូវីដ-១៩មួយខ្នង កម្ពស់មួយជាន់ មានទំហំ ៩០ x ៣០ម៉ែត្រ គ្រឹះសសរបេតុង ដំបូលប្រកស័ង្គសី។ អគារនេះចាប់ផ្តើមសាងសង់នៅថ្ងៃទី១៦ ខែសីហា ឆ្នាំ២០២១ បញ្ចប់កាសាងសង់នៅថ្ងៃ៣០ ខែមេសា ឆ្នាំ២០២២ ចំណាយថវិកា ១.៧៤២.៨៣០ដុល្លា បំពាក់ឧបករណ៍ សម្ភារ: និងបរិក្ខារពេទ្យរួចរាល់។
ក្រៅពីនេះ រដ្ឋបាលខេត្តបានសាងសង់អគារមន្ទីរពិសោធន៍ ១ខ្នង ទទឹង ១៥.៨ X ២៩ម៉ែត្រ ចំណាយថវិកា ២៧០.០០០ដុល្លារអាមេរិក ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងឧបករណ៍វិភាគមេរោគកូវីដ-១៩ ជាជំនួយមនុស្សធម៌រដ្ឋាភិបាលចិន ជូនរាជរដ្ឋាភិបាលកម្ពុជា សម្រាប់ផ្តល់ជូនរដ្ឋបាលខេត្តព្រះសីហនុ ព្រមទាំងដំឡើងម៉ាស៊ីនផលិតអុកស៊ីសែន ផ្គត់ផ្គង់ដល់មន្ទីរពេទ្យបង្អែកខេត្ត និងរៀបចំកន្លែងព្យាបាលដោយឡែកសម្រាប់ជនសង្ស័យដែលឆ្លងជំងឺកូវីដ-១៩ផងដែរ។
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានកោតសរសើររដ្ឋបាលខេត្តព្រះសីហនុខិតខំពុះពារគ្រប់ឧបស័គ្គ ក្នុងការប្រយុទ្ធប្រឆាំងនឹងជំងឺកូវីដ-១៩និងកសាងបានសមិទ្ធិផលជាច្រើនដើម្បីបម្រើតម្រូវការជាក់ស្តែងរបស់ប្រជាជន។ ក្រៅពីហេដ្ឋរចនាសម្ព័ន្ធផ្លូវ ទឹក ភ្លើង សមិទ្ធផលសម្រាប់បម្រើវិស័យសុខាភិបាលក្នុងខេត្តក៏មានត្រូវបានបង្កើតឡើងផងដែរដូចជា អគារតេជោព្យាបាលជំងឺកូវីដ-១៩ អគារមន្ទីរពិសោធន៍ និងអគារផលិតអុកស៊ីសែនដែលនឹងត្រូវបានសម្ភោធដាក់អោយប្រើប្រាស់នាថ្ងៃនេះដើម្បីលើកស្ទួយសុខាមាលភាពប្រជាជន។
លោកជំទាវកិត្តិសង្គហបណ្ឌិតបានបន្តថា ក្រោមការដឹកនាំដោយកិត្តិបណ្ឌិតរបស់សម្តេចតេជោ ហ៊ុន សែន កម្ពុជាថែរក្សាបាននូវសុខសន្តិភាព និងបានកសាងសមិទ្ធផលជាច្រើន ដើម្បីឆ្លើយតបទៅនឹងសំណូមពរបងប្អូនប្រជាពលរដ្ឋដោយបានជំរុញការអភិវឌ្ឍទឹក ផ្លូវ ភ្លើងព្រមៗគ្នា។ ខេត្តព្រះសីហនុមានការអភិវឌ្ឍរីកចម្រើនគួរឱ្យមោទនៈភាព ហេដ្ឋារចនាសម្ព័ន្ធផ្លូវ និងមានរូបជាសំណាកជាច្រើនទៀត ជាមោទនភាពដែលយើងត្រូវចូលរួមថែរក្សា និងដឹងគុណដល់កូនខ្មែរយើងដែលបានក៏សាងសមិទ្ធផលកើតឡើងនៅលើទឹកដីនៃខេត្តព្រះសីហនុ។
រាជរដ្ឋាភិបាលបានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងបានប្រសិទ្ធនាមជា «តារារះនាទិសនារតី» រាជរដ្ឋាភិបាលដែលមានសម្តេចតេជោជានាយករដ្ឋមន្ត្រីបានដាក់ ចេញនូវគោលនយោបាយគាំពារសង្គម និងការជួយសម្រួលដោះស្រាយការលំបាករបស់បងប្អូនកម្មករ និយោជិតដូចជា ការតំឡើងប្រាក់ខែ ការផ្តល់ប្រាក់ឧបត្ថម្ភជូនកម្មការិនីពេលឆ្លងទន្លេ និងឧបត្ថម្ភស្ត្រីមានផ្ទៃពោះ ការខិតខំប្រឹងប្រែងអនុវត្តគោលនយោបាយជាតិគាំពាសង្គម តាមរយៈបង្កើតបេឡាជាតិសន្តិសុខសង្គម ការជួយឧបត្ថម្ភដល់កម្មករការជួយឧបត្ថម្ភជួយដល់គ្រួសារក្រីក្រ រងផលប៉ះពាល់ដោយសារជំងឺកូវីដ១៩ឧបត្ថម្ភគ្រួសារក្រីក្រ។
ទន្ទឹមនោះបានធ្វើការបញ្ចុះតម្លៃទឹក ភ្លើង និងការដំឡើងប្រាក់បៀវត្សជូនមន្ត្រីរាជការ កងកម្លាំងប្រដាប់អាវុធ ធ្វើឱ្យមានជីវភាពកាន់តែល្អប្រសើរ ៕
ចែករំលែកព័តមាននេះ