មេខ្លោងបង្កអសន្តិសុខម្នាក់ ត្រូវកម្លាំងកងរាជអាវុធហត្ថចាប់បានសារជាថ្មី
ខេត្តស្ទឹងត្រែង ៖ មេខ្លោងបង្កអសន្តិសុខម្នាក់ឈ្មោះ នូ គឹមសេង (ហៅទិត្យ) ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិព្រែក សង្កាត់ស្ទឹងត្រែង
ខេត្តស្ទឹងត្រែង ៖ មេខ្លោងបង្កអសន្តិសុខម្នាក់ឈ្មោះ នូ គឹមសេង (ហៅទិត្យ) ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ត្រូវបានកម្លាំងអាវុធហត្ថខេត្តចាប់ខ្លួនកាលពីថ្ងៃទី២៣ ខែកុម្ភ: តាមដីកាបង្គាប់លេខ០២ ចុះថ្ងៃទី២៧ ខែមករា ឆ្នាំ២០១៧ របស់លោកចៅក្រម គង់ កូមិន្ទ។ តាមការឲ្យដឹងពីលោកវរសេនីយ៍ឯក ដួង វិចិត្រ មេបញ្ជាកររង កងរាជអាវុធហត្ថខេត្ត បានឲ្យដឹងថា ជនសង្ស័យឈ្មោះ នូ គឹមសេង (ហៅទិត្យ)ខាងលើនេះ ត្រូវបានកម្លាំងកងរាជអាវុធហត្ថឃាត់ខ្លួន និងបានបញ្ជួនទៅពន្ធនាគារម្តងរួចមកហើយ កាលពីថ្ងៃទី៤ ខែតុលា ឆ្នាំ២០១៥ រួមជាមួយបក្ខពួក៣នាក់ផ្សេងទៀតពាក់ព័ន្ធករណីជួញដូរគ្រឿងញៀន។
លោកវរៈសេនីយ៍ឯកបានបន្តថា ការឃាត់ខ្លូនលើកនេះ គឺធ្វើឡើងតាមដីការបស់ចៅក្រម គង់ កូមិន្ទ តាមចម្លើយជនជាប់ចោទចំនួន៤នាក់ ដែលកងរាជអាវុធហត្ថខេត្តចាប់ខ្លួនកាលពីថ្ងៃទី២០ ខែមករា ឆ្នាំ២០១៧ ទី១-ឈ្មោះ តន់ បូរ៉ា អាយុ១៥ឆ្នាំ ទី២-ឈ្មោះ ស្រី លាងគ្រី អាយុ១៥ឆ្នាំ ទី៣-ឈ្មោះ ចាន់ តយ អាយុ១៥ឆ្នាំ ទី៤-ឈ្មោះ ទិត សុនា (ហៅចូច) អាយុ១៦ឆ្នាំ ដែលកំពុងជាប់ពន្ធនាគារ បានសារភាពថា ពួកគេបានធ្វើនេះ គឺតាមការគំរាមពីឈ្មោះ នូ គឹមសេង ខាងលើ បានឲ្យពួកគេប្រើប្រាស់គ្រឿងញៀន និងធ្វើសកម្មភាពឆក់កាបូប និងលួចជាដើម។ ជនសង្ស័យឈ្មោះ នូ គឹមសេង បានឆ្លើយចំពោះមុខអ្នកយកព័ត៌មានថា រូបគេមិនធ្លាប់បានគំរាមឱ្យពួកគេទាំង៤នាក់នោះ ទៅប្រើប្រាស់គ្រឿងញៀន ឆក់កាបូប និងលួច ដូចការចោទប្រកាន់នោះទេ។
គ្រាន់តែថាខ្លួនធ្លាប់ត្រូវបានកងរាជអាវុធហត្ថចាប់ខ្លួនពិតមែន កាលពីថ្ងៃទី៤ ខែតុលា ឆ្នាំ២០១៤ រួមជាមួយបក្ខពួក៣នាក់ផ្សេងទៀត ដែលមាន១-ឈ្មោះ នូ សុកាន ២-ឈ្មោះ កែវ ឧត្តម ៣-ឈ្មោះ គឹម រ៉ាវី ជាប់ពាក់ព័ន្ធក្នុងករណីជួញដូរគ្រឿងញៀន។ ជនសង្ស័យបានបន្តថា គ្រានោះតុលាការខេត្តស្ទឹងត្រែងបានកាត់ទោសពួកគេឲ្យជាប់គុកម្នាក់ៗចំនួន២ឆ្នាំ តែត្រូវអនុវត្តទោសរយ:ពេល១ឆ្នាំ និងព្យួរ១ឆ្នាំ ដោយសារតែក្រុមគ្រួសាររបស់គេរត់ការអស់ប្រាក់ជាង១ម៉ឺនដុល្លាអាមេរិក ។ នៅព្រឹកនេះមិញនេះដែរជនសង្ស័យឈ្មោះ នូ គឹមសេង ត្រូវបានកម្លាំងជំនាញបញ្ជូនទៅកាន់តុលាការដើម្បីចាត់ការតានីតិវិធី៕
ចែករំលែកព័តមាននេះ