ស្ពាយបង្វេចធំពេកដើរពេលយប់ សង្ស័យឃាត់ឆែកសួរនាំ ដឹងការពិត អាណិតហួសថ្លែង
- ភ្នំពេញ
រាជធានីភ្នំពេញ ៖ បុរសម្នាក់អត់មានលុយធ្វើសោហុយទៅស្រុកកំណើត បានដើរស្ពាយបង្វេចធំមួយ
រាជធានីភ្នំពេញ ៖ បុរសម្នាក់អត់មានលុយធ្វើសោហុយទៅស្រុកកំណើត បានដើរស្ពាយបង្វេចធំមួយទាំងកណ្តាលយប់ ធ្វើឱ្យសមត្ថកិច្ចល្បាតឃើញមានការសង្ស័យក៏បាននាំគ្នាឃាត់ឆែកឆេរ និងសួរនាំ បង្កឱ្យមានការភ្ញាក់ផ្អើលកាលពីវេលាម៉ោង១១នឹង៣០នាទីយប់ថ្ងៃទី២០ ខែកញ្ញា ឆ្នាំ២០២២ នៅចំណុចផ្លូវល្បឿនលឿន ទល់មុខវត្តគោកខ្សាច់ ស្ថិតក្នុងសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
បុរសម្នាក់ដែលសមត្ថកិច្ចឃាត់សួរនាំឈ្មោះ ជា កក្កដា អាយុ៤៥ឆ្នាំ មុខរបរស៊ីឈ្នួលធ្វើស្រែឱ្យគេ ស្នាក់នៅស្រុកត្រាំកក់ ខេត្តតាកែវ មានស្រុកកំណើតនៅខេត្តកំពង់ចាម ។
តាមប្រភពព័ត៌មានពីកំលាំងសមត្ថកិច្ចនគរបាលប៉ុស្តិ៍ភ្លើងឆេះរទេះបានអោយដឹងថា នៅមុនពេលកើតហេតុ បងប្អូនប្រជាពលរដ្ឋបានរាយការណ៍ប្រាប់សមត្ថកិច្ចថា ឃើញបុរសម្នាក់ដើរស្ពាយបង្វិចយ៉ាងធំនៅតាមដងផ្លូវ និងបានបញ្ជាក់ប្រាប់ថា នៅពេលថ្ងៃ គេឃើញបុរសរូបនោះដើរនៅម្តុំមុខព្រលានយន្តហោះអន្តរជាតិភ្នំពេញ លុះដល់វេលាម៉ោងកើតហេតុ គេឃើញបុរសរូបនោះដើរនៅតាមដងផ្លូវ ដោយមានការសង្ស័យ ទើបប្តឹងសមត្ថកិច្ចឱ្យជួយអន្តរាគមន៍ឃាត់សួរនាំភ្លាមៗតែម្តង ។
តាមសំដីរបស់បុរសមួយរូបខាងលើនោះបានរៀបរាប់ឱ្យដឹងថា គាត់អត់មានលុយ ទើបគាត់ដើរពីផ្សារទឹកថ្លា ខណ្ឌសែនសុខ ឆ្ពោះទៅផ្ទះប្រពន្ធរបស់គាត់នៅស្រុកត្រាំកក់ ខេត្តតាកែវ លុះដើរនៅពេលយប់ មកដល់ចំណុចកើតហេតុ ស្រាប់តែកំលាំងសមត្ថកិច្ចឃាត់សួរនាំគាត់តែម្តង ។
បន្ទាប់ពីកំលាំងសមត្ថកិច្ចឃាត់ឆែកឆេរនៅក្នុងបង្វេចបុរសខាងលើ ឃើញមានតែសំលៀកបំពាក់តិចតួច និងសៀវភៅស្នាក់នៅ អត្តសញ្ញាណប័ណ្ណរបស់គាត់២សន្លឹក រួមនឹងកាតចាក់វ៉ាក់សាំងចំនួន២សន្លឹកផងដែរ តែមិនមានលុយជាប់នឹងខ្លួនបន្តិចសោះឡើយ ។ បន្ទាប់មកសមត្ថកិច្ច និងបងប្អូនប្រជាពលរដ្ឋបានជួយថវិកាបានចំនួន៥ម៉ឺនរៀល ដើម្បីទុកឱ្យបុរសរូបនោះធ្វើសោហុយទៅស្រុកកំណើតវិញ។
ក្រោយពេលកើតហេតុ កំលាំងសមត្ថកិច្ចនគរបាលប៉ុស្តិ៍សង្កាត់ភ្លើងឆេះរទេះបាននាំបុរសរូបនោះទៅរង់ចាំរថយន្តដឹកគាត់ទៅស្រុកកំណើតវិញ ៕
ចែករំលែកព័តមាននេះ