រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនប្រុសស្រី២នាក់ជិះម៉ូតូឌុបគ្នាចេញពីក្លិបកំសាន្ដស្ពាយឌ័រ ក៏ត្រូវបានជនសង្ស័យមិនស្គាល់មុខមួយក្រុមជិះម៉ូតូដេញតាមធាក់ បណ្ដាលអោយដួលម៉ូតូបោ.កក្បាលទៅនឹងឃឿនពុះចែកទ្រូងផ្លូវស្លា.ប់អ្នកបើកម៉ូតូ ចំណែកនារីរងគ្រោះដែលរួមដំណើរជាមួយរបួសធ្ងន់ បង្កឱ្យមានការភ្ញាក់ផ្អើលកាលពីវេលាម៉ោង២រំលងអធ្រាត្រឈានចូលថ្ងៃទី២០ ខែកញ្ញា ឆ្នាំ២០២២ នៅតាមបណ្ដោយវិថីចោមចៅ ស្ថិតក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ។
សេចក្តីរាយការណ៍បន្តថា ស.ពជនរងគ្រោះខាងលើមានឈ្មោះ ចាប យឹន ភេទប្រុស អាយុ៣៥ឆ្នាំ រស់នៅភូមិកញ្ចំ ឃុំកញ្ចំ ស្រុក៣រាំង ខេត្តព្រៃវែង។ ចំណែកម៉ូតូជនរងគ្រោះម៉ាកស៊ុយស៊ីគីលែត ពណ៌ទឹកប្រាក់ ពាក់ស្លាកលេខ ភ្នំពេញ1IG-7253 ជិះ២នាក់ស្រីស្នេហ៍។
តាមប្រភពព័ត៌មានបញ្ជាក់ពីមិត្តភ័ក្ដិដែលស្គាល់គ្នានៅក្នុងក្លិបកំសាន្ដខាងលើ បាននិយាយប្រាប់ថា នៅមុនកើតហេតុ ជនរងគ្រោះបានចេញពីក្លិបកំសាន្ដ «ស្ពាយឌ័រ» ដោយបានឌុបសង្សារត្រឡប់ទៅផ្ទះជួលវិញនៅឯស្ទឹងមានជ័យ ខណៈពេលជិះម៉ូតូផុតពីក្លិបបានបន្តិច ក្នុងទិសដៅពីលិចទៅកើត ក៏ស្រាប់តែមានជនសង្ស័យមួយក្រុមជិះម៉ូតូដេញតាមពីក្រោយ ហើយបានធាក់ម៉ូតូជនរងគ្រោះ បណ្ដាលឲ្យដួលបោ.កនឹងឃឿនពុះចែកទ្រូងផ្លូវធ្វើបុរសរងគ្រោះជាអ្នកបើកបរស្លា.ប់ភ្លាមៗនៅនឹងកន្លែងកើតហេតុតែម្តង ចំណែកស្រីស្នេហ៍វិញរងរបួសធ្ងន់ ត្រូវបានខាងរថយន្តឯកជនសម្ភពរស្មី ដឹកយកទៅសង្គ្រោះភ្លាមៗ ដោយឡែកជនសង្ស័យបានជិះម៉ូតូរត់គេចខ្លួនបាត់ស្រមោល។
បើតាមប្រភពព័ត៌មានមួយទៀតបាននិយាយប្រាប់ថា ជនរងគ្រោះពេលជិះម៉ូតូចេញពីក្លិបបាននិយាយឌឺដងដាក់ក្រុមក្មេងស្ទាវ ទើបក្មេងស្ទាវទាំងអស់នោះ ខឹងក៏ជិះម៉ូតូតាមធាក់អោយដួល ហើយក៏ជិះគេចខ្លួនអស់ទៅ។
ក្រោយពេលកើតហេតុ ជនរងគ្រោះត្រូវបានសមត្ថកិច្ចផ្នែកជំនាញការិយាល័យចរាចរណ៍ហៅរថយន្តដឹកស.ពយកទៅតម្កល់ នៅវត្តទឹកថ្លាជាបណ្ដោះអាសន្ន ដើម្បីរង់ចាំសាច់ញាតិក្រុមគ្រួសារមកទទួលយកស.ពទៅធ្វើបុណ្យតាមប្រពៃណីនៅឯស្រុកកំណើត ចំណែកម៉ូតូវិញ ត្រូវបានសមត្ថកិច្ចយកទៅរក្សាទុកនៅផ្នែកជំនាញការិយាល័យចរាចរណ៍ខណ្ឌ៕
ចែករំលែកព័តមាននេះ