ខេត្តឧត្តរមានជ័យ ៖ បុរសម្នាក់ដែលឈរបង់សំណាញ់នៅលើខ្នងទំនប់បង្ហៀរទឹកមួយកន្លែង ក៏ត្រូវទឹកហូរកួចទៅបាត់ស្រមោល បង្កឲ្យមានការភ្ញាក់ផ្អើលដល់អ្នកភូមិ និងសមត្ថកិច្ច រួមទាំងអាជ្ញាធរមូលដ្ឋានជួយអន្តរាគមន៍ រកជនរងគ្រោះ ។ ហេតុការណ័កើតឡើងកាលពីវេលាម៉ោង៣រសៀលថ្ងៃទី១៨ កញ្ញា ស្ថិតនៅត្រង់ចំណុចទំនប់បង្ហៀទឹក ក្នុងភូមិថ្នល់បត់ សង្កាត់កូនក្រៀល ក្រុងសំរោង ខេត្តឧត្តរមានជ័យ ។
ប្រភពឱ្យដឹងថា ជនរងគ្រោះមានឈ្មោះលិញ ឡែក ភេទប្រុស អាយុ៥២ឆ្នាំ ជាកសិករមានទីលំនៅភូមិថ្នល់បត់ សង្កាត់កូនក្រៀល ក្រុងសំរោង ខេត្តឧត្តរមានជ័យ ។ តាមការឲ្យដឹងពីប្រពន្ធជនរងគ្រោះឈ្មោះ ម៉ៅ ងិក អាយុ៥១ឆ្នាំ បានរៀបរាប់ថា កាលពីម៉ោងប្រហែលជា១រសៀលប្តីគាត់ (ជនរងគ្រោះ) បានទៅបង់សំណាញ់នៅទំនប់បង្ហៀរទឹកខ្ទុម ។
លុះនៅម៉ោងប្រហែល៣រសៀលក៏មានគេមកប្រាប់ថា ប្តីរបស់គាត់ត្រូវបានបាត់ខ្លួនដោយសារទឹកហូរកួចបាត់ទៅហើយ ។ ស្ត្រីជាប្រពន្ធបន្តថា ក្រោយពីកើតហេតុ មានប្រជាពលរដ្ឋ អាជ្ញាធរ និងសមត្ថកិច្ចមកអន្តរាគមន៍ស្វែងរកប្តីគាត់ ។
សូមបញ្ជាក់ថា ក្រោយមានករណីទឹកហូរកួចមនុស្សនេះ និងដោយមើលឃើញពីស្ថានភាពកំពស់ទឹកហក់ឡើងខ្ពស់ ដោយសារតែមានភ្លៀងធ្លាក់មកខ្លាំងចំនួន ២ថ្ងៃជាប់ៗគ្នា អាជ្ញាធរបានផ្អាកការធ្វើដំណើរចរាចរណ៍ជាបណ្តោះអាសន្នសិន ចំពោះចំណុចទំនប់បង្ហៀរទឹកខ្ទុមមួយរយៈរងចាំទឹកបានស្រកទៅវិញផងដែរ ។ គិតត្រឹមព្រឹកថ្ងៃទី១៩ កញ្ញា នេះ គឺនៅមិនទាន់រកឃើញជនរងគ្រោះនៅឡើយ ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ