រាជធានីភ្នំពេញ ៖ ជនដៃដល់បា.ញ់សម្លា.ប់គូរដណ្តឹងរបស់ខ្លួន កាលពីយប់ថ្ងៃទី១៦ ខែមករា ឆ្នាំ២០២០ ក្រោយពីគេចខ្លួនអស់រយៈពេល២ឆ្នាំ និង៧ខែ រត់ទៅប្រទេសថៃ ត្រូវបានសមត្ថកិច្ចកម្ពុជាសហការជាមួយសមត្ថកិច្ចថៃ…
រាជធានីភ្នំពេញ ៖ ជនដៃដល់បា.ញ់សម្លា.ប់គូរដណ្តឹងរបស់ខ្លួន កាលពីយប់ថ្ងៃទី១៦ ខែមករា ឆ្នាំ២០២០ ក្រោយពីគេចខ្លួនអស់រយៈពេល២ឆ្នាំ និង៧ខែ រត់ទៅប្រទេសថៃ ត្រូវបានសមត្ថកិច្ចកម្ពុជាសហការជាមួយសមត្ថកិច្ចថៃ ឃាត់ខ្លួនបាន និងបញ្ជូនខ្លួនមកកម្ពុជាហើយ នៅថ្ងៃទី១៦ កញ្ញា ២០២២នេះ ។
ប្រតិបត្តិការនេះធ្វើឡើងក្រោមការដឹកនាំចង្អុលបង្ហាញផ្ទាល់ពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងអគ្គស្នងការរងទទួលផែន និងចង្អុលបង្ហាញបញ្ជាដឹកនាំដោយឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ។
កាលពីថ្ងៃទី១០ ខែកញ្ញា ឆ្នាំ២០២២ ក្រោយពីទទួលបានបទបញ្ជាដឺម៉ឺងម៉ាត់របស់ថ្នាក់ដឹកនាំ លោកឧត្តមសេនីយ៍ទោ ជាវ វិបុល អនុប្រធាននាយកដ្ឋាននគបាលព្រហ្មទណ្ឌ បានសហការជាមួយលោកឧត្តមសេនីយ៍ឯក សម វណ្ណវីរៈ ប្រធាននាយកដ្ឋានសន្តិសុខផ្ទៃក្នុង ចុះទៅជួបប្រជុំជាមួយភាគីតម្រួតថៃ និងដោយមានកិច្ចសហប្រតិបត្តិការល្អពីភាគីតម្រួតថៃ ទើបនៅថ្ងៃទី១៤ ខែកញ្ញា ឆ្នាំ២០២២ នៅវេលាម៉ោង០៤ល្ងាច កម្លាំងតម្រួតថៃ បានធ្វើការឃាត់ខ្លួនជនសង្ស័យឈ្មោះ យឺន វ៉ាន់ដេត នៅក្នុងទឹកដីខេត្តចន្ទបុរី ប្រទេសថៃ តាមដីកាបង្គាប់ឲ្យចាប់ខ្លួនលេខ៤១៨ ចុះថ្ងៃទី១០ ខែមេសា ឆ្នាំ២០២០ របស់លោក អ៊ុក សុវណ្ណារិទ្ធ ចៅក្រមស៊ើបសួរសាលាដំបូងរាជធានីភ្នំពេញ ។
សូមរមឹ្លកថា កាលពីវេលាម៉ោងប្រហែល១២យប់ថ្ងៃទី១៦ ខែមករា ឆ្នាំ២០២០ ស្ថិតនៅផ្ទះលេខ H-03 ផ្លូវលំ BT ក្នុងបុរីរំចេកអូឌឹម សង្កាត់កន្ទោក ខណ្ឌកំបូល រាជធានីភ្នំពេញ មានករណីឃា.តកម្មមួយ បង្កឡើងដោយជនដៃដល់ម្នាក់ គឺជាមន្ដ្រីយោធាពាក់ស័ក្ដិ៤ មានឈ្មោះ យឺន វ៉ាន់ដេត បានបា.ញ់នារីជាគូដណ្ដឹង ហើយដើមចមដែលនាំឲ្យមានការបាញ់ប្រហារនេះ គេដាក់ការសង្ស័យជំនាញដំបូងថា ផ្ដើមចេញពីរឿងប្រចណ្ឌ ។
ស្ដ្រីជនរងគ្រោះឈ្មោះ ជុន ឌីណា អាយុ២៦ឆ្នាំ ជានិស្សិតពេទ្យផ្នែកឡាបូ និងជាអ្នកលក់ផលិតផលថែរក្សាសម្រស់តាមអនឡាញ ស្នាក់នៅផ្ទះកើតហេតុខាងលើ ។
បើតាមការឲ្យដឹងពីប្រជាពលរដ្ឋមូលដ្ឋាន នៅមុនពេលកើតហេតុគេបានលឺសម្លេងស្រែកឆោឡោ ហើយគេបានឃើញបុរសម្នាក់ ដែលគេស្គាល់ថា ជាគូដណ្ដឹងរបស់ជនរងគ្រោះ បានបីនាងចេញមកក្រៅផ្ទះ ដោយសភាពហូរឈា.មស្រោចពេញខ្លួន មិនដឹងថា មានរឿងអ្វីនោះទេ តែមុននេះ គេលឺសំឡេងផ្ទុះអាវុធមួយគ្រាប់ ។
ភ្លាមៗនោះអ្នកជិតខាងបានជួយដឹកនារីរងគ្រោះ ជាមួយបុរសខាងលើយកទៅមន្ទីរពេទ្យ ដើម្បីសង្គ្រោះបន្ទាន់ ហើយអ្នកជិតខាងមិនដឹងថា នារីខាងលើរងរបួសដោយសារមូលហេតុអ្វីនោះទេ ពេលជូនទៅមន្ទីរពេទ្យស្រាប់តែឃើញរបួស ត្រូវគ្រាប់កាំភ្លើងនៅត្រង់កផ្នែកខាងក្រោយ និងថ្ពាល់ខាងឆ្វេង តែជាអកុសលដោយសាររបួសធ្ងន់ធ្ងរពេក នារីរងគ្រោះបានស្លាប់បាត់បង់ជីវិតពេលបញ្ជូនទៅដល់មន្ទីរពេទ្យ ។ ភ្លាមៗជនសង្ស័យក៏បានរត់គេចខ្លួនទៅប្រទេសថៃ រហូតដល់ពេលឃាត់ខ្លួននេះតែម្ដង ។
«ទីបំផុត! មន្ត្រីយោធាម្នាក់បា.ញ់សម្លា.ប់គូដណ្តឹងជានិស្សិតពេទ្យ កាលពីឆ្នាំ២០២០ ត្រូវចាប់ខ្លួនក្នុងប្រទេសថៃ» ។
បច្ចុប្បន្នជនសង្ស័យ ត្រូវបានប្រគល់ជូននាយកដ្ឋាននគរបាលព្រហ្មទណ្ឌ រៀបចំបញ្ជូនទៅសាលាដំបូងរាជធានីភ្នំពេញ នៅថ្ងៃទី១៧ ខែកញ្ញា ថ្ងៃស្អែកនេះ ដើម្បីផ្តន្ទាទោសតាមច្បាប់ ៕
ចែករំលែកព័តមាននេះ