សម្តេចតេជោ ហ៊ុន សែន ៖ ការផ្អាកពិធីបុណ្យអុំទូក ឆ្នាំ២០២២ ដោយសារកត្តា ២សំខាន់ៗ
រាជធានីភ្នំពេញ ៖ ដើម្បីអស់ការសង្ស័យ ពីមតិមួយចំនួន សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានគូសបញ្ជាក់ច្បាស់ថា ការសម្រេចផ្អាកពិធីបុណ្យអុំទូក…
រាជធានីភ្នំពេញ ៖ ដើម្បីអស់ការសង្ស័យ ពីមតិមួយចំនួន សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានគូសបញ្ជាក់ច្បាស់ថា ការសម្រេចផ្អាកពិធីបុណ្យអុំទូក សម្រាប់ឆ្នាំ២០២២នេះ ដោយសារតែការឆ្លងជំងឺកូវីដ-១៩ មិនទាន់ចប់ និងកម្ពុជាធ្វើជាម្ចាស់ នៃកិច្ចប្រជុំកំពូលអាស៊ាន ។
យោងតាមសារពិសេសរបស់សម្តេចតេជោ ហ៊ុន សែន នៅថ្ងៃទី១៥ ខែកញ្ញា ឆ្នាំ២០២២ បានលើកឡើងថា កាលពីសប្តាហ៍មុននៅក្នុងកិច្ចប្រជុំគណៈរដ្ឋមន្ត្រី សម្តេចមិនអនុញ្ញាតឲ្យមានការរៀបចំពិធីបុណ្យអុំទូក នៅក្នុងរាជធានីភ្នំពេញ នោះទេ ប៉ុន្តែអនុញ្ញាតឲ្យបងប្អូនជនរួមជាតិ ពិសេសនៅតាមូលដ្ឋានខេត្តនានា អាចរៀបចំពិធីប្រណាំងទូកទៅតាមចំណងចំណូលចិត្ត ហើយមកដល់ពេលនេះ មានខេត្តខ្លះបានរៀបចំទូកសម្រាប់អុំ យ៉ាងច្រើនរួចដែរ ។
សម្តេចលើកឡើងថា សម្រាប់ការផ្អាកនេះ មានមជ្ឈដ្ឋានមួយចំនួន ចេះមកវិភាគ ឬវាយតម្លៃថា មូលហេតុ ដែលនាយករដ្ឋមន្ត្រី ផ្អាកការអុំទូកថ្នាក់ជាតិ គឺដោយសារមូលហេតុរដ្ឋាភិបាលអស់លុយ ។
សម្តេចបញ្ជាក់ថា ៖ «ខ្ញុំសូមវាយតម្លៃខ្ពស់ ចំពោះអ្នកវិភាគដល់ឆ្កួតលីលា និងការវាយតម្លៃ ដោយឆ្កួតលីលា របស់ក្រុមមនុស្សមួយក្តាប់តូច ។ ខ្ញុំពិតជាទទួលស្គាល់ថា កម្ពុជាក្រីក្រ ប៉ុន្តែកម្ពុជាមិនទាន់ដល់ដំណាក់កាល នៃរដ្ឋក្ស័យធននោះទេ ។ យើងនៅតែមានលទ្ធភាព ដើម្បីចំណាយទៅលើពិធីបុណ្យអុំទូកមួយ បើសិនត្រូវរៀបចំ ប៉ុន្តែខ្ញុំសូមបញ្ជាក់ថា ហេតុអ្វីបានជាខ្ញុំសម្រេចចិត្តលុបចោលនូវបុណ្យអុំទូកឆ្នាំនេះ» ។
សម្តេចតេជោ បានគូសបញ្ជាក់បន្ថែមថា មូលហេតុ ០២សំខាន់ ក្នុងការផ្អាកបុណ្យអុំទូកឆ្នាំនេះ ដែលខ្ញុំសូមយោគយល់ សម្រាប់ប្រជាពលរដ្ឋរបស់យើង ទី១. បញ្ហាកូវីដ មិនទាន់ចប់ទេ យើងបានលុបចោលពិធីបុណ្យអុំទូកនៅឆ្នាំ២០២០, ២០២១ ហើយឆ្នាំ២០២២ បន្តលុបទៀត ដោយសារបញ្ហាធំ គឺមិនចង់ឲ្យមានការប្រមូលផ្តុំមនុស្សទ្រង់ទ្រាយធំ នៅភ្នំពេញ ហួសហេតុពេក ។ បងប្អូនជនរួមជាតិ ដឹងហើយថា រាល់ឆ្នាំបងប្អូនប្រជាពលរដ្ឋ បានប្រមូលផ្តុំគ្នា នៅទីក្រុងភ្នំពេញ មានមនុស្សរាប់លាននាក់មកភ្នំពេញ ដូច្នេះបើសិនមានករណីឆ្លងជំងឺកូវីដ-១៩ នឹងបង្កើតនូវស្ថានភាពគ្រោះថ្នាក់ទៀត ។
ការមិនធ្វើពិធីបុណ្យអុំទូក ពីរឆ្នាំជាប់គ្នាកន្លងមក ដោយសារមូលហេតុកូវីដ នឹងនៅឆ្នាំ២០២២នេះ ក៏ដោយសារកូវីដ ។ យើងមិនចង់រំខានដល់បងប្អូន ដែលត្រូវនាំទូក ពីតាមបណ្តាលខេត្ត ចំណុះទូកពីបណ្តាលខេត្តមកទីក្រុងភ្នំពេញ នៅពេលបងប្អូនដែលត្រូវបង្កបង្កើនផលនោះទេ ។
សម្តេចតេជោ ក៏បានលើកឡើងទៀតថា មូលហេតុ ទី២. ដែលនាំឲ្យផ្អាកបុណ្យអុំទូកនោះ ដោយសារតែថ្ងៃបុណ្យអុំទូក ចំថ្ងៃទី៧, ៨ និង៩ ខែវិច្ឆិកា ដែលជាចំណុចសំខាន់នោះ គឺការប្រជុំអាស៊ាន គ្រោងនឹងចាប់ផ្តើមនៅថ្ងៃទី១០ ខែវិច្ឆិកា ហើយនៅថ្ងៃទី១០ដល់១៣ គឺជាការប្រជុំដ៏ធំ នៅទីក្រុងភ្នំពេញ ដែលមានប្រមុខរដ្ឋ ប្រមុខរដ្ឋាភិបាល និងដៃគូពាក់ព័ន្ធយ៉ាងច្រើន មកកាន់ទីក្រុងភ្នំពេញ ។ ហើយប្រសិន កម្មវិធីគ្មានការផ្លាស់ប្តូរទេ ចាប់ពីថ្ងៃទី៧ វិច្ឆិកា គឺមានទស្សនកិច្ចផ្លូវការរបស់នាយករដ្ឋមន្ត្រីវៀតណាម នាថ្ងៃទី៨ វិច្ឆិកា មានទស្សនកិច្ចផ្លូវការរបស់នាយករដ្ឋមន្ត្រីចិន និងថ្ងៃទី៩ វិច្ឆិកា នឹងមានទស្សនកិច្ចរបស់ប្រធានាធិបតីហ្វីលីពីន ជាដើម ។
សម្តេចតេជោ ក៏បានលើកឡើងថា ករណីខាងលើនេះ មិនទាន់គិតដល់ពិធីបុណ្យជាតិ ដែលត្រូវព្រះករុណាព្រះមហាក្សត្រ យាងដុតទៀនជ័យ នៅវិមានឯរាជ្យ ផង ។
សម្រាប់សម្តេចជានាយករដ្ឋមន្ត្រី គឺមិនអាចលៃលក ពេលវេលាគ្រប់គ្រាន់ ដើម្បីគ្រប់គ្រងជាមួយសភាពការណ៍ បុណ្យអុំទូកដែលមានមនុស្សជាច្រើន ហើយមានពេលវេលា ត្រូវត្រៀមសន្តិសុខ សម្រាប់ប្រមុខរដ្ឋប្រមុខរដ្ឋាភិបាល នៅបណ្តាប្រទេសអាស៊ាន និងដៃគូអាស៊ាន ក៏ដូចជាស្ថាប័នពាក់ព័ន្ធដទៃទៀត ដែលត្រូវមកប្រជុំនៅទីក្រុងភ្នំពេញ នោះទេ ។
សម្តេចតេជោក៏បានគូសបញ្ជាក់ថា ៖ «ការប្រជុំអាស៊ាននៅកម្ពុជាលើកនេះ គឺជាការប្រជុំ ដ៏ធំ ដែលអាចចាត់ថា មិនធ្លាប់មាននៅក្នុងប្រវត្តិ នៃការប្រជុំអាស៊ាន រាប់ទាំងរដ្ឋមន្ត្រីការបរទេស ដែលប្រតិភូ រហូតជិត៤០ គណៈប្រតិភូ មកកាន់ទីក្រុងភ្នំពេញ កាលពីដើមខែសីហា កន្លងទៅ ។ ឯការប្រជុំកំពូលអាស៊ាន នៅពេលខាងមុខ ក៏ជាការប្រជុំ ដ៏ធំ ដែលកម្រកើតមានហើយមិនកើតមាននៅក្នុងឆ្នាំ២០២០ ,២០២១ ដែលត្រូវធ្វើនៅក្នុងប្រទេសវៀតណាម និងប្រុយណេ ។ ប៉ុន្តែជាកុសល យើងអាចធ្វើនៅទីក្រុងភ្នំពេញ» ។
ការលើកឡើងថា រដ្ឋាភិបាលអស់លុយ គ្មានលទ្ធភាព ដើម្បីនឹងបម្រើឲ្យពិធីបុណ្យអុំទូក សូមវិភាគទៅតាមការគួរ ក៏ប៉ុន្តែខ្ញុំសូមបញ្ជាក់ថា ក្នុងខណៈជាម្ចាស់ផ្ទះ ទទួលខុសត្រូវ យើងកំពុងទទួលសំណូមពរ នូវទស្សនកិច្ចផ្សេងៗទៀត ក៏ប៉ុន្តែយើងគ្រាន់តែអាចទទួលបាននាយករដ្ឋមន្ត្រីវៀតណាម នាយករដ្ឋមន្ត្រីចិន និងប្រធានាធិបតីហ្វីលីន ។
តាមការបញ្ជាក់របស់សម្តេចតេជោ ខាងលើ គឺជាហេតុផល នៃការផ្អាកពិធីបុណ្យអុំទូក អកអំបុក បណ្តែតប្រទីប និងសំពះព្រះខែ នៅឆ្នាំ២០២២នេះ ៕
ចែករំលែកព័តមាននេះ