ខេត្តឧត្តរមានជ័យ ៖ រថយន្តធំៗផ្ទុកលើសចំណុះជាច្រើនគ្រឿង ដែលបើកបរចេញចូលដឹកទំនិញ ឬទម្លាក់ទំនិញ ចាប់ពីចំណុចត្រង់រង្វង់មូលព្រះនរាយដៃប្រាំបី ចូលទៅតាមច្រកផ្សារក្រុងសំរោង ដោយមិនគោរពនូវស្លាកសញ្ញាហាមចូលរបស់មន្ត្រីបច្ចេកទេស នៃមន្ទីរសាធារណការ និងដឹកជញ្ជូនខេត្ត ដែលបានដាក់នូវស្លាកសញ្ញាហាមចូលនៅរថយន្តចាប់ពីទម្ងន់ផ្ទុកលើសចំណុះ៣តោនកន្លះឡើងទៅ គឺពុំអនុញ្ញាតិចេញចូលដាច់ខាត ដើម្បីថែរក្សាការពារផ្លូវថ្នល់ឲ្យបានគង់វង្សយូរអង្វែងផងដែរ។
លោកវរសេនីយ៍ឯក ធូ សុភា នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តឧត្តរមានជ័យ បានបញ្ជាក់ប្រាប់ឲ្យដឹងនៅព្រឹកថ្ងៃទី១៣ ខែកញ្ញា ឆ្នាំ២០២២នេះថា ចំពោះការចុះធ្វើការអប់រំណែនាំទៅដល់រថយន្តធំៗដឹកទំនិញលើសចំណុះ មកទំលាក់ដែលល្មើសស្លាកកសញ្ញាចរាចរណ៍ផ្សេងៗ នៅតាមដងផ្លូវទីប្រជុំទីសាធារណៈនានា។
លោកវរសេនីយ៍ឯក បន្តថា កិច្ចប្រតិបត្តិការខាងលើនេះដែរ ក្រោមការដាក់បទបញ្ជាយ៉ាងម៉ឺងម៉ាត់ពីឯកឧត្តម ប៉ែន កុសល្យ អភិបាលខេត្តឧត្តរមានជ័យ និងការចង្អុលបង្ហាញពីលោកឧត្តមសេនីយ៍ទោ ហ៊ួត សុធី ស្នងការនគរបាលខេត្ត ដើម្បីទប់ស្កាត់រាល់នូវរថយន្តល្មើសស្លាកសញ្ញាហាមចូលក្រុង។
លោកនាយការិយាល័យចរាចរណ៍ដដែលបានបន្តទៀតថា ជាក់ស្តែងករណីរថយន្តគ្រប់ប្រភេទ ដែលបានល្មើសទៅនឹងស្លាកសញ្ញាហាមឃាត់នៅតាមដងផ្លូវចូលក្រុងសំខាន់ៗ នៅក្នុងក្រុងសំរោង គឺជាភារៈកិច្ចរបស់នគរបាលជំនាញផ្នែកខាងចរាចរណ៍ផ្លូវគោកគ្រប់គ្រង ធ្វើការផាកពិន័យ ហើយបើក្រោយពីការអប់រំធ្វើកិច្ចសន្យារួចហើយ រថយន្តដឹកទំនិញធំៗទាំងនោះនៅតែបន្តបើកបរល្មើសនឹងស្លាកសញ្ញាហាមរថយន្តមិនឲ្យចូលក្រុងបន្តទៀត នគរបាលចរាចរណ៍ជំនាញត្រូវតែធ្វើការផាកពិន័យទៅតាមអនុក្រឹតលេខ៣៩ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈតាមការជាក់ស្តែងតែម្តង។
សូមបញ្ជាក់ថា បើតាមការឲ្យដឹងពីមន្ត្រីជំនាញពាក់ព័ន្ធខេត្ត ក៏ដូចជា មតិប្រជាពលរដ្ឋរស់នៅក្នុងសង្កាត់សំរោង បានបង្ហើបប្រាប់ឲ្យដឹងនៅព្រឹកថ្ងៃទី១៣ ខែកញ្ញា ឆ្នាំ២០២២នេះថា ផ្លូវថ្នល់ដែលរងការខូតខាតជាង១គីឡូម៉ែត្រនោះ គឺពុំមែនមកពីកត្តាជំនន់ទឹកភ្លៀងតែមួយមុខប៉ុណ្ណោះទេ ទោះបីមន្ត្រីជំនាញធ្វើការជួសជុលបែបណា ក៏វាមិនជាប់បានយូដែរ បើពុំមានការទប់ស្កាត់ពីក្រុមហ៊ុនរថយន្តដឹកទំនិញធំៗលើសចំណុះចូលដឹក ឬទម្លាក់ទំនិញជារៀងរាល់ថ្ងៃបែបនេះ៕
ចែករំលែកព័តមាននេះ