ទឹកភ្លៀងនៅតែបន្តធ្លាក់ជារៀងរាល់ថ្ងៃ បានបង្កកើតមានទឹកជំនន់ហក់ឡើង ធ្វើឱ្យជន់លិចលំនៅដ្ឋានរបស់ប្រជាពលរដ្ឋចំនួន១០គ្រួសារ ដែលរស់នៅតាមដងអូរក្បែរទំនប់បង្ហៀរ
ខេត្តឧត្តរមានជ័យ ៖ ទឹកភ្លៀងនៅតែបន្តធ្លាក់ជារៀងរាល់ថ្ងៃ បានបង្កកើតមានទឹកជំនន់ហក់ឡើង ធ្វើឱ្យជន់លិចលំនៅដ្ឋានរបស់ប្រជាពលរដ្ឋចំនួន១០គ្រួសារ ដែលរស់នៅតាមដងអូរក្បែរទំនប់បង្ហៀរទឹក ហើយក៏ត្រូវបានអាជ្ញាធរ និងក្រុមយុវជនស្រុក ធ្វើការអន្តរាគមន៍ជួយជម្លៀសចេញក្រៅ ដើម្បីទៅរកទីទួលមានសុវត្ថិភាពផងដែរ កាលពីល្ងាចថ្ងៃទី៨ ខែកញ្ញា ឆ្នាំ២០២២។ ហេតុការណ៍គ្រោះធម្មជាតិជន់លិចលំនៅដ្ឋានរបស់ពលរដ្ឋនេះ ស្ថិតនៅត្រង់ចំណុចភូមិរំចេក ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
បើតាមលោក ងួន ទ្ធីរិទ្ធ ប្រធានក្រុមការងារយុវជនស្រុកអន្លង់វែង បានប្រាប់ឲ្យដឹងនៅថ្ងៃទី៨ខែកញ្ញា ឆ្នាំ២០២២នេះថា នៅក្នុងស្រុកអន្លង់វែង មានភ្លៀងធ្លាក់ជាបន្តបន្ទាប់លាយឡំជាមួយខ្យល់កន្ត្រាក់ បណ្ដាលឱ្យប៉ះពាល់ចំនួន៣ឃុំ ដូចជា ៖
១- ឃុំអន្លង់វែង ភូមិរំចេក ទឹកលិចផ្ទះប្រជាពលរដ្ឋចំនួន៤ខ្នង និងលិចផ្លូវ២កន្លែងប្រវែង៣២ម៉ែត្រ ទឹកកម្ពស់៧០សង់ទីម៉ែត្រ ។ ភូមិរំចេកលិច ទឹកលិចផ្ទះប្រជាពលរដ្ឋចំនួន១០ខ្នង និងលិចទំនប់បង្ហៀររំចេកលិច ប្រវែង២០ម៉ែត្រ ទឹកកម្ពស់២ម៉ែត្រ មិនអាចធ្វើដំណើរឆ្លងកាត់បាន ។
២- ឃុំត្រពាំងតាវ ភូមិទំនប់ថ្មី ចំណុចទំនប់បង្ហៀរ៣០០ម៉ែត្រ ទឹកហូរលើខ្នងទំនប់ កម្ពស់៥០សង់ទីម៉ែត្រ មិនអាចធ្វើដំណើរឆ្លងកាត់បាន។
៣- ឃុំលំទង ភូមិស្រឡៅស្រោង ទឹកជន់លិចផ្លូវស្ពាន១លន្លែង ប្រវែង១១០ម៉ែត្រ ទឹកហូរលើផ្លូវកម្ពស់៨០សង់ទីម៉ែត្រ ។
លោកប្រធានយុវជនស្រុកអន្លង់វែង បានបញ្ជាក់បន្ថែមទៀតថា ចំពោះការជន់លិចផ្ទះសម្បែងនេះដែរ ពុំទាន់ដល់ថ្នាក់ធ្ងន់ធ្ងរនៅឡើយទេ ហើយក៏ពុំទាន់មានប៉ះពាល់ ឬគ្រោះថ្នាក់ដល់មនុស្សសត្វអ្វីនោះដែរ។ តែទោះបីយ៉ាងណា ខាងអាជ្ញាធរស្រុកអន្លង់វែង និងក្រុមយុវជនស្រុក ត្រៀមរង់ចាំជួយសង្គ្រោះបងប្អូនប្រជាពលរដ្ឋដែលរងគ្រោះ ដោយសារជំនន់ទឹកភ្លៀងគ្រប់ពេលាវេលាទាំងអស់៕
ចែករំលែកព័តមាននេះ