ខេត្តត្បូងឃ្មុំ ៖ គោយន្តកែច្នៃ១គ្រឿងពាក់ស្លាកលេខ ព្រៃវែង 6A-0269 បានផ្ទុកអង្ករពេញបានបើកចុះសាឡាង សាមគ្គី០២៧ ជាហេតុបណ្តាលឲ្យក្រឡាប់បះជើងច្រូង
ខេត្តត្បូងឃ្មុំ ៖ គោយន្តកែច្នៃ១គ្រឿងពាក់ស្លាកលេខ ព្រៃវែង 6A-0269 បានផ្ទុកអង្ករពេញបានបើកចុះសាឡាង សាមគ្គី០២៧ ជាហេតុបណ្តាលឲ្យក្រឡាប់បះជើងច្រូង និងរងរបួសធ្ងន់ដល់អ្នកបើកបរ។ហេតុការណ៍នេះកើតឡើងនៅវេលាម៉ោង៦និង២០នាទីព្រឹក ថ្ងៃទី១២ កុម្ភៈ ២០១៧ ត្រង់ចំណុចភូមិទ្រាទី៣ឃុំទ្រា ស្រុកក្រូចឆ្មារ អ្នករងគ្រោះត្រូវបានបញ្ជូនទៅសង្គ្រោះជាបន្ទាន់នៅមន្ទីរពេទ្យភ្លាមៗ។ នគរបាលស្រុកក្រូចឆ្មារ ប្រាប់ឲ្យដឹងថា គោយន្ត១គ្រឿងដឹកអង្ករខាងលើនេះបានបើកចេញមកពីក្នុងស្រុកក្រូចឆ្មារ និងបានបើកចុះសាឡាងដើម្បីឆ្ពោះមកកាន់ស្រុកស្ទឹងត្រង់ ខេត្តកំពង់ចាម ស្របពេលដែលកំពុងតែចុះទួលនោះជាហេតុបណ្តាលឲ្យដាច់ហ្វ្រាំង និងបានរអិលមកសង្កត់លើបង្កាន់ដៃសាឡាងផ្នែកខាងឆ្វេង បង្កឲ្យមានការភ្ញាក់ផ្អើលពេញសាឡាងតែម្តង។
មន្ត្រីនគរបាលស្រុកក្រូចឆ្មារប្រាប់បន្តថា ក្នុងពេលដែលអ្នកដំណើរមួយចំនួននៅលើសាឡាបានឃើញរថយន្តដាច់ហ្វ្រាំងបែបនេះ ក៏បានលោតចុះទៅក្នុងទឹកទន្លេមេគង្គ ដើម្បីគេចខ្លាចគ្រោះថ្នាក់ដល់អាយុជីវិត ប៉ុន្តែសំណាងល្អមិនមានអ្នកដំណើរណាម្នាក់រងរបួសនោះឡើយ។ រថយន្តដឹកអង្ករត្រូវបានជំនាញចរាចរណ៍នគរបាលស្រុកក្រូចឆ្មារ ប្រគល់ឲ្យទៅអង្គភាពសាឡាងដើម្បីដោះស្រាយតាមនីតិវិធី ព្រោះដើម្បីទូទាត់សំណងថ្លៃការខូចខាតនោះ ។
មន្ត្រីនគរបាលស្រុកក្រូចឆ្មារ បញ្ជាក់ថា កន្លងមកក៏ធ្លាប់មានគោយន្តកែច្នៃ១គ្រឿងបានដឹកក្បឿងបើកចុះមកដល់សាឡាង ក៏រអិសចុះទៅបុករថយន្តទំនើបរបស់មន្ត្រីស្ថានទូត១រូប បណ្តាលឲ្យរងការខូចខាតរថយន្តជាដំណំជាច្រើនខែមកហើយ ដោយអ្នកបើកបរគោយន្តនោះបានរត់គេចខ្លួនបាត់។ រថយន្តត្រូវបាននាំមករក្សាទុកនៅអធិការដ្ឋាននគរបាលស្រុកក្រូចឆ្មារ ដើម្បីធ្វើការស្រាវជ្រាវបន្ត៕
ចែករំលែកព័តមាននេះ