ខេត្តកំពង់ឆ្នាំង ៖ រទេះទឹកដែលយើងគ្រប់គ្នានិយមហៅថា (រហាត់ទឹក) ត្រូវបានប្រជាពលរដ្ឋរស់នៅតាមមាត់ស្ទឹង ក្នុងស្រុកទឹកផុស ប្រើធ្វើជាឧបករណ៍យោងទឹកស្រោចស្រពស្រែប្រាំង វស្សា និងដំណាំដាំដុះផ្សេងៗ ជំនួសដោយការប្រើម៉ាស៊ីនបូមទឹកដែលត្រូវចំណាយថវិកាប្រចាំថ្ងៃ…
ខេត្តកំពង់ឆ្នាំង ៖ រទេះទឹកដែលយើងគ្រប់គ្នានិយមហៅថា (រហាត់ទឹក) ត្រូវបានប្រជាពលរដ្ឋរស់នៅតាមមាត់ស្ទឹង ក្នុងស្រុកទឹកផុស ប្រើធ្វើជាឧបករណ៍យោងទឹកស្រោចស្រពស្រែប្រាំង វស្សា និងដំណាំដាំដុះផ្សេងៗ ជំនួសដោយការប្រើម៉ាស៊ីនបូមទឹកដែលត្រូវចំណាយថវិកាប្រចាំថ្ងៃ ។
ប្អូនប្រុស ឡាំ សារ៉ាត់ អាយុ៣១ឆ្នាំ មានទីលំនៅភូមិដំរឹប ឃុំអភិវឌ្ឍន៍ ស្រុកទឹកផុស បានឲ្យដឹងថាគាត់បានចេះធ្វើរហាត់ទឹក ឬហៅតាមអ្នកស្រុកតំបន់នោះថា (រទេះទឹក) តពីឪពុករបស់គាត់ ។ចំណែកឪពុករបស់គាត់ក៏ចេះ បន្តពីជីតាបន្តបន្ទាប់គ្នាពីដូនតាមកដែរ ។ សម្រាប់រូបគាត់បានធ្វើរហាត់ទឹកនេះ ប្រើប្រាស់បានជាង៣ឆ្នាំមកហើយ។ ដោយបានយកទឹកមកស្រោចស្រពលើដំណាំនិងស្រូវប្រាំង-វស្សារបស់គាត់។
ទឹកដែលហូរជាប់ជាប្រចាំពេលច្រើនហួសកំរិត គាត់បានបង្ហូរចូលស្រែអ្នកដទៃនៅជិតខាងគាត់ដែលគ្មានរហាត់ ឬ ពេលខ្លះគាត់ដាក់បំពង់យោងទឹក ចាក់ចូលទរចំនួនតិច ដើម្បីកាត់បន្ថយកំរិតទឹកហូរចូលស្រែចំការគាត់ដែរ ។ ម្ចាស់រហាត់ទឹករូបនោះបានបញ្ជាក់ថាចំពោះរដំឡើងរហាត់ទឹកមួយត្រូវចំណាយថវិកាប្រមាណពី៣០ទៅ៤០ម៉ឺនរៀលប៉ុណ្ណោះ បើយើងមានធ្នួសស្រាប់ (របាំងទប់ទឹក)។ ប៉ុន្តែបើវ៉ៃធ្នួសថ្មី ត្រូវបន្ថែមថវិកាច្រើនជាងនេះ ។
យ៉ាងណាក្តី ប្អូនប្រុស ឡាំ សារ៉ាត់ បានបញ្ជាក់ពីអត្ថប្រយោជន៍ថា យើងមិនពិបាកទិញប្រេងចាក់ម៉ាស៊ីនបូមទឹកប្រចាំថ្ងៃនោះឡើយ ។ ជាងនេះទៅទៀត ស្រូវដែលនៅជាប់មាត់ស្ទឹង គឺពឹងលើទឹកហូរជាប់ជាប្រចាំ។ មិនគ្មានទឹកទេទិន្នផលស្រូវត្រូវថយចុះដែរ ។ ដោយសារតែដីជាប់មាត់ស្ទឹង ជាដីល្បាយខ្សាច់ ឆាប់ខ្សោះទឹកណាស់។ បើតាមការបញ្ជាក់ពីលោក គុយ ឡេង មេឃុំអភិវឌ្ឍន៍ ស្រុកទឹកផុស បានឱ្យដឹងថា៖ នៅតំបន់នេះ គេហៅរទេះទឹក គេមិនហៅរហាត់ទឹកទេ ។ ចំណែកក្នុងឃុំរបស់លោកមានប្រជាពលរដ្ឋច្រើនណាស់ដែលប្រើប្រាស់រទេះទឹកនេះ ជាមធ្យោបាយយកទឹកស្រោចសព ស្រែប្រាំង ស្រែវស្សា និង ដំណាំដាំដុះផ្សេងៗ ។
បើតាមលោកដឹង ឃុំ ដែលជាប់ដងស្ទឹង ក្នុងស្រុកទឹកផុសនេះ មានដូចជា ឃុំក្បាលទឹក ឃុំទួលខ្ពស់ ឃុំតាំងក្រសាំង ឃុំអភិវឌ្ឍន៍ ។ ប្រជាពលរដ្ឋរស់នៅតាមដងស្ទឹងទាំងនេះ សុទ្ធតែប្រើប្រាស់រហាត់ទឹកបែបនេះ ជាមធ្យោបាយយកទឹកជំនួសដោយម៉ាស៊ីនបូមទឹក ដែលត្រូវចំណាយថវិការ ។ ហើយបើតាមការប្រមាណ អ្នកប្រើប្រាស់រហាត់ទឹកទូរទាំងស្រុកទឹកផុសមានប្រមាណជាង១០០គ្រឿង ៕
ចែករំលែកព័តមាននេះ