ចាប់ខ្លួនជនជួញដូរគ្រឿងញៀ.នម្នាក់ ដកហូតបាន៦កញ្ចប់នៅខណ្ឌដង្កោ
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោ បានធ្វើការឃាត់ខ្លួនជនជួញដូរគ្រឿងញៀ.នម្នាក់ដកហូតបានចំនួន០៦កញ្ចប់ ក្នុងខណៈពេលដែលជននោះចេញធ្វើសកម្មភាព
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោ បានធ្វើការឃាត់ខ្លួនជនជួញដូរគ្រឿងញៀនម្នាក់ដកហូតបានចំនួន០៦កញ្ចប់ ក្នុងខណៈពេលដែលជននោះចេញធ្វើសកម្មភាព ជួញដូរចែកចាយគ្រឿងញៀន ដោយឆ្លងកាត់គោលដៅត្រួតពិនិត្យអាវុធជាតិផ្ទុះរបស់កម្លាំងខាងលើ។ ការចាប់ខ្លួននោះបានធ្វើឡើង កាលពីវេលា៧យប់ថ្ងៃទី០៦ ខែមករា ឆ្នាំ២០១៧ នៅលើកំណាត់ផ្លូវលេខ២១៧ ត្រង់ចំណុច មុខវត្តសំបួរមាស ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ជនសង្ស័យដែលត្រូវចាប់ខ្លួននោះឈ្មោះ អ៊ែល តាហ្វា ភេទប្រុស អាយុ២៥ឆ្នាំ មុខរបរកម្មកររោងចក្រ ស្នាក់នៅបន្ទប់ផ្ទះជួលលេខ៣៦ ស្ថិតនៅក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ កម្លាំងសមត្ថកិច្ចចម្រុះដកហូតបានគ្រឿងញៀនចំនួន០៦កញ្ចប់ ក្នុងនោះកញ្ចប់ធំ១កញ្ចប់, កញ្ចប់ធំល្មមចំនួន៣កញ្ចប់ និងកញ្ចប់តូចចំនួន២កញ្ចប់ និងម៉ូតូ០១គ្រឿងផងដែរ។ តាមប្រភពព័ត៌មានបានឲ្យដឹងថា នៅមុនពេលកើតហេតុខាងលើកម្លាំងគណៈបញ្ជាការឯកភាពខណ្ឌដង្កោ បានដាក់កម្លាំងដើម្បីត្រួតពិនិត្យអាវុធ-ជាតិផ្ទុះ និងបទល្មើសផ្សេងៗ លើយានយន្តគ្រប់ប្រភេទ នៅលើកំណាត់ផ្លូវលេខ២១៧ត្រង់ចំណុច មុខវត្តសំបួរមាស ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
លុះដល់វេលាម៉ោង៧និង៤០នាទីយប់បានឃើញជនសង្ស័យម្នាក់នោះជិះម៉ូតូ០១គ្រឿង ម៉ាកធូដេពណ៌ក្រហម គ្មានស្លាកលេខ ទិសដៅពីជើងទៅត្បូង ឆ្លងកាត់គោលដៅកំពុងត្រួតពិនិត្យនោះ។ ដោយមានការសង្ស័យ កម្លាំងបានឃាត់ឲ្យឈប់ដើម្បីធ្វើការឆែកឆេរ និងត្រួតពិនិត្យក៏ប្រទះឃើញថ្នាំញៀនទាំង៦កញ្ចប់ដែលជននោះលាក់ទុក នៅក្នុងមួកសុវត្ថិភាពរបស់ខ្លួន ហើយកម្លាំងក៏បានចាប់ខ្លួន រួចនាំយកទាំងវត្ថុតាងទៅកាន់អធិការដ្ឋាននគរបាលខណ្ឌដង្កោដើម្បីកសាងសំណុំរឿងចាត់ការតាមច្បាប់។
លោកវរសេនីយ៍ទោ ជឹម ស៊ីថា អធិការនគរបាលខណ្ឌដង្កោបានឲ្យដឹងថា ក្នុងប្រតិបត្តិការណ៍បង្ក្រាប គ្រឿងញៀនទ្រង់ទ្រាយធំ នៅក្នុងរយៈ១ខែ គឺចាប់ពីថ្ងៃទី១ ខែមករា ដល់ថ្ងៃទី៣១ ខែមករា ឆ្នាំ២០១៧ កម្លាំងនគរបាលខណ្ឌដង្កោរបស់លោក បង្ក្រាបបានចំនួន១៦ករណី ដោយបានឃាត់ខ្លួនមុខសញ្ញាជួញដូរ និងប្រើប្រាស់បានចំនួន៤៦នាក់ ក្នុងនោះមានស្រីចំនួន៤នាក់។ ដកហូតបានវត្ថុតាងគ្រឿងញៀនចំនួន៩៣ កញ្ចប់ ម៉ូតូចំនួន១២គ្រឿង ទូរស័ព្ទដៃចំនួន៧គ្រឿង រួមជាមួយនឹងសម្ភារប្រើប្រាស់គ្រឿងញៀនមួយចំនួនទៀត។
ដោយឡែកទីតាំងដែលបង្ក្រាបបាន គឺស្ថិតនៅក្នុងសង្កាត់ដង្កោចំនួន៧ករណី សង្កាត់ពងទឹកចំនួន៣ករណី សង្កាត់ព្រៃវែង២ករណី សង្កាត់ព្រៃស១ករណី សង្កាត់ទៀន១ករណី សង្កាត់ជើងឯក១ករណី និងសង្កាត់រលួស១ករណី ហើយនៅក្នុងខែកុម្ភៈនេះកម្លាំងកំពុងបន្តធ្វើការបង្ក្រាបទៀត៕
ចែករំលែកព័តមាននេះ