ខេត្តកណ្ដាល ៖ បុរសចំណាស់ម្នាក់ ក្រោយត្រឡប់មកពីធ្វើការអស់កំលាំងខ្លាំងផង ស្រាប់តែស្ត្រីម្នាក់ស្រែកជេរឌឺដងទៀត ក៏ក្ដៅចិត្តកាន់តែខ្លាំង ទាញដំបងឈើជ្រុងមកវាយសំពងក្បាលស្ត្រីរូបនោះបែកដេរ៨ថ្នេរ កើតឡើងកាលពីវេលាម៉ោង០៥ និង៣០នាទីរសៀលថ្ងៃទី៦ កុម្ភៈ ស្ថិតនៅភូមិដើមពោធិ៍ ឃុំជ្រោយតាកែវ ស្រុកកោះធំ ខេត្តកណ្ដាល ។
បុរសដៃដល់ឈ្មោះនួន នាង អាយុ៦៤ឆ្នាំ មានទីលំនៅក្នុងភូមិដើមពោធិ៍ ឃុំជ្រោយតាកែវ ស្រុកកោះធំ ខេត្តកណ្ដាល ។ រីឯស្ត្រីរងគ្រោះឈ្មោះទ្រី ស្រ៊ាន អាយុ៦៤ឆ្នាំ មានទីលំនៅក្នុងភូមិ-ឃុំជាមួយគ្នា (បានរងរបួសត្រង់ចំហៀងក្បាលផ្នែកខាងឆ្វេងដេរ៨ថ្នេរ) ។
នគរបាលបានឱ្យដឹងទៀតថា ជនរងគ្រោះ និងជនសង្ស័យ គឺជាអ្នកជិតខាងមានផ្ទះនៅជាប់របងគ្នា ។ រយៈពេលកន្លងមកនេះ ពួកគេទាំងពីរនាក់ ធ្លាប់មានទំនាស់ពាក្យសម្ដីនឹងគ្នាជារឿយៗ ដែលផ្ដើមចេញពីបញ្ហាទំនាស់ព្រំដី ។ លុះនៅថ្ងៃទី០៦ កុម្ភៈ វេលាម៉ោង០៥ និង៣០នាទីរសៀល ពេលបុរសនោះត្រលប់ពីធ្វើចំការមកដល់ផ្ទះវិញ ក៏ឮស្ត្រីរងគ្រោះស្ថិតក្នុងសភាពស្រវឹងស្រាស្រែកឡូឡាជេរដៀមដាមផងនោះ ទើបប៉ះសម្ដីគ្នាធ្វើឱ្យទប់កំហឹងពុំបាន ក៏ទាញយកដំបងឈើជ្រុងមួយកំណាត់ប៉ុន.កដៃវាយទៅលើជនរងគ្រោះចំក្បាល បណ្ដាលអោយបែកក្បាលហូរឈាមតែម្ដង ។
ចែករំលែកព័តមាននេះ