ខេត្តមណ្ឌលគិរី ៖ ក្រសួងបរិស្ថាន បានអះអាងថា ក្នុងរយៈពេល១១ឆ្នាំ មកនេះ បរិមាណសត្វកម្រៗមួយចំនួនក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច នៅតែប្រឈមមុខនឹងការធ្លាក់ចុះគួរឲ្យកត់សម្គាល់ ។
ការអះអាងនេះ ខណៈមន្ត្រីជាន់ខ្ពស់ក្រសួងបរិស្ថាន បានដឹកនាំក្រុមអ្នកសារព័ត៌មានច្រើនស្ថាប័ន ធ្វើទស្សនកិច្ចនៅក្នុងដែនជម្រកសត្វព្រៃស្រែកពក ស្ថិតក្នុងស្រុកកោះញែក ខេត្តមណ្ឌលគិរី ដើម្បីពិនិត្យលើការសិក្សាស្រាវជ្រាវរបាយសត្វព្រៃរបស់ក្រុមអ្នកជំនាញ នៃមន្ទីរបរិស្ថានខេត្តមណ្ឌលគិរី និងអង្គការ WWF នៅថ្ងៃទី២ តុលា ឆ្នាំ២០២២ ។
មន្ត្រីជាន់ខ្ពស់ក្រសួងបរិស្ថាន បានបញ្ជាក់ថា ការធ្លាក់ចុះបរិមាណសត្វក្រម ដោយសាការដាក់អន្ទាក់ចាប់សត្វព្រៃ ការបរបាញ់សត្វព្រៃ និងចាប់សត្វព្រៃដោយការប្រើប្រាស់ឆ្កែប្រមាញ់ដោយខុសច្បាប់ គឺជាកត្តាគំរាមកំហែង ដែលកំពុងតែកើតឡើងមកលើសត្វព្រៃក្នុងតំបន់ការពារធម្មជាតិ ដែលចាំបាច់គ្រប់ភាគីទាំងអស់ ត្រូវចូលរួមក្នុងការដោះស្រាយបញ្ហាអន្ទាក់នេះ ដើម្បីផ្តល់សុវត្ថិភាពដល់សត្វព្រៃ ទាំងជម្រក ប្រភពទឹក និងកន្លែងរកចំណី ។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានថ្លែងថា យោងតាមរបាយការណ៍សិក្សាស្រាវជ្រាវរបស់មន្ត្រីជំនាញ នៃមន្ទីរបរិស្ថាន និងអង្គការ WWF បរិមាណសត្វកម្រៗមួយចំនួនក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច នៅតែប្រឈមមុខនឹងការធ្លាក់ចុះគួរឱ្យកត់សម្គាល់ ការធ្លាក់ចុះនេះដោយសារតែកត្តាគំរាមកំហែងចម្បងគឺអន្ទាក់ ការប្រើប្រាស់ កាំភ្លើងពិត និងកាំភ្លើងកែច្នៃ ដើម្បីបាញ់សត្វព្រៃ និងការប្រើប្រាស់សត្វឆ្កែប្រមាញ់សត្វព្រៃដោយខុសច្បាប់ នៅតែកើតមាន ។
លោកបន្តថា ថ្វីត្បិតតែចំនួនសត្វក្រចកជើងចំពាមមានការប្រឈមមុខថយចុះ តែទន្ទឹមនឹងនេះ ប្រភេទសត្វព្រៃខ្លះ ប្រភេទពានរ រួមមានសត្វស្វាកន្ទុយស ស្វាព្រាម មានចំនួនថេរ និងមានការកើនឡើង ហើយប្រភេទសត្វស្លាប ដូចជាសត្វត្មាតមា នវត្តមានឡើងវិញ ក្នុងដែនជម្រកសត្វព្រៃស្រែពក ។
រដ្ឋលេខាធិការ បានថ្លែងថា គ្រប់ភាគីទាំងអស់កំពុងបន្តកិច្ចខិតខំប្រឹងប្រែងក្នុងការអភិរក្សសត្វព្រៃឲ្យបានគង់វង្ស និងខិតខំដាក់ចុះវិធានការផ្សេងៗរួមទាំងវិធានការ ច្បាប់និងវិធានការសេដ្ឋកិច្ចទន្ទឹមគ្នា ។
បើតាមការឱ្យដឹងរបស់មន្ទីរបរិស្ថានខេត្តមណ្ឌលគិរី នៅឆ្នាំ២០២១ កន្លងទៅ អន្ទាក់ជាង ១២,០០០ ត្រូវបានដោះចេញពីដែនជម្រកសត្វព្រៃភ្នំព្រេច និងដែនជម្រកសត្វព្រៃភ្នំព្រេច ។ កត្តាអន្ទាក់បាននឹងកំពុងគំរាមកំហែងជីវៈចម្រុះក្នុងតំបន់ការពារធម្មជាតិ ។
កញ្ញា Milou Groenenberg ប្រធានផ្នែកស្រាវជ្រាវនិងតាមដានជីវៈចម្រុះ នៃអង្គការ WWF បានថ្លែងថា បើប្រៀបធៀបទិន្នន័យសត្វព្រៃក្នុងដែនជម្រកសត្វព្រៃស្រែពក និងភ្នំព្រេចពី ឆ្នាំ២០១០ មកដល់ឆ្នាំ២០២២ ក្នុងរយៈ ពេល១១ឆ្នាំ ចំនួនសត្វទន្សោងធ្លាក់ចុះចំនួន ៨៩% គឺពីចំនួន ៣,០១៣ ក្បាលនៅឆ្នាំ២០១០ (ក្នុងនោះនៅក្នុងដែនជម្រកសត្វព្រៃស្រែ ពលមានទន្សោងចំនួន ១,៩១១ក្បាល និងដែនជម្រកសត្វព្រៃភ្នំព្រេចមានចំនួន ១,១០២ ក្បាល) មកនៅត្រឹម ៤៣៩ ក្បាល (ស្រែពកចំនួន ១២២ ក្បាល និងភ្នំព្រេចចំនួន ៣១៧ក្បាល) នៅឆ្នាំ២០២២នេះ ។ សត្វឈ្លូសធ្លាក់ចុះចំនួន ៦៥% ពីចំនួនសត្វឈ្លូសចំនួន ៦,៩៩៦ ក្បាល (ស្រែពកចំនួន ៤៤៥៣ក្បាល និងភ្នំព្រេចចំនួន ២,៥៤៣ក្បាល) មកនៅចំនួន ២,៤៦៦ ក្បាល (ស្រែពកចំនួន ១,២៤៧ និងភ្នំព្រេចចំនួន ១,២១៩)។ សត្វជ្រូកព្រៃធ្លាក់ចុះចំនួន ១៥% ពីចំនួន ៤,៩០៩ក្បាល (ស្រែពកចំនួន ៣,៣១៩ ក្បាល និងភ្នំព្រេចចំនួន ១,៥៩៥) មកនៅចំនួន ៤,១៦២ក្បាល នៅឆ្នាំ២០២២ (ស្រែពកចំនួន ៣,៣៦៥ និងភ្នំព្រេច ៧៩៧ក្បាល។
ចំណែកលោក សេង ទៀក ប្រធានអង្គការ WWF ប្រចាំកម្ពុជាបានលើកឡើងថា តំបន់ទេសភាពភាគខាងកើតគឺជាគ្រាប់ពេជ្រមិនទាន់ច្នៃដែលមានសក្តានុពលទេសចរណ៍ធម្មជាតិខ្ពស់ជាពិសេស នៅដែនជម្រកសត្វព្រៃស្រែ ពកជាតំបន់ព្រៃល្បោះដែលជាជម្រកសត្វប្រ ភេទក្រចកជើងចំពាមជាពិសេសសត្វទន្សោង ដែលតំណាងឱ្យ ៦០% នៃសត្វទន្សោងនៅ លើពិភពលោក រស់នៅតំបន់ដែនជម្រកសត្វព្រៃនៅខេត្តមណ្ឌលគិរីនេះ ។
លោកបានគូសបញ្ជាក់ពីភាពចាំបាច់ដែលត្រូវគ្រប់គ្រងនិងអភិរក្សឱ្យបានលើតំបន់អភិរក្សនេះដើម្បីបង្កើនចំនួនជីវៈចម្រុះ ។
សូមជម្រាបថាក្នុងអំឡុងទស្សនកិច្ចនេះដែរ ក្រុមការងារក្រសួងបរិស្ថាន និងអង្គការ WWF បានចុះពិនិត្យការរៀបចំការប្រមូលទិន្នន័យនៅលើទីវាលពីសំណាក់ក្រុមអ្នកស្រាវជ្រាវ ។ ដំណើរទស្សនកិច្ចស្វែងយល់ពីការគ្រប់គ្រង និងការងារអភិរក្សធនធានធម្មជាតិរួមមានព្រៃឈើ និងសត្វព្រៃនៅក្នុងដែនជម្រកសត្វព្រៃស្រែពកដែលជាតំបន់ព្រៃល្បោះ ធំជាងគេនៅអាស៊ីអាគ្នេយ៍ដែលមាន ផ្ទៃដីសរុបទំហំជាង ៣៧ម៉ឺនហិកតា៕
ចែករំលែកព័តមាននេះ