ខេត្តពោធិ៍សាត់ ៖ កម្មករប៉ះកង់ឡាន២នាក់ត្រូវបានសមត្ថកិច្ចចាប់ខ្លួនខណៈកំពុងប្រព្រឹត្តជាក់ស្តែងកាលពីវេលាម៉ោង១១ព្រឹក ថ្ងៃទី៦ ខែកុម្ភៈ ឆ្នាំ២០១៧ នៅកន្លែងប៉ះកង់ឡាន …
ខេត្តពោធិ៍សាត់ ៖ កម្មករប៉ះកង់ឡាន២នាក់ត្រូវបានសមត្ថកិច្ចចាប់ខ្លួនខណៈកំពុងប្រព្រឹត្តជាក់ស្តែងកាលពីវេលាម៉ោង១១ព្រឹក ថ្ងៃទី៦ ខែកុម្ភៈ ឆ្នាំ២០១៧ នៅកន្លែងប៉ះកង់ឡានជាប់ផ្លូវជាតិលេខ៥ ស្ថិតក្នុងភូមិវាលវង់ ឃុំស្នាអន្សារ ស្រុកក្រគរ ខេត្តពោធិ៍សាត់ ។
សមត្ថកិច្ចឲ្យដឹងថា ជនសង្ស័យទាំង២នាក់ ម្នាក់ឈ្មោះ ភាក់ ភាត់ ភេទប្រុស អាយុ២៣ឆ្នាំ មានទីលំនៅភូមិវាលវង់ និងម្នាក់ទៀតឈ្មោះ ប៊ុត កវ៉ា ភេទប្រុស អាយុ២៥ឆ្នាំ រស់នៅភូមិក្រាំងវែង ឃុំស្នាអន្សារ ។ ពួកគេជាកម្មករប៉ះកង់ឡាននៅភូមិឃុំកើតហេតុខាងលើ ។
សមត្ថកិច្ចឲ្យដឹងទៀតថា កន្លងមកភ្នាក់ងារបានផ្ដល់ព័ត៌មានថា នៅកន្លែងប៉ះកង់ឡានខាងលើនេះមានអ្នកប្រើប្រាស់ថ្នាំញៀន និងលួចចែកចាយដល់អ្នកបើកបររថយន្ដធំៗដែលធ្វើដំណើរទៅមកផង ពិសេសនៅពេលយប់ ។ បន្ទាប់ពីកំណត់បានមុខសញ្ញាហើយ សមត្ថកិច្ចបានដាក់ភ្នាក់ងារតាមដានគ្រប់ពេលវេលា ដើម្បីចាប់ភស្ដុតាងឲ្យបានក្នុងការដាក់បន្ទុក ។ លុះនៅយប់ថ្ងៃទី០៥ និងព្រឹកថ្ងៃទី០៦ ខែកុម្ភៈ ដោយឃើញរថយន្ដធំឈប់នៅទីនោះញឹកញាប់ សមត្ថកិច្ចមានការសង្ស័យក៏សុំចូលធ្វើការឆែកឆេរ ស្រាប់តែរកឃើញម្ស៉ៅក្រាមសថ្លាចំនួន២កញ្ចប់ដែលជាសារធាតុញៀនប្រភេទម៉ាទឹកកកក៏ឃាត់ខ្លួនកម្មករប៉ះកង់ឡានទាំង២នាក់ ព្រមទាំងដកហូតម៉ូតូម៉ាក MSX គ្មានស្លាកលេខ១គ្រឿង និងឧបករណ៍សម្រាប់ជក់មួយចំនួនទៀត ។
ក្រោយពេលចាប់ខ្លួន ជនសង្ស័យទាំង២នាក់ និងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី ៕
ចែករំលែកព័តមាននេះ