ខេត្តសៀមរាប ៖ គណបក្សសម្ព័ន្ធដើម្បីប្រជាធិបតេយ្យ ប្រចាំខេត្តសៀមរាប បានឲ្យដឹងថា ខ្លួនបានជូនដំណឹងដល់អាជ្ញាធរពីគម្រោងជួបជុំសមាជិកបក្សរបស់ខ្លួននឹងត្រូវបន្តរហូតដល់ដំណាច់ខែកញ្ញា ឆ្នាំ២០២២។ ប្រកាសប្រកាន់ជំហរថា ការជួបជុំសមាជិកគណបក្ស រហូតដល់ដំណាច់…
ខេត្តសៀមរាប ៖ គណបក្សសម្ព័ន្ធដើម្បីប្រជាធិបតេយ្យ ប្រចាំខេត្តសៀមរាប បានឲ្យដឹងថា ខ្លួនបានជូនដំណឹងដល់អាជ្ញាធរពីគម្រោងជួបជុំសមាជិកបក្សរបស់ខ្លួននឹងត្រូវបន្តរហូតដល់ដំណាច់ខែកញ្ញា ឆ្នាំ២០២២។ ប្រកាសប្រកាន់ជំហរថា ការជួបជុំសមាជិកគណបក្ស រហូតដល់ដំណាច់ ខែកញ្ញា ឆ្នាំ២០២២ខាងមុខនេះ ខណៈអាជ្ញាធរខេត្តសៀមរាប ជម្រាបជូនលោក ខឹម វាសនា ឲ្យបញ្ឈប់ការប្រមូលផ្តុំប្រជាពលរដ្ឋ និងរំសាយការជួបជុំឲ្យអស់ត្រឹមម៉ោង២៤និង០០នាទីយប់ថ្ងៃទី៣០ ខែសីហា ឆ្នាំ២០២២នេះ ជាកំហិត ។
ក្រោយពីទទួលបានលិខិតរបស់រដ្ឋបាលខេត្តសៀមរាប ចុះថ្ងៃទី២៩ ខែសីហា ឆ្នាំ២០២២ រួចមក ប្រធានការិយាល័យគណបក្ស LDP ប្រចាំខេត្តសៀមរាប បានជម្រាបជូនលោកអភិបាល នៃគណៈអភិបាលខេត្តសៀមរាប ថា គណបក្សសម្ព័ន្ធដើម្បីប្រជាធិបតេយ្យ បានប្រារព្ធកម្មវិធីជួបជុំសមាជិកគណបក្ស ស្ថិតក្នុងបរិវេណចម្ការ នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ។ ចំពោះការជួបជុំនេះ គណបក្សបានសហការយ៉ាងជាប់លាប់ជាមួយអាជ្ញាធរមូលដ្ឋាន ហើយបានដាក់លិខិតជូនដំណឹងទៅរដ្ឋបាលឃុំត្បែង ដើម្បីជ្រាបជាដំណឹងកាលពីថ្ងៃទី២៧ ខែសីហា ឆ្នាំ២០២២ និងបានអនុញ្ញាតឱ្យសមត្ថកិច្ច អាចចេញចូល ដើម្បីត្រួតពិនិត្យក្នុងបរិវេណទីតាំងជួបជុំរាល់ពេលវេលា ។ សម្រាប់ការជួបជុំនេះ គណបក្សបានរៀបចំរក្សាសណ្តាប់ធ្នាប់ យ៉ាងមានរបៀបរៀបរយ ហើយរក្សាអនាម័យបានល្អ និងបានអនុវត្តតាមវិធានការចុងក្រោយរបស់ក្រសួងសុខាភិបាលអំពីការការពារពីការឆ្លងជំងឺកូវីដ-១៩ ។ ចំពោះសំណង់នានា ក្នុងបរិវេណចម្ការដែលជាកម្មសិទ្ធិស្របច្បាប់ គ្រាន់តែជាសំណង់ស្រាល សម្រាប់សម្រាកក្នុងរយៈពេលខ្លី ពុំមែនជាសំណង់រឹងមាំឡើយ ហើយរយៈពេល នៃការជួបជុំរបស់គណបក្សក្នុងបរិវេណចម្ការនេះ បានបញ្ជាក់ច្បាស់លាស់ក្នុងលិខិតជូនដំណឹងទៅរដ្ឋបាលឃុំត្បែង រួចរាល់ហើយ គឺនឹងបញ្ចប់នៅដំណាច់ខែកញ្ញា ឆ្នាំ២០២២ ។ គណបក្សសម្ព័ន្ធដើម្បីប្រជាធិបតេយ្យ គឺជាគណបក្សនយោបាយស្របច្បាប់ មានប្រកាសទទួលស្គាល់ជាផ្លូវការពីក្រសួងមហាផ្ទៃ ដូច្នេះការជួបជុំសមាជិករបស់គណបក្សីដែលបានធ្វើមកនេះ ពុំមានអ្វីដែលផ្ទុយនឹងច្បាប់ នៃព្រះរាជាណាចក្រកម្ពុជាឡើយ ។
កាលពីថ្ងៃម្សិលមិញនេះ បើយោងតាមលិខិតរបស់រដ្ឋបាលខេត្តសៀមរាប បានជម្រាបជូនលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ថា ៖ ក្នុងរយៈពេលប៉ុន្មានថ្ងៃនេះ មានប្រជាពលរដ្ឋធ្វើដំណើរមកពីបណ្តារាជធានី-ខេត្ត និងក្រៅប្រទេសមកធ្វើការជួបជុំ និងប្រមូលផ្តុំគ្នានៅក្នុងភូមិសាស្ត្រភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ក្នុងគោលបំណង ដើម្បីចូលរួមស្តាប់ការពន្យល់បកស្រាយនូវអ្វី ដែលលោកបានផ្សព្វផ្សាយថា លោកបានធ្វើវិបស្សនាមើលឃើញ និងបំភ្លឺសារជាថ្មីនូវមេរៀនត្រាស់ដឹងរបស់ព្រះសម្មាសម្ពុទ្ធ និងដំណើរនៃធម្មជាតិ(ទឹកជំនន់) ក្រោមការរៀបចំរបស់គណបក្សសម្ព័ន្ធដើម្បីប្រជាធិបតេយ្យ ។ ការជួបជុំនេះ ពុំបានសុំកិច្ចសហការ និងមានការអនុញ្ញាតពីអាជ្ញាធរមានសមត្ថកិច្ចឡើយ និងបានធ្វើឱ្យប៉ះពាល់ដល់សន្តិសុខសណ្តាប់ធ្នាប់សាធារណៈ បរិស្ថាន អនាម័យ និងវិធានការបង្កាប់ស្កាត់ជំងឺកូវីដ-១៩ ។ ដូច្នេះ ដើម្បីកុំឱ្យការប្រមូលផ្តុំ ការជួបជុំ និងការបោះតង់ស្នាក់នៅខាងលើ ធ្វើឱ្យប៉ះពាល់ដល់អនាម័យ បរិស្ថាន ការរីករាលដាល នៃការឆ្លងជំងឺកូវីដ-១៩ និងសុខុមាលភាពរបស់ក្មេង ចាស់ជរា បងប្អូនប្រជាពលរដ្ឋ រដ្ឋបាលខេត្តសៀមរាប ជម្រាបជូន លោកប្រធានគណបក្ស បញ្ឈប់ការប្រមូលផ្ដុំ និងរំសាយការជួបជុំ ចាប់ពីថ្ងៃទី៣០ ខែសីហា ឆ្នាំ២០២២ វេលាម៉ោង ២៤និង០០នាទីយប់ និងរាល់សំណង់ដែលបានសាងសង់ត្រូវដាក់ពាក្យស្នើសុំអនុញ្ញាតពីអាជ្ញាធរមានសមត្ថកិច្ច ។
សូមជម្រាបថា កាលពីរសៀលថ្ងៃទី២៧ ខែសីហា ឆ្នាំ២០២២កន្លងទៅ លោក ទៀ សីហា អភិបាលខេត្តសៀមរាប និងលោក ហ៊ុន ម៉ានិត អគ្គនាយក នៃអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិ បានចុះទៅពិនិត្យផ្ទាល់ ម្ដងរួចមកហើយ ព្រមទាំងបានបញ្ជាឲ្យលោក ខឹម វាសនា បញ្ឈប់សកម្មភាពជួបជុំ និងប្រមូលផ្ដុំក្រុមប្រជាពលរដ្ឋជាបន្ទាន់ ក៏ប៉ុន្តែការបញ្ជានោះត្រូវបានលោក ខឹម វាសនា បដិសេធហើយស្នើសុំពន្យាពេលរហូតដល់ថ្ងៃទី៣០ ខែសីហា ឆ្នាំ២០២២ ។
គួររម្លឹកថា លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានសរសេរនៅលើហ្វេសប៊ុករបស់ខ្លួន ដោយអះអាងនិងតាំងខ្លួនជាតួអង្គព្រហ្មនោះ បានបំផុសបំផុល ប្រជាពលរដ្ឋ ទាំងក្នុងប្រទេស និងក្រៅប្រទេស នូវពាក្យទំនាយថា «បាងកករលំ ភ្នំពេញរលាយ ព្រៃនគរខ្ចាត់ខ្ចាយ សម្បូរសប្បាយនគរវត្ត» ហើយបំភ័យថា នឹងមានគ្រោះរញ្ជួយផែនដី កើតមាន ទឹកជំនន់ ក្នុងពេលឆាប់ៗនេះ ប្រជាពលរដ្ឋត្រូវតែនាំគ្នាប្រញាប់ប្រញាល់ រត់មកជ្រកកោននៅម្តុំដីចំការរបស់គាត់ (ជើងភ្នំគូលែន) នៅខេត្តសៀមរាប ទើបអាចរួចផុតពីគ្រោះមហន្តរាយបាន ។ ដោយលង់នឹងជំនឿបែបនេះ ប្រជាពលរដ្ឋរាប់សិនម៉ឺននាក់ ភាគច្រើនមកពីបណ្តាខេត្តផ្សេងៗ ជាលក្ខណៈគ្រួសារ ដោយមានទាំងក្មេងតូចៗ រួមទាំងមាន ៖ ចាន ឆ្នាំង មុង ភួយ កន្ទេល ខ្នើយ តង់ គោយន្ត ម៉ូតូ រថយន្ត និងរបស់របរប្រើប្រាស់ផ្សេងៗ បានមកជួបជុំនៅទីនោះតាមការឃោសនាបោកប្រាស់ ៕
ចែករំលែកព័តមាននេះ