ប្តីទៅចម្ការ ប្រពន្ធទៅប្រចាំការ យប់ឡើងភ្លើងឆេះផ្ទះអស់
ខេត្តពោធិ៍សាត់ ៖ សេចក្តីរាយការណ៍បានឲ្យដឹងថា កាលពីវេលាម៉ោង១១យប់ ថ្ងៃទី៣១ ខែមករា ឆ្នាំ២០១៧ អគ្គិភ័យបានឆាបឆេះផ្ទះមួយខ្នងនៅភូមិស្ពានថ្ម សង្កាត់រលាប …
ខេត្តពោធិ៍សាត់ ៖ សេចក្តីរាយការណ៍បានឲ្យដឹងថា កាលពីវេលាម៉ោង១១យប់ ថ្ងៃទី៣១ ខែមករា ឆ្នាំ២០១៧ អគ្គិភ័យបានឆាបឆេះផ្ទះមួយខ្នងនៅភូមិស្ពានថ្ម សង្កាត់រលាប ក្រុងពោធិ៍សាត់ ។
ប្រភពនៅកន្លែងកើតហេតុបានឲ្យដឹងថា ម្ចាស់ផ្ទះឈ្មោះ ទូច សុភ័ណ្ឌ ភេទប្រុស អាយុ៦៤ឆ្នាំ មានប្រពន្ធឈ្មោះ កូវ ចាន់ថន អាយុ៥៦ឆ្នាំ ជាបុគ្គលិកពេទ្យនៅមណ្ឌលសុខភាពព្រៃញី ចំណែកផ្ទះដែលត្រូវភ្លើងឆេះអស់ទាំងស្រុងនោះមានទំហំ៨ម៉ែត្រគុណ១២ម៉ែត្រ ធ្វើពីឈើលើថ្មក្រោម ប្រក់ក្បឿង ។
ប្រភពឲ្យដឹងទៀតថា នៅយប់កើតហេតុ បុរសជាប្តីបានទៅធ្វើចម្ការនៅស្រុកភ្នំក្រវាញ ចំណែកប្រពន្ធទៅប្រចាំការនៅមណ្ឌលសុខភាព ដោយនៅផ្ទះមានតែជីដូនអាយុ៨០ឆ្នាំ និងចៅៗ៣នាក់ប៉ុណ្ណោះ ។
សមត្ថកិច្ចបានឲ្យដឹងថា អគ្គិភ័យនេះប្រើប្រាស់រថយន្តពន្លត់អគ្គិភ័យអស់៨គ្រឿង ធំ៤គ្រឿង តូច៤គ្រឿង ដោយបាញ់ទឹកពន្លត់រហូតដល់ម៉ោងជាង១រំលងអាធ្រាត្រឈានចូលថ្ងៃទី១ ខែកុម្ភៈ ទើបអាចទប់ស្កាត់មិនឆេះរាលដាលដល់ផ្ទះអ្នកដទៃបាន តែផ្ទះរងគ្រោះត្រូវបានអគ្គិភ័យឆេះអស់ទាំងស្រុង ។
ប្រភពពីម្ចាស់ផ្ទះរងគ្រោះបានឲ្យដឹងថា សម្ភារៈក្នុងផ្ទះត្រូវបានអគ្គិភ័យឆេះអស់ទាំងស្រុង រួមមាន ទូរទស្សន៍៣គ្រឿង, កុំព្យូទ័រ១គ្រឿង, ទូខោអាវ៣, ម៉ាស៊ីនដេរ១គ្រឿង, កង់៣គ្រឿង, ម៉ាស៊ីនបោកស្រូវ១គ្រឿង, លុយខ្មែរ១លាន៥០ម៉ឺនរៀល, លុយអាមេរិក២០៧៥ដុល្លារ និងគ្រឿងអលង្ការមាស៣តម្លឹង ៕
ចែករំលែកព័តមាននេះ