ADផ្ទាំងផ្សព្វផ្សាយពាណិជ្ជកម្ម

Picture

អភិបាល​ខណ្ឌ​ចុះ​ពិនិត្យ និង​រក​វិធី​រំដោះ​ទឹក​ជន់​កំពុង​លិចលង់​ផ្ទះ​ពលរដ្ឋ​ក្រីក្រ​ជា​ច្រើន​គ្រួសារ

1 ឆ្នាំ មុន
  • ភ្នំពេញ

នៅ​ព្រឹក​ថ្ងៃ​ទី​២២ ខែសីហា ឆ្នាំ​២០២២ លោក ចេ​ង មុនី​រ៉ា អភិបាល នៃ​គណៈ​អភិបាល​ខណ្ឌ​ច្បារ​អំពៅ បាន​ដឹកនាំ​ក្រុម​មន្ត្រី ចុះ​ពិនិត្យ​ជាក់ស្ដែង​នៅ​ភូមិសាស្ត្រ​ដែល​មាន

រាជធានី​ភ្នំពេញ ៖ នៅ​ព្រឹក​ថ្ងៃ​ទី​២២ ខែសីហា ឆ្នាំ​២០២២ លោក ចេ​ង មុនី​រ៉ា អភិបាល នៃ​គណៈ​អភិបាល​ខណ្ឌ​ច្បារ​អំពៅ បាន​ដឹកនាំ​ក្រុម​មន្ត្រី ចុះ​ពិនិត្យ​ជាក់ស្ដែង​នៅ​ភូមិសាស្ត្រ​ដែល​មាន​ពលរដ្ឋ​ក្រីក្រ​ចំនួន​១០​គ្រួសារ រង​គ្រោះ​ដោយសារ​ជំនន់​ទឹកភ្លៀង និង​ប៉ះពាល់​ដល់​ការ​រស់នៅ ស្ថិត​នៅ​ក្នុងភូមិ​ព្រែក​ធំ​២ សង្កាត់​ក្បាលកោះ ខណ្ឌ​ច្បារ​អំពៅ រាជធានី​ភ្នំពេញ ។

ជា​ភាព​ជាក់ស្តែង​ចំពោះ​មុខ​លោក​អភិបាល​ខណ្ឌ បាន​ណែនាំ​ឲ្យ​អាជ្ញាធរ​សង្កាត់ និង​មន្ត្រី​ជំនាញ ព្យាយាម​ធ្វើការ​សម្របសម្រួល​ជាមួយ​ម្ចាស់​ដី​ដែល​នៅ​ព័ទ្ធ​ជុំវិញ​ទីតាំង​ផ្ទះ​ប្រជាពលរដ្ឋ​ក្រីក្រ​ដែល​រង​គ្រោះ​ដោយសារ​ទឹក​លិច​ផ្ទះ​ត្រាំត្រែង ដោយ​ស្នើ​សុំ​ជីក​កាយ​ដី​ធ្វើ​ជា​ប្រឡាយ ដើម្បី​បង្ហូរទឹក​ចេញ ។ ក្នុង​នោះ ដោយ​ធ្វើការ​ធានា​អោយ​បានជា​មួយ​ភាគី​ខាង​ម្ចាស់​ដី​ថា អាជ្ញាធរ នឹង​មិន​បំពាន​ដី​របស់​បងប្អូន​សូ​ម្បី​មួយ​ម៉ែត្រការ៉េ​ឡើយ ហើយ​ទន្ទឹម​នឹង​ការ​ជីក​កាយ​នោះ អាជ្ញាធរ ក៏​នឹង​ធ្វើ​លិខិតធានា​អះអាង​ចំពោះ​ម្ចាស់​ដី ដើម្បី​ទុកជា​ភស្តុ​តាង​បញ្ជាក់​ផង​ដែរ ជៀសវៀង​ម្ចាស់​ដី​គិត​ថា ក្រុម​អាជ្ញាធរ នឹង​មន្ត្រី​ជំនាញ ដែល​កំពុង​ចុះ​រក​ដំណោះស្រាយ​ដោះស្រាយ​ទុក្ខ​លំបាក​ជូន​ពលរដ្ឋ​ក្រីក្រ​នោះ មាន​ចេតនា​គេង​ប្រ​វ័​ញ្ញ ឬ​បន្លំ​ចង់បាន​ដី​របស់​បងប្អូន ។

ក្នុង​ករណី​ដែល​ក្រុម​អាជ្ញាធរ និង​មន្ត្រី​ជំនាញ ដោះស្រាយ​បង្ហូរទឹក​ជន់​លិច ចេញពី​ភូមិ​ពលរដ្ឋ​ក្រីក្រ​រួចរាល់​ហើយ​នោះ អាជ្ញាធរ​នឹង​ធ្វើការ​ចាក់​បំពេញ​ដី​ដែល​បាន​កាយ​ជូន​បងប្អូន​ពលរដ្ឋ​ជា​ម្ចាស់​ដី​វិញ អោយ​បាន​ដូច​ដើម​ផង​ដែរ ។

សូម​បញ្ជាក់​ថា ស្រប​ពេល​ជាមួយ​គ្នា​នោះ លោក​អភិបាល​ធ្វើ​ដំណើរ​លើ​ផ្លូវលំ ចូល​ទៅ​ផ្ទះ​ដែល​រង​គ្រោះ​ដោយសារ​ទឹក​លិច បាន​ពិនិត្យ​ឃើញ​ថា ផ្លូវលំ ពិបាក​ក្នុង​ការ​ធ្វើ​ដំណើរ លោក​អភិបាល​ខណ្ឌ​បាន​ចាត់ចែង​អោយ​ក្រុមការងារ​ដឹក​ក្រួស​ខ្សាច់ យក​មក​ចាក់​បំពេញ​លើ​ផ្លូវ​ជា​បន្ទាន់​ដោយ​ចំណាយ​ថវិកា​ផ្ទាល់ខ្លួន ដើម្បី​កុំ​ឲ្យ​ពិបាក​ក្នុង​ការ​ធ្វើ​ដំណើរ ហើយ​បង្ក​លក្ខណៈ​ងាយស្រួល​ដល់​ប្រជាពលរដ្ឋ​ដែល​ប្រើប្រាស់​ផ្លូវលំ​នេះ ។

លើស​ពី​នេះ​ទៀត លោក​អភិបាល​ខណ្ឌ ក៏​មាន​បំណង​ចង់​ពង្រីក​ផ្លូវលំ​ក្នុងភូមិ​អោយ​បាន​ធំ​ទូលាយ​ផង​ដែរ ទាល់តែ​មានការ​ចូលរួម​ពី​ម្ចាស់​ដី​ដែល​នៅ​អម​សងខាង​ផ្លូវ ប៉ុន្តែ​នៅ​ពេល​នេះ​អាជ្ញាធរ​ត្រូវ​ចាំបាច់​ដោះស្រាយ​បញ្ហា​ប្រឈម​នៅ​ចំពោះ​មុខ​សិន ៕

អត្ថបទសរសេរ ដោយ

កែសម្រួលដោយ