រាជធានីភ្នំពេញ ៖ យុវជនម្នាក់បានទៅដើរលេងជាមួយមិត្តភក្កិរហូតដល់ជិតភ្លឺទើបត្រលប់មកវិញ ត្រូវក្រុមចោរឆ្កឹះសោរទ្វារដែកបន្ទប់ផ្ទះជួលយកម៉ូតូ១គ្រឿងទៅបាត់ដោយសុវត្ថិភាព។ ហេតុការណ៍ចោរគាស់ផ្ទះនេះបង្កឲ្យមានការភ្ញាក់ផ្អើលកាលពីវេលាម៉ោង៣ និង៥០នាទីទាបភ្លឺ ថ្ងៃទី២០ ខែមករា ឆ្នាំ ២០១៧ នៅចំណុចបន្ទប់ជួលលេខ៦ ផ្លូវបេតុង ភូមិទួលសង្កែ ខណ្ឌឬស្សីកែវ។ ម្ចាស់ម៉ូតូឈ្មោះ ភាព វិនណា ភេទប្រុស អាយុ២០ឆ្នាំ ជាអ្នកបញ្ចូលបទភ្លេងទូរស័ព្ទ ស្នាក់នៅបន្ទប់ជួលកើតហេតុខាងលើ និងមានស្រុកកំណើតនៅភូមិបន្ទាយអង្ក្រង ឃុំអង្លុង ត្នោត ស្រុកគគរ ខេត្តពោធិ៍សាត់ ម៉ូតូដែលក្រុមចោរធ្វើសកម្មភាពលួចយកទៅនោះម៉ាក ZOOMER-X ស៊េរីឆ្នាំ២០១៦ ពណ៌ទឹកប៊ិច ពាក់ស្លាកលេខភ្នំពេញ1FZ-0157។
តាមសម្ដីម្ចាស់ម៉ូតូបានឱ្យដឹងថា នៅវេលាម៉ោង១០យប់ ថ្ងៃទី១៩ ខែមករា ខ្លួន បានណាត់មិត្តភក្កិនាំគ្នាទៅដើរលេង មិនទាន់បានទៅផងស្រាប់តែម៉ូតូម៉ាក់ ZOOMER-X បែកកង់ហើយបានអូសម៉ូតូចូលទុកក្បែរ និងម៉ូតូម៉ាកស៊ុយហ្សុយគីវីវ៉ា នៅក្នុងជួល រួចចាក់សោរទ្វារបន្ទប់ជួលត្រឹមត្រូវ ហើយក៏បានជិះម៉ូតូមិត្តភក្កិនាំគ្នាដើរលេងបាត់ទៅ។ តាមព័ត៌មានឲ្យដឹងថា លុះនៅវេលាម៉ោងប្រមាណ៣ និង៥០នាទីទាបភ្លឺក៏បានត្រលប់មកវិញត្រូវចោរគាស់បន្ទប់ជួល ហើយយកម៉ូតូអស់មួយគ្រឿង ម៉ាកZOOMER-X ទៅបាត់។ នៅវេលាព្រឹកឡើង ក៏បាននាំគ្នាទៅប្តឹងនគរបាលដើម្បីឲ្យជួយរកម៉ូតូត្រលប់មកវិញ៕
ចែករំលែកព័តមាននេះ