ខេត្តត្បូងឃ្មុំ ៖ ម្ចាស់ស្រែម្នាក់ឈ្មោះ ហេន អាន ភេទប្រុស អាយុ៣១ឆ្នាំ មានទីលំនៅភូមិជើងច្រង់ ឃុំទួលស្នួល ស្រុកក្រូឆ្មារ បានភ្លាត់ស្នៀតដើរទៅទាក់ខ្សែលួសដាក់សម្រាប់ឆក់កណ្តុរ
ខេត្តត្បូងឃ្មុំ ៖ ម្ចាស់ស្រែម្នាក់ឈ្មោះ ហេន អាន ភេទប្រុស អាយុ៣១ឆ្នាំ មានទីលំនៅភូមិជើងច្រង់ ឃុំទួលស្នួល ស្រុកក្រូឆ្មារ បានភ្លាត់ស្នៀតដើរទៅទាក់ខ្សែលួសដាក់សម្រាប់ឆក់កណ្តុរ បណ្តាលឲ្យឆក់ ស្លាប់តែម្តង ដោយមិនមានអ្នកណាដឹងទេភ្លាមៗនោះ។ ហេតុការណ៍នេះត្រូវបានប្រជាពលរដ្ឋប្រទះឃើញ នៅវេលាម៉ោង៤រសៀល ថ្ងៃទី១៩ មករា ២០១៧ ដែលស្ថិតនៅក្នុងស្រែរបស់ខ្លួនតែម្តង។
ប្រភពពីនគរបាលនៃអធិការដ្ឋាននគរបាលស្រុកក្រូចឆ្មារ ប្រាប់ឲ្យដឹងថា ដោយសារតែមានសត្វកណ្តុរច្រើនពេកដែលតែងតែមកស៊ីផលដំណាំរបស់ប្រជាកសិករនោះ ទើបបុរសខាងលើបានរៀបចំអន្ទាក់ដាក់ប្រដាប់ឆក់ដើម្បីការពារស្រូវកុំឲ្យកណ្តុរមកចូលស៊ីបំផ្លាញ ទើបនៅវេលាម៉ោង៤រសៀល ថ្ងៃទី១៨ មករា ក៏បានយកសម្ភារប្រដាប់ឆក់មកចងព័ទ្ធជុំវិញស្រែ។
នគរបាលស្រុកក្រូចឆ្មារ ប្រាប់បន្តទៀតថា ប៉ុន្តែទំនងជាចៃដន្យបុរសឈ្មោះ អាន បានដើរទាក់ខ្សែលួសនៅលើភ្លឺស្រែជាហេតុបណ្តាលឲ្យឆក់ជាប់ ហើយស្លាប់ រីឯម្រាមដៃក៏ត្រូវបានឆក់ដាច់ឡើងខ្លោចតែម្តង ព្រោះថាឧបករណ៍នោះ ត្រូវបានគេបំលែងចេញពីភ្លើងអាគុយដែលមានឋាមពលរហូតដល់ទៅជិត៣០០វ៉ុល ហេតុនេះហើយមានខ្លាំងទាំងមនុស្ស និងសត្វឲ្យតែដើរឬវារមកប៉ះនឹងត្រូវឆក់ស្លាប់តែម្តង។
លុះរហូតដល់វេលាម៉ោង៤រសៀលថ្ងៃទី១៩ មករា មានប្រជាពលរដ្ឋឈ្មោះ សុខ នៅ បានដើរកាត់តាមត្រង់វាលស្រែនោះ ស្រាប់តែប្រទះឃើញសពម្ចាស់ស្រែ ក៏ប្រញាប់រាយការណ៍មកសមត្ថកិច្ចជាបន្ទាន់ដើម្បីចុះមកពិនិត្យកោសល្យវិច្ច័យ ។ ចំពោះលទ្ធផលឃើញថាបុរសម្ចាស់ស្រែនេះពិតជាបានស្លាប់ដោយសារតែឆក់ខ្សែលួសរាយ ជុំវិញស្រែនៅចំនណុចបឹងចាអោក ដោយពិតប្រាកដមែន សពត្រូវបានសមត្ថកិច្ចប្រគល់ជូនសាច់ញាតិ ដើម្បីរៀបចំធ្វើបុណ្យតាមប្រពៃណីផងដែរ៕
ចែករំលែកព័តមាននេះ