ភ្នំពេញ៖ រដ្ឋបាលរាជធានីភ្នំពេញ បានជំរុញអោយអភិបាលខណ្ឌទាំង១៤ និងមន្ទីរពាក់ព័ន្ធមួយចំនួនទៀត ធ្វើយ៉ាងបន្តចលនាប្រជាពលរដ្ឋ អោយពួកគាត់ ទៅទទួលការចាក់វ៉ាក់សាំងការពារជំងឺកូវីដ-១៩ អោយបានលឿន និងគ្រប់គ្នា ពិសេសការចាក់ដូសជំរុញ ដូសទី៥ ខណៈដែលជំងឺកូវីដ-១៩ ហាក់ដូចជា មានការកម្រើកឆ្លងឡើងវិញ។
លោក ហួត ហៃ អភិបាលរងរាជធានីភ្នំពេញ តំណាងឲ្យលោកឃួង ស្រេង អភិបាលរាជធានីភ្នំពេញ បានដឹកនាំកិច្ចប្រជុំត្រួតពិនិត្យការងារចាក់វ៉ាក់សាំងការពារជំងឺកូវីដ-១៩ ជាមួយលោកស្រី កែវ សុខពិសី អភិបាលរងរាជធានីភ្នំពេញ ប្រជុំជាមួយអាជ្ញាធរខណ្ឌទាំង១៤ និងមន្ទីរពាក់ព័ន្ធ នារសៀលថ្ងៃទី១៦ ខែសីហា ឆ្នាំ២០២២ នៅសាលារាជធានីភ្នំពេញ។
លោក ហួត ហៃ បានមានប្រសាសន៍ថា ជំងឺកូវីដ-១៩ ជាជំងឺរាតត្បាត ដែលមានលក្ខណៈកាចសាហាវ ដោយនៅរាជធានីភ្នំពេញ ជំងឺនេះ ក៏បានសម្លាប់មនុស្ស និងឆ្លងរាលដាលខ្លាំងផងដែរ។ ប៉ុន្តែដោយសារឥទ្ធិពលនៃការវ៉ាក់សាំង ទើបមិនធ្វើអោយមនុស្សស្លាប់ច្រើននោះទេ។ ដូច្នេះទេ លោកជំរុញអោយអភិបាលខណ្ឌទាំង១៤ និងមន្ទីរពាក់ព័ន្ធមួយចំនួនទៀត ធ្វើយ៉ាង បន្តចលនាប្រជាពលរដ្ឋអោយពួកគាត់ ទៅទទួលការចាក់វ៉ាក់សាំងការពារជំងឺកូវីដ-១៩ អោយបានលឿន និងគ្រប់គ្នា ពិសេសការចាក់ដូសទី៥ ខណៈដែលជំងឺកូវីដ-១៩ ហាក់ដូចជា កម្រើកឆ្លងឡើងវិញ។
លោកបន្តជំរុញអោយអភិបាលខណ្ឌទាំង១៤ ចុះស្រង់ស្ថិតិប្រជាពលរដ្ឋ ដែលចាក់វ៉ាក់សាំង អោយបានច្បាស់លាស់ ជាមួយនឹងការដាក់ផែនការចាក់វ៉ាក់សាំង ទៅដល់សហគមន៍ក្រីក្រ ដល់វត្តអារាម សាលារៀននិងដល់តាមរោងចក្រផងដែរ។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានលើកឡើងក្នុងកិច្ចប្រជុំថា នៅរាជធានីភ្នំពេញ ខណៈជំងឺកូវីដ-១៩ កំពុងផ្ទុះខ្លាំង ប្រជាពលរដ្ឋបានសម្រុកនាំគ្នា ទៅទទួលការចាក់វ៉ាក់សាំងយ៉ាងច្រើនកកកុញ ទៅទីតាំងទាំង៤១ ដែលយើងបានរៀបចំ។ តែសម្រាប់ពេលនេះ ការទៅទទួលការចាក់វ៉ាក់សាំង មានការថយចុះ បើទោះបីយើងមានការផ្សព្វផ្សាយ និងរហូតដល់ក្រុមការងារស្ពាយវ៉ាក់សាំង ទៅចាក់ដល់ខ្នងផ្ទះ ដល់វត្តអារាមក៏ដោយ ដែលកិច្ចការងារនេះ យើងត្រូវរួមគ្នា ដើម្បីធ្វើយ៉ាងណាជំរុញអោយពួកគាត់ស្ម័គ្រចិត្តទៅទទួលការចាក់វ៉ាក់សាំងដូសជំរុញនេះ អោយបានគ្រប់គ្នា។
សូមរម្លឹកថា កន្លងមក និងមកដល់ពេលនេះ ដោយសារតែជំងឺកូវីដ១៩ ឆ្លងរាលដាលតិចតួច ហើយអ្នកឆ្លងក៏ហាក់ដូចជាមិនធ្ងន់ធ្ងរ ពោលគឺឈឺដូចផ្តាសាយធម្មតាសព្វថ្ងៃ។ ដូច្នេះហើយ ទើបមានអ្នកយល់ឃើញថា ចាក់វ៉ាក់សាំង ដល់ទៅ ៥ដូស ក៏នៅតែឆ្លងកូវីដ។ ប៉ុន្តែសូមកុំភ្លេចថា ដោយសារតែអ្នកបានចាក់វ៉ាក់សាំង ពិសេសចាក់បានដល់ ៥ដូសនេះហើយ ទើបឆ្លងកូវីដ ក៏កូវីដនោះ ហាក់ក្លាយជាជំងឺផ្តាសាយធម្មតា ហើយត្រឹមតែ ៣ថ្ងៃ ទៅ ៥ថ្ងៃ ក៏ជាសះស្បើយមកវិញ។ ដូច្នេះយើងម្នាក់ៗ គួរតែទៅចាក់វ៉ាក់សាំងកូវីដ ព្រោះចាក់មិនអស់លុយ ហើយក៏មិនធ្វើទុក្ខអ្វីឡើយ តែបានជួយយើងច្រើន ពិសេសបើឆ្លងកូវីដ ក៏ឈឺស្រាល ដូចជំងឺផ្តាសាយប៉ុណ្ណោះ៕
ចែករំលែកព័តមាននេះ