ខេត្តបន្ទាយមានជ័យ ៖ ជំនន់ទឹកភ្លៀងបានបង្កជន់លិចមួយប៉ព្រិចភ្នែកនូវទីតាំង និងហេដ្ឋារចនាសម្ព័ន្ធមួយចំនួនក្នុងក្រុងប៉ោយប៉ែត បន្ទាប់ពីមានភ្លៀងធ្លាក់មកខ្លាំង តាំងពីវេលាម៉ោងជិត៤រសៀលរហូតដល់យប់ទើបរាំង ។ ជាក់ស្តែង នៅព្រឹកថ្ងៃទី១៦ សីហា…
ខេត្តបន្ទាយមានជ័យ ៖ ជំនន់ទឹកភ្លៀងបានបង្កជន់លិចមួយប៉ព្រិចភ្នែកនូវទីតាំង និងហេដ្ឋារចនាសម្ព័ន្ធមួយចំនួនក្នុងក្រុងប៉ោយប៉ែត បន្ទាប់ពីមានភ្លៀងធ្លាក់មកខ្លាំង តាំងពីវេលាម៉ោងជិត៤រសៀលរហូតដល់យប់ទើបរាំង ។ ជាក់ស្តែង នៅព្រឹកថ្ងៃទី១៦ សីហា នេះ នៅតាមដងផ្លូវបេតុងមួយចំនួន និងចំណតរថយន្តក្រុង រងការជន់លិចនៅឡើយ តែកន្លែងខ្លះបានស្រកទៅវិញបណ្តើៗហើយ ខណៈអូរព្រំដែនទឹកមិនទាន់ឡើងខ្លាំងនៅឡើយ។
នាព្រឹកថ្ងៃដដែល ឃើញលោកគាត ហ៊ុល អភិបាលក្រុងប៉ោយប៉ែត បានដឹកនាំមន្ត្រី និងសមត្ថកិច្ចពាក់ព័ន្ធចុះពិនិត្យមើលទឹកអូរព្រំដែន និងចំណុចមួយចំនួនទៀត ដើម្បីរិះរកវិធីត្រៀមទុកជាមុនប្រសិនបើពលរដ្ឋជួបនូវគ្រោះធម្មជាតិជំនន់ទឹកភ្លៀង ឬទឹកជំនន់ហូរមកពីប្រទេសថៃ ។
សូមរំលឹកថា ដោយសារព្រះភិរុណបង្អុរខ្លាំង តាំងពីថ្ងៃរហូតដល់យប់នៅថ្ងៃទី១៥ ខែសីហា ឆ្នាំ២០២២ បង្កឱ្យតំបន់មួយចំនួន ក្នុងទីប្រជុំជនក្រុងប៉ោយប៉ែត មានជំនន់ទឹកភ្លៀងជាបណ្តើរៗហើយ។ កន្លងមក ភាគីថៃ បានជូនដំណឹងដល់អាជ្ញាធរកម្ពុជា នៅជាប់ព្រំដែនខេត្តស្រះកែវ ដោយប្រកាសថា នៅប្រទេសថៃ មានភ្លៀងខ្លាំង ជិតដល់កម្រិតប្រកាសអាសន្នហើយ ដូច្នេះខាងកម្ពុជា ពិសេសអ្នករស់នៅស្រុកក្រុងជាប់ព្រំដែនថៃ ត្រូវមានការប្រុងប្រយ័ត្ន។
មកដល់ព្រលប់ថ្ងៃទី១៥សីហា ទឹកអូរព្រំដែនកម្ពុជា-ថៃ ចំណុចប៉ោយប៉ែត បានហក់ឡើងជិតដល់មាត់អូរហើយ។ កន្លងមក អាជ្ញាធរ បានរៀបចំប្រព័ន្ធបង្ហូរទឹកធ្លាក់ទៅអូរព្រំដែន បានច្រើនខ្សែ។ ប៉ុន្តែរហូតដល់ម៉ោង៩យប់ថ្ងៃទី១៥សីហា ភ្លៀងនៅប៉ោយប៉ែត មិនទាន់រាំងនៅឡើយទេ ខណៈផ្លូវខ្លះ ត្រូវទឹកលិច ហើយពលរដ្ឋបើកបរម៉ូតូឡាន វាងរកផ្លូវ មិនសូវលិចខ្លាំង ។
ចែករំលែកព័តមាននេះ