ស្ត្រីញៀនល្បែង៥នាក់ត្រូវបានចាប់ខ្លួន
ខេត្តប៉ៃលិន ៖ បន្ទាប់ពីមានការណែនាំពីរាជរដ្ឋាភិបាលក៏ដូចជាថ្នាក់ដឹកនាំខេត្តកាលពីថ្មីៗកន្លងទៅនេះ ដោយធ្វើយ៉ាងណាត្រូវតែចុះបង្ក្រាបល្បែងស៊ីសងនៅតាមភូមិនានា …
ខេត្តប៉ៃលិន ៖ បន្ទាប់ពីមានការណែនាំពីរាជរដ្ឋាភិបាលក៏ដូចជាថ្នាក់ដឹកនាំខេត្តកាលពីថ្មីៗកន្លងទៅនេះ ដោយធ្វើយ៉ាងណាត្រូវតែចុះបង្ក្រាបល្បែងស៊ីសងនៅតាមភូមិនានាឱ្យខាងតែបាន ទើបរហូតមកដល់ពេលនេះសមត្ថកិច្ចនគរបាល នៃស្នងការដ្ឋាននគរបាលខេត្តប៉ៃលិន ក្រោមបញ្ជារបស់លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្ត កាលពីវេលាម៉ោង៤រសៀល ថ្ងៃទី១៦ ខែមករា ឆ្នាំ២០១៧ បានដឹកនាំមន្ត្រីក្រោមឱវាទ ដុតដៃដុតជើងចុះបង្ក្រាបចាប់បានក្រុមស្ត្រីញៀនល្បែង(បៀរ) នៅចំណុចដីថ្មី ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពពីសមត្ថកិច្ចបានឲ្យដឹងថា យោងតាមគោលនយោបាយភូមិ-ឃុំមានសុវត្ថិភាពចំនួន៩ចំណុចរបស់រាជរដ្ឋាភិបាលនៅក្នុងចំណុចទី០៥ បានកំណត់ថា គ្មានការលេងល្បែងស៊ីសងគ្រប់ប្រភេទ ហើយដោយមានការចង្អុលបង្ហាញពីលោកឧត្តមសេនីយ៍ ជា ចាន់ឌិន ស្នងការនគរបាលខេត្ត ទទួលបញ្ជាផ្ទាល់ពីលោកវរសេនីយ៍ឯក អ៊ីវ គឹមស៊ាន ស្នងការរងទទួលបន្ទុកផែនព្រហ្មទណ្ឌ និងក្រោមការសម្របសម្រួលពីលោកព្រះរាជអាជ្ញារង ថុល គឹមហ៊ឹង ដែលដឹកនាំកម្លាំងផ្ទាល់ពីលោកវរសេនីយ៍ឯក ឆម វ៉ាន់ធី ប្រធានក្រុមបង្ក្រាបល្បែងស៊ីសងគ្រប់ប្រភេទក្នុងខេត្តប៉ៃលិន ទើបមន្ត្រីក្រោមឱវាទចុះធ្វើការបង្ក្រាបចាប់បានស្ត្រីញៀនល្បែងស៊ីសងតែម្តង ។
ប្រភពបន្តទៀតថា ជាលទ្ធផលសមត្ថកិច្ចដកហូតបានបៀ១ហ៊ូ និងឃាត់ខ្លួនអ្នកលេងបៀ៥នាក់ ១-ឈ្មោះ ផន ធា ភេទស្រី អាយុ៣៣ឆ្នាំ, ២-ឈ្មោះ ម៉ាក សា ភេទស្រី អាយុ៥៧ឆ្នាំ, ៣-ឈ្មោះ កង នាង ភេទស្រី អាយុ៦៧ឆ្នាំ, ៤-ឈ្មោះ ប៊ុន សុខលីនដា ភេទស្រី អាយុ២៩ឆ្នាំ និង៥-ឈ្មោះ សុខ វណ្ណី ភេទស្រី អាយុ៥៥ឆ្នាំ ។ អ្នកទាំង៥នាក់នេះរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ទោះបីជាយ៉ាងណា ក្រោយពីធ្វើការឃាត់ខ្លួន និងសាកសួរបំភ្លឺរួចមក អ្នកទាំង៥នាក់បានសារភាពថា ពួកគាត់ ពិតជាបានលេងល្បែងពិតប្រាកដមែន ហើយបច្ចុប្បន្នសមត្ថកិច្ចនគរបាលបានឲ្យធ្វើកិច្ចសន្យារាងចាល និងធ្វើការផាកពិន័យ រួចអប់រំឱ្យវិលត្រឡប់ទៅផ្ទះវិញ ។
សូមបញ្ជាក់ផងដែរថា ល្បែងស៊ីសងកំពុងរីកដុះដាលនៅក្នុងខេត្តប៉ៃលិន បើទោះបីជាសមត្ថកិច្ចចុះបង្ក្រាបជាញឹកញាប់ក៏ដោយ ក្នុងនោះមានល្បែងស៊ីសងកន្ទុយលេខ(ឆ្នោត) បៀ អាប៉ោង ហើយក៏មានអ្នកខ្លះយកអាប៉ោងទៅលេងនៅក្នុងកាស៊ីណូផងដែរ ខណៈច្បាប់ហាមមិនឱ្យខ្មែរចូលលេងនោះ ៕
ចែករំលែកព័តមាននេះ