តារាហូលីវូដ នាង Anne Heche មិនរំពឹងរស់រានមានជីវិត ក្រោយជួបគ្រោះដ៏រន្ធ.ត់
អាមេរិក ៖ តារាសម្តែងអាមេរិកនាង Anne Heche មិនត្រូវបានរំពឹងថានឹងរស់រានមានជីវិតឡើយ
អាមេរិក ៖ តារាសម្តែងអាមេរិកនាង Anne Heche មិនត្រូវបានរំពឹងថានឹងរស់រានមានជីវិតឡើយ
អាមេរិក ៖ តារាសម្តែងអាមេរិកនាង Anne Heche មិនត្រូវបានរំពឹងថានឹងរស់រានមានជីវិតឡើយ បន្ទាប់ពីជួបគ្រោះថ្នាក់ចរាចរណ៍ដ៏រន្ធត់កាលពីថ្ងៃសុក្រសប្តាហ៍មុន ដែលបណ្តាលឱ្យរថយន្តនាងឆាបឆេះយ៉ាងសន្ធោសន្ធៅ។ នេះបើតាមការអះអាងដោយផ្ទាល់ពីសំណាក់គ្រួសារតារាសម្តែងហូលីវូដរូបនេះ។
បច្ចុប្បន្ន Heche នៅតែស្ថិតក្នុងស្ថានភាពសន្លប់បាត់បង់ស្មារតី ហើយមានរបួសខួរក្បាលធ្ងន់ធ្ងរ ខណៈខួរក្បាលកំពុងខ្វះអុកស៊ីសែន។ នៅក្នុងសេចក្តីថ្លែងការណ៍មួយពីគ្រួសាររបស់ Heche តាមរយៈអ្នកតំណាងម្នាក់ កាលពីថ្ងៃទី១១ ខែសីហា កន្លងទៅ បានឱ្យដឹងថា Heche បានរងរបួសខួរក្បាលធ្ងន់ធ្ងរ ហើយឥឡូវនេះ នាងកំពុងត្រូវបានរក្សាការជួយជីវិតដើម្បីកំណត់ថា តើសរីរាង្គរបស់នាងមានលទ្ធភាពសម្រាប់ការបរិច្ចាគដែរឬទេ? ហើយដែលនេះគឺជាជម្រើសរបស់នាងជាយូរណាស់មកហើយ ក្នុងការបរិច្ចាគសរីរាង្គរបស់នាង។
សេចក្តីថ្លែងការណ៍បានបន្ថែមថា យើងចង់អរគុណអ្នកគ្រប់គ្នាចំពោះការអធិស្ឋានដ៏សប្បុរស និងសូមអរគុណបុគ្គលិកពេទ្យទាំងអស់ដែលខិតខំប្រឹងប្រែង និងគិលានុបដ្ឋាយិកាដ៏អស្ចារ្យដែលបានមើលថែនាងនៅមជ្ឈមណ្ឌល Grossman Burn នៃមន្ទីរពេទ្យ West Hills។
គួររំលឹកថា នៅវេលាថ្ងៃត្រង់ ថ្ងៃទី៥ ខែសីហា ឆ្នាំ២០២២ តារាសម្តែងស្រី Anne Heche បានជួបឧប្បត្តិហេតុគ្រោះថ្នាក់រថយន្តដ៏រន្ធ.ត់ ខណៈកំពុងធ្វើដំណើរតាមផ្លូវមួយក្នុងសង្កាត់ Mar Vista នៃទីក្រុង Los Angeles សហរដ្ឋអាមេរិក។ ស្ថិតក្នុងការបើកបរល្បឿនលឿនខ្លាំង ភ្លាមៗនោះ រថយន្ត Mini Cooper របស់តារាស្រីវ័យ៥៣ឆ្នាំរូបនេះ ស្រាប់តែបាត់បង់ការគ្រប់គ្រង ហើយបានបុ.កចូលទៅក្នុងយានដ្ឋាននៃអគារផ្ទះល្វែងមួយកន្លែង។ ហើយក៏បន្តទៅបុ.កផ្ទះមួយខ្នងទៀត បណ្តាលឱ្យរថយន្តឆេះយ៉ាងសន្ធោសន្ធៅតែម្តង។ Heche ត្រូវបានជួយសង្គ្រោះចេញពីរថយន្តកំពុងឆាបឆេះ មុនពេលបញ្ជូនទៅកាន់មន្ទីរពេទ្យ។
បច្ចុប្បន្ននាយកដ្ឋានប៉ូលិស Los Angeles កំពុងស៊ើបអង្កេតអំពីមូលហេតុនៃគ្រោះថ្នាក់នេះ ដោយប៉ូលិសដាក់ការសង្ស័យតួឯកស្រីក្នុងខ្សែភាពយន្ត «Six Days, Seven Nights» ដ៏ល្បីល្បាញរូបនេះ បើកបរក្នុងស្ថានភាពស្រវឹង៕ (ដកស្រង់ចេញពី BBC CNN និង The Guardian)
ចែករំលែកព័តមាននេះ