ប្រទេសកូរ៉េខាងត្បូង ៖ តម្លៃគ្រឿងទេសសម្រាប់ធ្វើម្ហូបកំពុងតែកើនឡើងយ៉ាងខ្លាំង និងដាក់សម្ពាធដល់គ្រួសារនៅតាមផ្ទះខ្លាំងឡើង ។
យោងតាមទិន្នន័យពីស្ថាប័នកសិដ្ឋានជលផល និងពាណិជ្ជកម្មអាហារឲ្យដឹងថា តម្លៃផលិតផលកសិផលបានកើនឡើងខ្លាំងក្នុងឆ្នាំនេះ ព្រោះកសិករបានជួបប្រទះនឹងខ្យល់ព្យុះ និងអាកាសធាតុក្តៅអស់ជាច្រើនសប្តាហ៍នាឆ្នាំមុន ។
ការកើនឡើងនៃតម្លៃនេះ បានកើតឡើងខណៈមានការព្រួយបារម្ភពីតម្លៃពងមាន់ និងផលិតផលធ្វើពីពងមាន់ ព្រោះតែមានកង្វះខាតការផ្គត់ផ្គង់ ។
យោងតាមក្រសួងអាហារ កសិកម្ម រុក្ខាប្រមាញ់ និងជលផលឲ្យដឹងថា ការរីកសាយ នៃជំងឺផ្តាសាយបក្សីបានធ្វើឲ្យសត្វមាន់ ប្រមាណ៣២% ត្រូវបានសម្លាប់ចោល។ ហេតុនេះ តម្លៃពងមាន់បានកើនឡើងដល់៤៧%ឯណោះក្នុងខែមុន ។ ការកើនឡើងនៃតម្លៃផលិតផលកសិផលនេះនឹងបង្កឲ្យមានការរអ៊ូរទាំបន្ថែមពីគ្រួសារ ខណៈបុណ្យចូលឆ្នាំចិនកំពុងខិតជិតមកដល់ ។
ដើម្បីកាត់បន្ថយការឡើងថ្លៃនៃពងមាន់ រដ្ឋាភិបាលបានសម្រេចកាលពីសប្តាហ៍មុនថា នឹងដកពន្ធនាំចូលពងមាន់ចេញជាបណ្តោះអាសន្នចាប់ពីថ្ងៃពុធនេះតទៅ ។ តម្លៃសាច់ក៏បានឡើងថ្លៃផងដែរ ដោយឆ្អឹងជំនីគោកូរ៉េបានកើនឡើង១៩,៩% បើធៀបនឹងឆ្នាំមុន ។ តម្លៃសាច់គោនាំចូលកើនឡើងពី៦ដល់១៣%ក្នុងឆ្នាំនេះ ។ ចំណែកតម្លៃពោះជ្រូកកូរ៉េបានកើនឡើង៧,៥% បើធៀបនឹងឆ្នាំមុន ។
ជាមួយគ្នានេះ សម្រាប់ត្រីក៏កំពុងផ្តល់សញ្ញាថា នឹងឡើងថ្លៃថែមទៀតផងដែរ ៕
ចែករំលែកព័តមាននេះ