រាជធានីភ្នំពេញ ៖ សន្តិសុខឯកជនម្នាក់ បានប្រទះឃើញបុរសម្នាក់ជិះម៉ូតូមួយគ្រឿងយកទៅមកប្លុងទុកចោល អស់រយៈពេលជាច្រើនម៉ោង មិនឃើញមកយកវិញ ក៏ទៅប្តឹងសមត្ថកិច្ចមកយកទៅរក្សាទុក កាលពីវេលាម៉ោង១រំលងអធ្រាត្រឈានចូលថ្ងៃទី១០ មករា នេះ ស្ថិតត្រង់ចំណុចផ្លូវ៧១ កែងមហាវិថីម៉ៅសេទុង ក្នុងសង្កាត់បឹងកេងកងទី១ ខណ្ឌចំកាមន ។
បើកតាមការអះអាងពីសន្តិសុខម្នាក់ យាមនៅក្បែរកន្លែងកើតហេតុខាងលើ សុំមិនបញ្ចេញឈ្មោះបានឱ្យដឹងថា មុនដំបូងគាត់ឃើញបុរសម្នាក់ជាងអាយុ២០ឆ្នាំ ពាក់ម៉ាសនិងពាក់មួកសុវត្ថិភាព បានជិះម៉ូតូមកឈប់នៅចំណុចខាងលើ តាំងពីម៉ោង១០ និង៣០នាទីយប់ថ្ងៃទី៩ មករា ម្ល៉េះ ដោយមានបុរសម្នាក់ទៀតជិះម៉ូតូមួយគ្រឿង មិនចាំម៉ាកបានមកឌបបុរសខាងលើ ជិះចេញទៅបាត់ទៅបន្សល់ទុកម៉ូតូមួយគ្រឿងម៉ាកហុងដាឌ្រីមប្រើប៉ិច ពណ៌ខ្មៅ ពាក់ស្លាក់លេខភ្នំពេញ១C៣៤៦៤ និងទុកសោម៉ូតូនៅជាប់ម៉ូតូថែមទៀតផង ។
លុះដល់វេលាកើតហេតុខាងលើមិនឃើញមានអ្នកណាមកយកម៉ូតូត្រលប់ទៅវិញទៀត ទើបគាត់សម្រេចចិត្តទូរស័ព្ទហៅនគរបាលប៉ុស្តិ៍បឹងកេងកងទី១អោយមកយកម៉ូតូខាងលើទៅរក្សាទុករងចាំម្ចាស់មកទទួលយកវិញ។
ក្រោយពេលកើតហេតុ សមត្ថកិច្ចបានយកម៉ូតូខាងលើ ទៅរក្សាទុកនៅប៉ុស្តិ៍នគរបាលបឹងកេងកងទី១ រង់ចាំម្ចាស់មកទទួលយកត្រលប់ទៅវិញ ។ ដូច្នេះ បើបងប្អូនណាបានបាត់ម៉ូតូ សូមយកឯកសារមកបង្ហាញ និងទទួលយកវិញនៅប៉ុស្តិ៍នគរបាលបឹងកេងកងទី១ ។
ចែករំលែកព័តមាននេះ