ភ្នំពេញ៖ លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ បានជួបពិភាក្សាការងារទ្វេភាគីជាមួយ​លោក ហាយ៉ាហ្ស៊ី យ៉ូហ្ស៊ីម៉ាសា (HAYASHI Yoshimasa) រដ្ឋមន្រ្តីការបរទេសជប៉ុន នៅថ្ងៃទី៤ ខែសីហា ឆ្នាំ២០២២ នៅក្នុងឱកាសនៃកិច្ចប្រជុំរដ្ឋមន្រ្តី​ការបរទេស លើកទី៥៥ និងកិច្ចប្រជុំពាក់ព័ន្ធ ក្នុងក្របខ័ណ្ឌអាស៊ាន នៅភ្នំពេញ។

ក្រសួងការបរទេស ប្រកាសថា រដ្ឋមន្រ្តីការបរទេសទាំងពីរ បានឯកភាព​ពង្រឹងបន្ថែមទៀតនូវ​ទំនាក់ទំនង​មិត្តភាព​​ និង​កិច្ចសហប្រតិបត្តិការ​យ៉ាងជិតស្និទ្ធ ខណៈឆ្នាំក្រោយ​ជា​ខួប​អនុស្សា​វរី​យ៍​ លើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។ ​លោករដ្ឋមន្រ្តីការបរទេស យ៉ូហ្ស៊ីម៉ាសាបានគូសបញ្ជាក់ថា ជប៉ុនកំពុងពិចារណាលើសំណើរបស់សម្តេចតេជោ​នាយករដ្ឋមន្រ្តី ហ៊ុន សែន ក្នុងការលើកកម្ពស់ភាព​ជាដៃគូយុទ្ធសាស្រ្ត ទៅកម្រិតថ្មីមួយ ដើម្បីរំលឹកខួបអនុស្សា​វរី​យ៍ខាងលើ​។