ADផ្ទាំងផ្សព្វផ្សាយពាណិជ្ជកម្ម

Picture

រដ្ឋមន្ត្រី​ការ​បរទេស​ជប៉ុន​ឆ្លុះ​បញ្ចាំង​សារសំខាន់​ទំនាក់ទំនង​ជប៉ុន​ជាមួយ​កម្ពុជា និង​អាស៊ាន

1 ខែ មុន

រាជធានី​ភ្នំពេញ ៖ ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី (Yoshimasa Hayashi) រដ្ឋមន្ត្រី​ក្រសួងការបរទេស​ជប៉ុន​នឹង​មក​ចូលរួម​កិច្ចប្រជុំ​ពាក់ព័ន្ធ​អាស៊ាន​នៅ​ស​ប្តា​ហ៍​នេះ ។ នៅ​ក្នុង​កិច្ច​សម្ភាសន៍​ជាមួយ​សារព័ត៌មាន​កោះសន្តិភាព…

រាជធានី​ភ្នំពេញ ៖ ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី (Yoshimasa Hayashi) រដ្ឋមន្ត្រី​ក្រសួងការបរទេស​ជប៉ុន​នឹង​មក​ចូលរួម​កិច្ចប្រជុំ​ពាក់ព័ន្ធ​អាស៊ាន​នៅ​ស​ប្តា​ហ៍​នេះ ។ នៅ​ក្នុង​កិច្ច​សម្ភាសន៍​ជាមួយ​សារព័ត៌មាន​កោះសន្តិភាព ឯកឧត្តម​រដ្ឋមន្ត្រី បាន​ឆ្លុះ​បញ្ចាំង​អំពី​សារសំខាន់​នៃ​ទំនាក់ទំនង​រវាង​ជប៉ុន​ជាមួយ​កម្ពុជា និង​អាស៊ាន ។

Picture

ខាងក្រោម​នេះ​ជា​ខ្លឹមសារ​នៃ​បទ​សម្ភាសន៍ ៖ សំណួរ​ទី​១ ៖ តើ​ជប៉ុន​មាន​គោលបំណង​អ្វី​ក្នុង​កិច្ចប្រជុំ​រដ្ឋមន្ត្រី​ការ​បរទេស​ពាក់ព័ន្ធ​ក្នុង​ក្រប​ខណ្ឌ​អាស៊ាន​នេះ?

ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី ៖ ខ្ញុំ​យល់​ឃើញ​ថា អាស៊ាន គឺជា​ដៃគូ​ដ៏​ជិត​ស្និទ្ធ​របស់​ប្រទេស​ជប៉ុន​អស់​រយៈពេល​ជា​ច្រើន​ឆ្នាំ​មក​ហើយ ក៏​មាន​សារៈសំខាន់​ផង​ដែរ​សម្រាប់​ការ​សម្រេច​បាន​នូវ «​ឥណ្ឌូ​ប៉ា​ស៊ី​ហ្វិ​ក​សេរី និង​បើកចំហ (FOIP)» ដែល​ប្រទេស​ជប៉ុន​កំពុង​ជម្រុញ​ឱ្យទៅ​មុខ ។ ដោយ​ឆ្លៀតឱកាស​នៃ​ការ​ជួបជុំ​ដោយ​ផ្ទាល់​ដែល​ខាន​រយៈពេល​៣​ឆ្នាំ ឱ្យ​មាន​អត្ថន័យ យើង​មាន​បំណង​ជម្រុញ​នូវ​ការ​សម្រេច​បាន​នូវ FOIP និង «​ទស្សនវិស័យ​អាស៊ាន​ស្តី​ពី​ឥណ្ឌូ​ប៉ា​ស៊ី​ហ្វិ​ក (AOIP)» ថែម​ទាំង​ផ្សព្វផ្សាយ​គោល​ជំហរ និង​គំនិត​របស់​ជប៉ុន​យ៉ាង​ម៉ឺងម៉ាត់ និង​បញ្ជាក់​ពី​កិច្ច​សហប្រតិបត្តិការ​យ៉ាង​ជិត​ស្និទ្ធ​ជាមួយ​បណ្តា​ប្រទេស​អាស៊ាន ឆ្ពោះទៅ​រក​ខួប​លើក​ទី​៥០​នៃ​មិត្តភាព និង​កិច្ច​សហប្រតិបត្តិការ​ជប៉ុន​-​អាស៊ាន​នៅ​ឆ្នាំ​ក្រោយ ។

Picture

លើស​ពី​នេះ យើង​នឹង​ផ្លាស់​ប្តូរ​ទស្សនៈ​លើ​ស្ថានភាព​តំបន់ និង​អន្តរជាតិ ដូច​ជា ការ​ឈ្លានពាន​ដោយ​រុ​ស្ស៊ី​នៅ​អ៊ុយ​ក្រែ​ន សមុទ្រ​ចិន​ខាងកើត និង​សមុទ្រ​ចិន​ខាងត្បូង កូរ៉េ​ខាងជើង និង​មី​យ៉ា​ន់​ម៉ា ។ ក្នុង​បរិបទ​នេះ យើង​នឹង​អះអាង​យ៉ាង​មុតមាំ​នូវ​ជំហរ​របស់​ប្រទេស​ជប៉ុន ហើយ​បញ្ជាក់​ពី​ការ​ពង្រឹង​កិច្ច​សហប្រតិបត្តិការ​ជាមួយ​ប្រទេស​ពាក់ព័ន្ធ​។ ប្រទេស​ជប៉ុន​មាន​បំណង​សហការ​ជាមួយ​ប្រទេស​កម្ពុជា​ក្នុង​ការ​ថែរក្សា និង​ពង្រឹង​សណ្តាប់ធ្នាប់​អន្តរជាតិ​ប្រកបដោយ​សេរី និង​បើកចំហ​ផ្អែក​លើ​គោលការណ៍​នីតិរដ្ឋ ។

សំណួរ​ទី​២ ៖ តើ​ឯកឧត្តម​យល់​យ៉ាងណា ចំពោះ​ទំនាក់ទំនង​ជប៉ុន​-​កម្ពុជា?

ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី ៖ ទំនាក់ទំនង​ការទូត​រវាង​ជប៉ុន និង​កម្ពុជា​ត្រូវ​បាន​បង្កើត​ឡើង​នៅ​ឆ្នាំ​១៩៥៣ ។ ភាព​ស្និទ្ធស្នាល​រវាង​ប្រទេស​យើង​ទាំង​ពីរ​បាន​កើនឡើង​ក្នុង​កំឡុង​ចុង​ទសវត្សរ៍​ឆ្នាំ​៨០ និង​ដើម​ទសវត្សរ៍​ឆ្នាំ​៩០ ដែល​ប្រទេស​ជប៉ុន​បាន​សហការ​ជាមួយ​កម្ពុជា​ដែល​ស្ថិត​នៅ​ក្នុង​ការ​លំបាក​ដោយសារ​សង្គ្រាមស៊ីវិល​ដ៏​រ៉ាំរ៉ៃ ដើម្បី​ស្វែងរក​សន្តិភាព និង​កសាង​ប្រទេស​កម្ពុជា​ឡើង​វិញ ។ ខ្ញុំ​មាន​អារម្មណ៍ ថា​ប្រាកដជា​បទ​ពិសោធន៍​នៅ​ពេល​នោះ គឺ​នៅ​តែ​ជា​មូលដ្ឋាន​នៃ​ទំនាក់ទំនង​នៃ​ការ​ជឿ​ទុកចិត្ត​គ្នា​រវាង​ប្រទេស និង​ប្រជាជន​យើង​ទាំង​ពីរ នា​ពេល​បច្ចុប្បន្ន​ផង​ដែរ ។

ទំនាក់ទំនង​រវាង​ប្រទេស​យើង​ទាំង​ពីរ​ស្ថិត​នៅ​ក្នុង​កម្រិត​ខ្ពស់​បំផុត​ក្នុង​ប្រវត្តិសាស្ត្រ ដូចដែល​បានឃើញ​ការ​រៀបចំ​នៃ​កិច្ចប្រជុំ​កំពូល​ចំនួន​ពីរ​លើក​រួច​មក​ហើយ​នៅ​ក្នុងឆ្នាំនេះ​ដែល ជា​ខួប​លើក​ទី​៣០​នៃ​បេសកកម្ម​ថែរក្សា​សន្តិភាព​របស់​អង្គការសហប្រជាជាតិ​(PKO) នៅ​កម្ពុជា​គឺ UNTAC​។

Picture

ក្នុង​ឱកាស​នៃ​ដំណើរ​ទស្សនកិច្ច​របស់​នាយក​រដ្ឋមន្ត្រី គិ​ស៊ិ​ដា នា​ខែមីនា នាយក​រដ្ឋមន្ត្រី​ទាំង​ពីរ​បាន​ចេញ​សេចក្តីថ្លែងការណ៍​រួម​ដោយ​បង្ហាញ​ពី​ទិស​ដៅ​នៃ​កិច្ច​សហប្រតិបត្តិការ​ទ្វេភាគី​នា​ពេល​អនាគត​។ ប្រទេស​ជប៉ុន​នឹង​បន្ត​ខិតខំ​ធ្វើការ​ដើម្បី​អនុវត្ត​សេចក្តីថ្លែងការណ៍​រួម​ឲ្យ​ចេញ​ជា​សហប្រតិបត្តិការ​ជាក់ស្តែង​ជាមួយ​ប្រជាជន​កម្ពុជា ហើយ​ធ្វើ​ឲ្យ​ចំណងមិត្តភាព​រវាង​ប្រទេស​យើង​ទាំង​ពីរ​កាន់តែ​រីក​ចម្រើន​។ 

សំណួរ​ទី​៣ ៖ ជប៉ុន​ធ្លាប់​ជា​ប្រទេស​ម្ចាស់​ជំនួយ​ធំ​ជាងគេ​នៅ​កម្ពុជា ហើយ​បន្ត​ជួយ​ដល់​កម្ពុជា​រហូត​ដល់​សព្វថ្ងៃ ។ តើ​ទំហំ​ទឹកប្រាក់​សរុប​នៃ​ជំនួយ ODA ដែល​បាន​ផ្តល់​កម្ពុជា​មក​ដល់​ពេល​នេះ​មាន​ចំនួន​ប៉ុន្មាន? ជំនួយ​ជប៉ុន​ដែល​ជា​គម្រោង​ខ្នាត​ធំ និង​សំខាន់​ៗ​នោះ​មាន​គម្រោង​អ្វីខ្លះ?

ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី ៖ ប្រទេស​ជប៉ុន​បាន​ជួយ​គាំទ្រ​ដល់​ការ​កសាង​ប្រទេស​របស់​កម្ពុជា​អស់​រយៈពេល​ជា​ច្រើន​ឆ្នាំ​មក​ហើយ​។ ជំនួយ​ទាំងនោះ គឺ​មាន​ចាប់ពី​ការ​អភិវឌ្ឍ​ហេដ្ឋារចនាសម្ព័ន្ធ​ដែល​មានគុណ​ភាព​ខ្ពស់​ដូច​ជា កំពង់​ផែ ស្ពាន ផ្លូវថ្នល់ ប្រព័ន្ធ​ទឹក​ស្អាត ប្រព័ន្ធ​ទឹក​កខ្វក់ និង​ថាមពល​អគ្គិសនី​ជាដើម រហូត​ដល់​ជំនួយ​គាំទ្រ​ផ្នែក​ទន់ រួម​មាន​ជំនួយ​ក្នុង​ការ​រៀបចំ​ប្រព័ន្ធ​ច្បាប់ ការ​ពង្រឹង​អភិបាលកិច្ច​តាម​រយៈ​ការ​ចូលរួម​របស់​ប្រជាពលរដ្ឋ និង​ការ​បណ្តុះបណ្តាល​ធនធានមនុស្ស​ក្នុង​វិស័យ​ឧស្សាហកម្ម​ជាដើម ។ ទំហំ​ទឹកប្រាក់​សរុប​នៃ​ជំនួយ ODA សម្រាប់​កម្ចី​ប្រាក់​យ៉េន គឺ​មាន​ប្រមាណ ២០៧ ពាន់​លាន​យ៉េន (​ស្មើនឹង​ប្រមាណ ១,៩២ ពាន់​លាន​ដុល្លារ​អា​មេ​រិ​ក​) សម្រាប់​ជំនួយ​ឥត​សំណង​គឺ​មាន​ប្រមាណ​២២៦ ពាន់​លាន​យ៉េន (​ប្រហែល ២,០៩ ពាន់​លាន​ដុល្លារ​) ហើយ​សម្រាប់​កិច្ច​សហប្រតិបត្តិការ​បច្ចេកទេស​វិញ គឺ​មាន​ប្រមាណ​៩៥ ពាន់​លាន​យ៉េន (​ប្រហែល ៨៨០​លាន​ដុល្លារ​អា​មេ​រិ​ក​)​។

Picture

ស​ម្រ​ប់​គម្រោង​ខ្នាត​ធំ​ជា​ជំនួយ​ជប៉ុន​មាន​ដូច​ជា «​ស្ពាន​គី​ហ្សូ​ណា​» និង «​ស្ពាន​ត្សឹ​បា​សា​» ជា​និមិត្តរូប​នៃ​កិច្ច​សហ​ប្រតិបត្តិ​ដែល​ត្រូវ​បាន​គូរ​លើ​ក្រដាសប្រាក់​៥០០​រៀល ដែល​លោក​អ្នក​តែងតែ​ឃើញ​ជា​ប្រចាំ​។ ស​ម្រ​ប់​គម្រោង​ពាក់ព័ន្ធ​នឹង​ជីវភាព​រស់នៅ​របស់​ប្រជាជន​ដោយ​ផ្ទាល់ មាន​ដូច​ជា​គម្រោង​រៀបចំ​ប្រព័ន្ធ​ផ្គត់ផ្គង់​ទឹក​ស្អាត​។

ចាប់តាំងពី​ឆ្នាំ​១៩៩៣ បន្ទាប់​ពី​ការ​បញ្ចប់​សង្គ្រាមស៊ីវិល​ភ្លាម​ៗ យើង​បាន​ចាប់ផ្តើម​អនុវត្ត​គម្រោង​នេះ​មិន​ត្រឹមតែ​នៅ​ក្នុង​រាជធានី​ភ្នំពេញ​ប៉ុណ្ណោះ​ទេ ប៉ុន្តែ​ក៏​នៅ​តាម​ទីក្រុង​សំខាន់​ៗ​ក្នុង​ខេត្ត​នានា​ផង​ដែរ​ក្នុង​ទំហំ​ថវិកា​សរុប​នៃ​ជំនួយ​មាន​ប្រមាណ​ជាង ៤៨​ពាន់​លាន​យ៉េន (​ប្រមា​ន​៤៤០​លាន​ដុល្លារ​អា​មេ​រិ​ក​) ។

ជំនួយ​ទាំងនេះ​ត្រូវ​បាន​អនុវត្ត​រួម​ជាមួយនឹង​ការ​បណ្តុះបណ្តាល​ធនធានមនុស្ស ដើម្បី​អោយ​ប្រជាជន​កម្ពុជា​ផ្ទាល់​អាច​គ្រប់គ្រង​ការ​ផ្គត់ផ្គង់​ទឹក​ស្អាត​បាន​ដោយ​ខ្លួនឯង ។ ជា​ពិសេស​ទីក្រុង​ភ្នំពេញ​យើង​ទទួល​បាន​លទ្ធផល​គួរ​ឱ្យ​កត់សម្គាល់ ដូច​ជា ការ​សម្រេច​បាន​នូវ​សេវា​ផ្គត់ផ្គង់​ទឹក​ស្អាត​២៤​ម៉ោង ដែល​ត្រូវ​បាន​គេ​ហៅ​ថា «​ភ្នំពេញ​អច្ឆរិយៈ​»​។

លើស​ពី​នេះ​ទៅ​ទៀត ចាប់តាំងពី​ឆ្នាំ​១៩៩៩ ប្រទេស​ជប៉ុន​បាន និង​កំពុង​ផ្តល់​ជំនួយ​ជា​ច្រើន​ផ្នែក ដល់​កំពង់​ផែ​ស្វយ័ត​ក្រុងព្រះសីហនុ ដែល​ជា​មូលដ្ឋាន​ដឹក​ជញ្ជូន​ដ៏​សំខាន់​សម្រាប់​ប្រទេស​កម្ពុជា តាម​រយៈ​ការ​សាងសង់​ស្ថានីយ​ផែ ការ​បញ្ជូន​អ្នក​ជំនាញការ និង​ការ​អភិវឌ្ឍន៍​ប្រព័ន្ធ​កំពង់​ផែ​ជាដើម ។ ហើយ​នៅ​ពេល​ដែល​ខ្ញុំ (​រដ្ឋមន្ត្រី​) បំពេញ​ទស្សនកិច្ច​នៅ​ប្រទេស​កម្ពុជា ខ្ញុំ​នឹង​ប្រកាស​អំពី​គម្រោង​ជំនួយ​ថ្មី​មួយទៀត ។ ខ្ញុំ​ជឿជាក់​យ៉ាង​ខ្លាំង​ថា កិច្ច​សហប្រតិបត្តិការ​បែប​នេះ​បាន​បង្កើត​មិត្តភាព រវាង​បុគ្គលិក​ជប៉ុន​និង​កម្ពុជា ដែល​ធ្វើការ​រួម​គ្នា​នៅ​ទីតាំង​ផ្ទាល់ ហើយ​វា​បណ្តាល​ឱ្យ​មានការ​ពង្រឹង​បន្ថែម​ទៀត​នូវ​ទំនាក់ទំនង​នៃ​ការ​ជឿ​ទុកចិត្ត​រវាង​រដ្ឋាភិបាល និង​ប្រជាជន​នៃ​ប្រទេស​ទាំង​ពីរ​។

សំណួរ​ទី​៤ ៖ ទាក់ទង​នឹង​ពាណិជ្ជកម្ម​ទ្វេភាគី តើ​មានការ​កើនឡើង​ទេ? តើ​ឯកឧត្តម​យល់​យ៉ាងណា ចំពោះ​ការ​វិនិយោគ​របស់​ជប៉ុន​នៅ​កម្ពុជា? តើ​កម្ពុជា​គួរ​ធ្វើ​ដូច​ម្តេច​ដើម្បី​ទាក់ទាញ​ការ​វិនិយោគ​ពី​ប្រទេស​ជប៉ុន?

ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី ៖ ទំហំ​ពាណិជ្ជកម្ម​រវាង​ប្រទេស​ទាំង​ពីរ​បាន​កើនឡើង​ប្រមាណ ៦​ដង​ក្នុង​រយៈពេល ១០​ឆ្នាំ​ចុង​ក្រោយ​នេះ ពី​ចំនួន​សរុប​ប្រមាណ ៣៧០​លាន​ដុល្លារ​ក្នុង​ឆ្នាំ​២០១០ ដល់​ប្រមាណ ២,៣៣ ពាន់​លាន​ដុល្លារ​ក្នុង​ឆ្នាំ​២០២១ ។ ដោយសារ​ឥទ្ធិពល​នៃ​ជម្ងឺ​កូ​វី​ដ​១៩ បាន​បណ្តាល​ឲ្យ​មានការ​ថយ​ចុះ​ម្តង​ក្នុង​ឆ្នាំ​២០២០ ប៉ុន្តែ​វា​ក៏​បាន​បង្ហាញ​ពី​និន្នាការ​ងើបឡើង​វិញ​នៅ​ឆ្នាំ​២០២១​។

Picture

ការ​នាំ​ចេញ​របស់​កម្ពុជា​ទៅ​កាន់​ប្រទេស​ជប៉ុន​ភាគច្រើន​ជា​ផលិតផល​កាត់ដេរ ប៉ុន្តែ​ថ្មី​ៗ​នេះ ផលិតផល​ឧស្សាហកម្ម​ដូច​ជា ផលិតផល​អគ្គិសនី និង​គ្រឿងបន្លាស់​ដែល​ទាក់ទង​នឹង​រថយន្ត​ក៏​កំពុង​ត្រូវ​បាន​នាំ​ចេញ​ផង​ដែរ​។ ការ​វិនិយោគ​របស់​ក្រុមហ៊ុន​ជប៉ុន គឺ​មាននៅ​លើ​វិស័យ​ជា​ច្រើន ចាប់ពី​វិស័យ​សេវាកម្ម​ដូច​ជា ផ្សារ​ទំនើប និង​ភោជនីយដ្ឋាន រហូត​ដល់​អចលនទ្រព្យ ហិរញ្ញវត្ថុ និង​ឧស្សាហកម្ម​ផលិតកម្ម​ជាដើម​។

ធនធានមនុស្ស​ដែល​មាន​ជំនាញ​ឯកទេស គឺ​មិន​អាច​ខ្វះ​បាន​សម្រាប់​ការ​ទាក់ទាញ​ការ​វិនិយោគ​មក​កម្ពុជ​បន្ថែម​ក៏​ដូច​ជា សម្រាប់​ការ​អភិវឌ្ឍ​ប្រកបដោយ​ចីរភាព និង​ការ​ធ្វើ​ពិពិធ​កម្ម​ឧស្សាហកម្ម​របស់​កម្ពុជា​។ ក្នុង​កំឡុង​ពេល​ដំណើរ​ទស្សនកិច្ច​លើក​នេះ ខ្ញុំ​មាន​គម្រោង​ទៅ​ទស្សនកិច្ច​វិទ្យាស្ថាន​ជាតិ​បណ្ដុះបណ្ដាល​បច្ចេកទេស ។ នៅ​ទីនោះ​បាន និង​កំពុង​អនុវត្ត​កម្មវិធី​សិក្សា​សម្រាប់​ការ​អភិវឌ្ឍ​ធនធានមនុស្ស​ក្នុង​វិស័យ​អគ្គិសនី ដែល​កំពុង​មាន​តម្រូវការ​ខ្លាំង​ពី​ពិភព​ឧស្សាហកម្ម ។

កម្មវិធី​សិក្សា​នេះ​ត្រូវ​បាន​បង្កើត​ឡើង​ដោយ​JICA តាម​រយៈ​កិច្ច​សហប្រតិបត្តិការ​បច្ចេកទេស ហើយ​អ្នកជំនាញ JICA កំពុង​ឈរជើង ដើម្បី​គ្រប់គ្រង និង​កែ​លម្អ​កម្មវិធី​នេះ ដោយ​សហការ​ជាមួយ​ដៃគូ​ភាគី​កម្ពុជា​។ តាម​រយៈ​កិច្ច​ខិតខំ​ប្រឹងប្រែង​ទាំងនេះ ប្រទេស​ជប៉ុន​ទាំង​វិស័យ​សាធារណៈ និង​ឯកជន នឹង​បន្ត​ធ្វើការ​ដើម្បី​ពង្រឹង​ចំណង​សេដ្ឋកិច្ច​រវាង​ប្រទេស​ទាំង​ពីរ​បន្ថែម​ទៀត​។

ថែម​នេះ​ទៀត ដើម្បី​គ្រប់គ្រង​ទំនាក់ទំនង​សេដ្ឋកិច្ច​ដែល​បាន​អភិវឌ្ឍ​កន្លង​មក និង​កែ​លម្អ​បរិយាកាស​វិនិយោគ​បន្ថែម​ទៀត ប្រទេស​ជប៉ុន​និង​កម្ពុជា​រៀបចំ «​កិច្ចប្រជុំ​គណៈកម្មាធិការ​ចម្រុះ​កម្ពុជា​-​ជប៉ុន​» ពីរ​ដង​ក្នុង​មួយ​ឆ្នាំ​។ យើង​នឹង​បន្ត​សហការ​ជាមួយ​កម្ពុជា ដើម្បី​ដោះស្រាយ​បញ្ហា​នានា​ដែល​ក្រុមហ៊ុន​ជប៉ុន​ជួប​ប្រទះ​នៅ​ក្នុង​ប្រទេស​កម្ពុជា​។

Picture


សំណួរ​ទី​៥ ៖ តើ​ឯកឧត្តម​មាន​សារ​អ្វី​សម្រាប់​ប្រជាជន​កម្ពុជា?

ឯកឧត្តម យ៉ូ​ស៊ី​ម៉ាសា ហា​យ៉ា​ស៊ី ៖ ប្រជាជន​កម្ពុជា​ជាទី​មេត្រី​! នៅ​ឆ្នាំ​ក្រោយ ជប៉ុន និង​កម្ពុជា នឹង​ប្រារព្ធ​ខួប​លើក​ទី​៧០​នៃ​ការ​បង្កើត​ទំនាក់ទំនង​ការទូត ។ អ្វី​ដែល​ប្រទេស​ជប៉ុន​យកចិត្តទុកដាក់​សំខាន់​នោះ​គឺ ការ​កសាង​ទំនាក់ទំនង​រវាង​រដ្ឋាភិបាល និង​រដ្ឋាភិបាល​ដ៏​រឹង​មាំ ដើម្បី​ជម្រុញ​កិច្ច​សហប្រតិបត្តិការ​ទ្វេភាគី ព្រមទាំង​ការ​ជម្រុញ​ការ​ផ្លាស់​ប្តូរ​ប្រជាជន និង​ប្រជាជន ដើម្បី​ពង្រឹង​បន្ថែម​នូវ​ចំណងមិត្តភាព​រវាង​ប្រជាពលរដ្ឋ​ទាំង​ពីរ​។

នៅ​ឆ្នាំ​ក្រោយ យើងខ្ញុំ​ន​នឹង​រៀបចំ​ឱកាស និង​ផ្សព្វផ្សាយ​ព័ត៌មាន​ដល់​ប្រជាជន​កម្ពុជា ដើម្បី​ឱ្យ​លោក លោកស្រី ក្មួយ​ៗ​ដឹង​ពី​ភាពរឹងមាំ​នៃ​ទំនាក់ទំនង​រវាង​ប្រទេស​យើង​ទាំង​ពីរ​។

ថ្ងៃនេះ​ខ្ញុំ​នឹង​ធ្វើ​ទស្សនកិច្ច​នៅ​កម្ពុជា​ជា​លើក​ដំបូង​ក្នុង​នាម​ជា​រដ្ឋមន្ត្រី​ការ​បរទេស​ជប៉ុន ។ ខ្ញុំ​មាន​បំណង​បង្កើន​មិត្តភាព​ជាមួយ​អ្នក​ដែល​នឹង​ជួប​ក្នុងអំឡុងពេល​ស្នាក់​នៅ​កម្ពុជា និង ស្វែង​យល់​ឱ្យ​កាន់តែ​ស៊ីជម្រៅ​អំពី​ប្រទេស​និង​ប្រជាជន​កម្ពុជា ព្រមទាំង វប្បធម៌​កម្ពុជា ហើយ​ប្រើប្រាស់​ឱកាស​នេះ ដើម្បី​ទំនាក់ទំនង​រវាង​ប្រទេស​ទាំង​ពីរ​មាន​ភាព​កាន់តែ​រីក​ចម្រើន​ថែម​ទៀត ។ ខ្ញុំ​កំពុង​ទន្ទឹងរង់ចាំ​ចេញពី​បេះដូង ទស្សនា​ទេសភាព​ទីក្រុង​ដ៏​ស្រស់​ស្អាត​នៃ​ទីក្រុង​ភ្នំពេញ និង​ស្នាមញញឹម​របស់​ប្រជាជន​កម្ពុជា​រាល់គ្នា​៕