អ្នកបង្កើតវីដេអូធ្វើម្ហូបដ៏ល្បី១រូបកំពុងត្រូវស៊ើបអង្កេតរឿងចំអិនសាច់សត្វដ៏កម្រ
ចិន ៖ អ្នកបង្កើតប្លុកវីដេអូធ្វើម្ហូបដ៏ល្បីល្បាញរបស់ប្រទេសចិនម្នាក់ កំពុងត្រូវបានប៉ូលិសស៊ើប
ចិន ៖ អ្នកបង្កើតប្លុកវីដេអូធ្វើម្ហូបដ៏ល្បីល្បាញរបស់ប្រទេសចិនម្នាក់ កំពុងត្រូវបានប៉ូលិសស៊ើបអង្កេត។ បន្ទាប់ពីនាងបានចែករំលែកវីដេអូយកត្រីឆ្លាមពូជពណ៌សដ៏កម្រមកចំអិន។
នារីរូបនោះ ត្រូវគេស្គាល់យ៉ាងច្បាស់ថា Tizi ដែលមានអ្នកតាមដានជាង ៧,៨លាននាក់នៅលើគេហទំព័រចិន Douyin។ នៅក្នុងវីដេអូដែលបានចែករំលែក Tizi បានទៅរើសត្រីឆ្លាមពូជពណ៌សប្រវែង២ម៉ែត្រនៅហាងអាហារសមុទ្រមួយកន្លែងក្នុងទីក្រុង Nanchong ដើម្បីចំអិនជាម្ហូបអាហារចែកជូនអ្នកគាំទ្ររបស់នាងទស្សនា។
នៅក្នុងវីដេអូនោះ Tizi បាននិយាយថា វាអាចមើលទៅសាហា.វ ប៉ុន្តែសាច់វាពិតជាទន់ខ្លាំងណាស់។ ហើយនាងបានបន្តកាត់ត្រីឆ្លាមនោះជាពាក់កណ្តាល មុននឹងអាំងកន្ទុយ ហើយស្ងោរក្បាលក្នុងឆ្នាំងស៊ុប។ ហើយនៅពេលឆ្អិន នាងក៏បានចែករំលែកអាហារនោះ ជាមួយអ្នកភូមិក្នុងតំបន់ ដែលសុទ្ធតែសរសើរថា ពិតជាឆ្ងាញ់ណាស់។ ខណៈដែល Tizi ក៏បានអះអាងថា សត្វនេះ ជាត្រីឆ្លាមទំពក់ដែលត្រូវបានគេបង្កាត់ពូជសម្រាប់លក់ និងអាចបរិភោគបាន។
ទោះបីយ៉ាងណា បន្ទាប់ពីមានការរិះគន់ខ្លាំងៗចំពោះទង្វើរបស់ Tizi នៅលើបណ្តាញអ៊ីនធឺណែត ប៉ូលិសទីក្រុង Nanchong បានបើកការស៊ើបអង្កេត ហើយអះអាងថា វាពិតជាត្រីឆ្លាមពូជពណ៌ស ដែលជាប្រភេទសត្វត្រូវបានការពារនៅក្នុងប្រទេសចិន។
ប្រភពពីកាសែត South China Morning Post បានរាយការណ៍ថា វីដេអូចំអិនត្រីឆ្លាមរបស់ Tizi ត្រូវបានលុបចេញ។ ហើយប្រព័ន្ធផ្សព្វផ្សាយក្នុងស្រុកផ្សេងទៀត បានអះអាងថា ត្រីឆ្លាមនោះ មិនត្រូវបានទិញពីហាងអាហារសមុទ្រ ដូចដែលក្នុងវីដេអូនាងរើសវានោះទេ។ វាគ្រាន់តែជាកន្លែងសម្រាប់ថតវីដេអូរបស់នាងតែប៉ុណ្ណោះ។
ពាក់ព័ន្ធបញ្ហានេះ Tizi បានបដិសេធការអះអាងទាំងអស់ ហើយបាននិយាយថា នាងកំពុងជួលមេធាវីចាត់ចែងតាមផ្លូវច្បាប់ជុំវិញការចោទប្រកាន់នេះ៕
ចែករំលែកព័តមាននេះ