ចក្រភពអង់គ្លេស ៖ រតនាគារចក្រភពអង់គ្លេសបាននិយាយកាលពីថ្ងៃអាទិត្យកន្លងមកថា នឹងចាប់ផ្តើមប្រើប្រាស់កាក់១ផោនថ្មី នៅថ្ងៃទី២៨ មីនា ខាងមុខ ។ ពួកគេក៏បានកំណត់យកពាក់កណ្តាលខែតុលា ជាពេលបញ្ឈប់ការប្រើប្រាស់កាក់ចាស់ផងដែរ ។
ការប្រកាសនាថ្ងៃចូលឆ្នាំថ្មី គឺជាលើកទីមួយដែលរតនាគាររបស់ប្រទេសនេះបានចេញពេលកំណត់ជាក់លាក់សម្រាប់ការផ្លាស់ប្តូរប្រាក់ ។
លោក David Gauke អគ្គលេខាធិការរតនាគារខាងលើ ថ្លែងថា ៖ « នេះគឺជាពេលមួយដ៏គួរឲ្យចងចាំ ព្រោះវាជាលើកទីមួយហើយ ដែលពួកយើងបានសម្រេចប្រើប្រាក់កាក់១ផោនថ្មី តាំងពីឆ្នាំ១៩៨៣ មកម្ល៉េះ » ។
គួរបញ្ជាក់ថា ប្រទេសអង់គ្លេសកំពុងផ្លាស់ប្តូរប្រាក់កាក់ថ្មី ដោយមានចំណុចសន្តិសុខខ្ពស់នេះ ព្រោះតែកាក់ចាស់ជាគោលដៅរបស់អ្នកក្លែងប្រាក់ ។
Royal Mint ព្យាករថា ៣%នៃកាក់១ផោនគឺជាកាក់ក្លែងក្លាយ ។ ប៉ុន្តែមនុស្សជាច្រើនមិនសប្បាយចិត្តនឹងកាក់ថ្មីនេះទេ ។
អាជីវកម្មមួយចំនួនថែមទាំងបានបង្ហាញពីភាពព្រួយបារម្ភពីការផ្លាស់ប្តូរនេះ ព្រោះតែកាក់ថ្មីមានទម្រង់ និងទម្ងន់ខុសពីកាក់ចាស់ ដែលធ្វើឲ្យពិបាកប្រើវាសម្រាប់ម៉ាស៊ីនទទួលកាក់ផ្សេងៗ ។
សមាគមការលក់ដោយស្វ័យប្រវត្តិព្យាករថា វាប្រហែលជាត្រូវចំណាយប្រមាណ៣៩លានដុល្លារ ដើម្បីឲ្យម៉ាស៊ីនលក់របស់ដោយស្វ័យប្រវត្តិប្រមាណ៥០ម៉ឺនគ្រឿងក្នុងចក្រភពអង់គ្លេស អាចទទួលយកកាក់ថ្មីនេះបាន ។
រតនាគារខាងលើ ក៏កំពុងចាប់ផ្តើមយុទ្ធនាការផ្សព្វផ្សាយ និងលើកតម្កើងដើម្បីធានាថា ប្រជាជនអាចប្រើប្រាស់ប្រាក់កាក់របស់ខ្លួន ឬយកវាទៅប្តូរនៅធនាគារ មុនថ្ងៃទី១៥ តុលា។ កាក់ចាស់ទាំងនោះនឹងលែងមានតម្លៃនៅថ្ងៃនោះ ។
រតនាគារកត់សម្គាល់ទៀតថា កាក់ដែលបានយកមកប្តូរមួយចំនួន នឹងត្រូវយកមកផលិតកាក់ថ្មី ដោយ Royal Mint ក្នុង Llantrisant ផងដែរ ៕
ចែករំលែកព័តមាននេះ