រាជធានីភ្នំពេញ ៖ ស្ត្រីម្តាយដោយខឹងកូនប្រុសខ្លួនលួចមានសហាយ ខណៈមានប្រពន្ធកូន២ទៅហើយនោះ ក៏ជិះម៉ូតូតាមរកឃើញពេលកំពុងអង្គុយសាសងជាមួយស្រីនោះ ក៏ចុះទៅចាប់ស្រីនោះវាយបោចសក់ ទាត់ធាក់ផ្អើលពេញស្ថានីយប្រេងឥន្ធនៈសូគីម៉ិច ស្ថិតក្នុងសង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង០៨ និង២៥នាទីយប់ថ្ងៃទី០៣ មករា ២០១៧ ។
តាមសម្តីជាម្ដាយសុំមិនបញ្ចេញឈ្មោះបានឱ្យដឹងថា កូនប្រុសគាត់មានប្រពន្ធនិងកូនប្រុស២នាក់ទៅហើយ បែរជាទៅលួចមានទំនាក់ទំនងស្នេហាជាមួយស្រីផ្សេងទៅវិញ ។ ទោះបីជាគាត់ខំប្រឹងនិយាយណែនាំកូនប្រុសឱ្យឈប់ទាក់ទងជាមួយនារីនោះ ក៏កូនប្រុសគាត់នៅតែមិនស្តាប់ ។ ចំណែកនារីជាសហាយកូនប្រុស ក៏គាត់ធ្លាប់បាននិយាយតាមទូរស័ព្ទហាមប្រាមឱ្យឈប់ទាក់ទងគ្នាដែរ តែត្រូវនាងមិនស្តាប់ដែរ ។ នៅតែលួចទាក់ទងនឹងណាត់ជួបគ្នាបន្តទៀត រហូតដល់ម៉ោងកើតហេតុខាងលើ រូបគាត់បានឱ្យកូនស្រីជិះម៉ូតូហុងដាឌ្រីមមួយគ្រឿងតាមដានឃើញអ្នកទាំងពីរ បានជិះម៉ូតូជាមួយគ្នា រួចហើយទៅអង្គុយសាសងស្នេហានៅទីនោះ ទើបគាត់ឱ្យកូនស្រីឈប់ម៉ូតូ រួចហើយបានដើរទៅចាប់បោចសក់ស្រីនោះវាយទាត់ធាក់តែម្តង ។
ទោះបីជាកូនប្រុសចាប់ក្រៀកស្រី និងសន្តិសុខម៉ាតជួយចាប់ទាញ មិនម្តាយវាយស្រីនោះ ក៏ស្ត្រីជាម្តាយនៅតែវាយទាត់ធាក់ផ្អើលគេផ្អើលឯង ហើយស្រែកឱ្យអ្នកធ្វើដំណើរមកជួយមើលផង «នេះជាស្រីដែលទាក់ទងប្តីរបស់គេ» ។ ចំណែកស្ត្រីរូបនោះមិនបាននិយាយអ្វីទាំងអស់ គ្រាន់តែប្រាប់ថា បើចង់សួរទៅសួរទៅកូនប្រុសរបស់គាត់ទៅ ។ រីឯបុរសដែលម្តាយតាមទាន់នោះក៏មិននិយាយស្តីអ្វីដែរ ។
ខណៈពេលកើតហេតុ រញ៉េរញ៉ៃវាយទាត់ធាក់ហើយ ម្ដាយខាងប្រុសនៅតែដេញវាយស្ត្រីជាសហាយរបស់កូនប្រុសរបស់គាត់ ផ្អើលពេលស្ថានីយប្រេងឥន្ធនៈសូគីម៉ិច រហូតទាល់តែខាងកម្លាំងអាវុធហត្ថខណ្ឌចំការមន មកជាមួយសម្របសម្រួល ហើយនៅតែស្ត្រីជាម្តាយទប់កំហឹងមិនបានរហូតបន្តិច ។ ក្រោយមក ទើបឃើញមានបងប្អូនខាងស្រីជាសហាយនោះ ចេញទៅបាត់ ចំណែកស្ត្រីជាម្តាយនិងកូន ក៏បានជិះម៉ូតូចេញទៅបាត់អស់ដែរ ។
ចែករំលែកព័តមាននេះ