ឡាវនឹងបង្កើនការនាំចេញអង្ករទៅកាន់ប្រទេសចិនតាមតម្រូវការ
ប្រទេសឡាវ ៖ ឡាវមានផែនការបង្កើនការនាំចេញអង្ករទៅកាន់ប្រទេសចិននៅឆ្នាំក្រោយ បន្ទាប់ពីចិនពេញចិត្តនឹងគុណភាពអង្កររបស់ឡាវ ។ នេះបើតាមកាសែតរដ្ឋ Vientiane Times ។
ប្រទេសឡាវ ៖ ឡាវមានផែនការបង្កើនការនាំចេញអង្ករទៅកាន់ប្រទេសចិននៅឆ្នាំក្រោយ បន្ទាប់ពីចិនពេញចិត្តនឹងគុណភាពអង្កររបស់ឡាវ ។ នេះបើតាមកាសែតរដ្ឋ Vientiane Times ។
ឡាវបានចាប់ផ្តើមលក់អង្ករទៅឲ្យចិននៅឆ្នាំ២០១៥ ហើយគេរំពឹងថា តួលេខនៃការនាំចេញមានប្រមាណ៤.២០០តោននៃអង្ករដំណើប និងអង្ករពណ៌ស្វាយនៅឆ្នាំ២០១៦ នឹងកើនឡើងដល់ជាង៨.០០០តោននៅឆ្នាំ២០១៧ ខណៈតម្រូវការពីទីផ្សារចិនកើនឡើង ។ នេះបើតាមនាយកដ្ឋានកសិកម្មឡាវ ។
នៅខែមីនា ឆ្នាំ២០១៥ Xuanye (Lao) Co., Ltd បានក្លាយជាក្រុមហ៊ុននាំចេញអង្ករឡាវតែមួយគត់ទៅកាន់ប្រទេសចិន ជាមួយនឹងកូតា៨.០០០តោន តាមរយៈការអនុម័តពីគណៈកម្មការអភិវឌ្ឍន៍ និងកំណែទម្រង់ជាតិរបស់ចិន ។
នៅក្រោមគម្រោងនេះ កសិករជាច្រើនបានរួមចំណែកបញ្ចេញកម្លាំងពលកម្ម និងដីរបស់ខ្លួន ខណៈក្រុមហ៊ុនផ្តល់មូលនិធិផ្នែកបច្ចេកទេស និងទីផ្សារ ។ បញ្ហាប្រឈមចម្បងរបស់កសិករឡាវ គឺការចំណាយខ្ពស់លើផលិតកម្មស្រូវ និងការដឹកជញ្ជូន បើធៀបនឹងប្រទេសជិតខាង ។ នេះបើតាមមន្ត្រីកសិកម្មឡាវ ។
ការបើកទីផ្សារអង្ករសម្រាប់ប្រទេសឡាវ បានបន្ថែមតួនាទីដល់ក្រសួងកសិកម្ម និងរុក្ខាប្រមាញ់ ក្នុងការលើកកម្ពស់អង្ករឡាវជាផលិតផលគំរូស្តង់ដាអន្តរជាតិ ។ ក្រសួងនេះកំពុងអនុវត្តគម្រោងសាកល្បងមួយដើម្បីដាំស្រូវនាំចេញទៅចិន ស្ថិតក្រោមគោលការណ៍កិច្ចសហប្រតិបត្តិការទាំង៤គឺ ទឹក ពូជស្រូវ ជី និងរដូវកាល ។
ការចាប់ផ្តើមនៃទីផ្សារអង្ករសរីរាង្គឡាវក្នុងប្រទេសចិនត្រូវបានចាត់ទុកថា ជាឱកាសយ៉ាងសំខាន់សម្រាប់អង្ករឡាវក្លាយជាទីផ្សារធំបំផុតរបស់ពិភពលោក ដោយធានាទីផ្សារសម្រាប់កសិករ និងលុបបំបាត់ភាពក្រីក្រក្នុងប្រទេសឡាវផងដែរ ។ នេះបើតាមកាសែត Vientiane Times ។
ចាប់តាំងពីឆ្នាំ២០០០មក ឡាវបាននាំចេញអង្ករជាង៣០ម៉ឺនតោនជារៀងរាល់ឆ្នាំទៅកាន់ប្រទេសវៀតណាម ថៃ ចិន និងបណ្តាប្រទេសផ្សេងទៀត ។
ឡាវគ្រោងនឹងផលិតអង្ករប្រមាណ៥លានតោននៅត្រឹមឆ្នាំ២០២០ ដើម្បីធានាសន្តិសុខស្បៀងអាហារក្នុងប្រទេស ។ នៅឆ្នាំសារពើពន្ធនេះ ការផលិតអង្ករកើនឡើង៤,១២លានតោន និងត្រូវបានគេព្យាករថា នឹងកើនឡើងដល់៤,៣៥លានតោននៅឆ្នាំក្រោយ ៕
ចែករំលែកព័តមាននេះ