ខេត្តឧត្តរមានជ័យ ៖ ទីតាំងអុជកាំជ្រួចដែលបានរៀបចំឡើងនៅលើខ្នងភ្នំដងរ៉ែក ត្រូវបានធ្វើពិធីសែនព្រេន និងសម្ភោធកាត់ខ្សែបូឱ្យដំណើរការអុជកាំជ្រួចភ្នាល់គ្នា កាលពីព្រឹកថ្ងៃទី២៧ កក្កដា ឆ្នាំ២០២២ ដែលទីតាំងនេះស្ថិតនៅក្នុងចំណុចចង្អូថ្ម ក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
ក្នុងពិធីសម្ភោធបើកឱ្យដំណើរការអុជកាំជ្រួចនេះដែរ គេសង្កេតឃើញមានវត្តមានលោក ឃិន ញាណ អភិបាលរងខេត្តឧត្តរមានជ័យ, លោកហោ ជិនវិរះយុទ្ធ អភិបាលស្រុកអន្លង់វែង, មន្ត្រីរាជការ, មន្ទីរជំនាញពាក់ព័ន្ធ, លោកមេបញ្ជាការ, លោកមេបញ្ជារងកងកំលាំងប្រដាប់អាវុធទាំង៣ភេទ និងប្រជាពលរដ្ឋជាច្រើនរូបបានចូលរួម ។
ទាក់ទិនទៅនិងការអុជកាំជ្រួចនេះ អ្នកយកព័តមានបានធ្វើបទសម្ភាសន៍ជាមួយប្រជាពលរដ្ឋជាច្រើននាក់ផងដែរ ជាពិសេសលោកអៀម សំអេន ជាមេភូមិជាំបានឱ្យដឹងនៅរសៀលថ្ងៃដដែលថា ក្នុងការលេងល្បែងអុជកាំជ្រួចនេះ គឺប្រជាពលរដ្ឋថៃកំពុងពេញនិយមចូលចិត្តលេងណាស់ ។
ចំណែកអ្នកភូមិនិងពលរដ្ឋខ្មែររស់នៅចំណុចចង្អូថ្ម ក្បែរទីតាំងអុជកាំជ្រួច មិនមានចោទជាបញ្ហាអ្វីនោះទេ ។ កន្លងទៅ ក្រុមហ៊ុនបានជួយកសាងផ្លូវថ្នល់ ដាំសូឡាតាមដងផ្លូវបំភ្លឺ លើសពីនេះបានជួយឧបត្ថម្ភដល់ប្រជាពលរដ្ឋខ្វះខាត នុងជួយនូវថវិកាដល់ប្រជាពលរដ្ឋដែលបានស្លាប់បាត់បង់ជីវិត តែសំខាន់សុំឱ្យប្រជាពលរដ្ឋខ្មែរដែលរត់ម៉ូតូ ឬរថយន្តដឹកប្រជាពលរដ្ឋថៃ កុំឱ្យបើកបរលឿនពេក ។
គួររំលឹកថា ល្បែងអុជកាំជ្រួចនេះ គឺកើតមានតាំងពីអំឡុងឆ្នាំ២០១៦ និង២០១៧ បាននាំចូលអុជលេងភ្នាល់របស់ប្រពលរដ្ឋរួចមកហើយផងដែរ តែនាពេលនេះ ត្រូវបាននាំចូលមកទៀតហើយក្នុងការលេងផ្នាល់គ្នានេះមានតែពលរដ្ឋថៃទេ ប្រជាពលរដ្ឋខ្មែរមិនបានចូលលេងនោះទេ ។
ចែករំលែកព័តមាននេះ