ខេត្តឧត្តរមានជ័យ ៖ កសិករផលដំណាំកសិកម្មនៅក្នុងបណ្តាស្រុក និងក្រុង បាននាំគ្នារអ៊ូររទាំ
ថា បើទឹកភ្លៀងធ្លាក់ជាបន្តបន្ទាប់គ្នាបែបនេះ នឹងបង្កឱ្យដំណាំផ្នែកកសិកម្ម ដូចជាសណ្តែកដី សណ្តែកបាយ សណ្តែកសៀង និងដំឡូងមី នឹងត្រូវរលួយដើម និងខាតបង់ស្ទើរទាំងស្រុងហើយ។
កសិករម្នាក់ឈ្មោះ ប៉ុល ឃឿន ភេទប្រុស អាយុ៧០ឆ្នាំ ជាម្ចាស់ចំការរស់នៅភូមិពុល សង្កាត់សំរោង ក្រុងសំរោង ខេត្តឧត្តរមានជ័យ បានអះអាងទាំងទឹកមុខស្រគត់ស្រគុំឱ្យដឹង កាលពីថ្ងៃទី២៦ កក្កដា ថា គាត់មានមុខរបរដាំសណ្តែកដីនេះ រយៈពេលដប់ឆ្នាំមកហើយ ពុំដែលជួបនូវកត្តាធម្មជាតិ ដោយសារមានជំនន់ទឹកភ្លៀងធ្លាក់ជាច្រើនថ្ងៃបែបនេះទេ ។ ដែលបណ្តាលឲ្យផលដំណាំសណ្តែកដីរបស់គាត់ខូចខាតអស់ពាក់កណ្តាល ។
លោកបន្តថា ណាមួយត្រូវជិតដល់រដូវប្រមូលផលទៅហើយ ក៏ត្រូវចំពេលមេឃភ្លៀងធ្វើឱ្យគាត់បង្ខំចិត្តដកសណ្តែកដី ដើម្បីយកទៅលក់បោះឱ្យម៉ូយក្រែងនឹងបានថវិកាមកវិញខ្លះ បើសិនជាគាត់ហ៊ានទុកបន្តទៀត សណ្តែកដីវានៅល្អតែដើមប៉ុណ្ណោះ ណាមួយវាអាចនឹងរលួយមើម ពេលយើងដកមកវាបានតែដើម ។ រីឯមើមរបស់វាវិញ អាចនៅកប់ក្នុងដីណាមួយសណ្តែកដីវាមានសភាពឡើងពណ៌ខ្មៅទៀតផង។
ម្ចាស់ចំការដដែលបានបញ្ជាក់បន្ថែមថា ផ្ទៃដីដែលគាត់ដាំសណ្តែកដីនៅត្រង់ចំណុចខាងលើនេះមានទំហំកន្លះហិចតា ហើយការដាំយើងត្រូវចំណាយប្រាក់ដើមទុនមុនដំបូងប្រហែលជា១លានរៀល ដូចជាត្រូវទិញគ្រាប់ពូជ សណ្តែកដីប្រភេទគ្រាប់អស់៣០គីឡូក្រាម ក្នុង១គីឡូតំលៃស្មើទៅនឹង៧ពាន់រៀល ទិញជីអស់មួយការ៉ុងកន្លះ តំលៃស្មើទៅនឹង១៧ម៉ឺនរៀល និងទិញថ្នាំបាញ់ការពារសត្វកណ្តៀរកណ្តាប់ផងដែរ។
បើតាមការលើកឡើងរបស់ម្ចាស់ចំការគាត់បានប្រាប់បន្តថា ចំពោះការដាំសណ្តែកដីនេះយើងអាចដាំបាននៅក្នុងមួយឆ្នាំបានពីរដងទៅ៣ដង ដោយពុំរើសខែនោះទេ ឲ្យតែមានប្រភពទឹកគ្រប់គ្រាន់យើងអាចដាំបាននៅខែណាក៏បានដែរ ។ ហើយមានរយៈពេលត្រឹមតែចំនួន៣ខែ ស្មើទៅនិង៩០ថ្ងៃ គឺយើងអាចប្រមូលផលយកទៅលក់នៅលើទីផ្សារក្នុងតម្លៃចាប់ពី៣៥០០រៀលឡើងទៅ ។
ចំណែកការថែទាំវិញ យើងមិនសូវលំបាកអីនោះទេ តែយើងត្រូវជួលគេជំរះស្មៅខ្លះ យើងធ្វើខ្លួនឯងខ្លះនៅពេលដើមសណ្តែកដីវាលូតលាស់ចេញដើមចាប់ពីកំពស់មួយចង្អាមដៃឡើងទៅ ហើយសំខាន់បំផុតទៀតនោះយើងត្រូវធ្វើស្មៅតាមជើងរងឱ្យបានស្អាតល្អ កុំឲ្យស្មៅដុះច្រើនដាក់ជីបន្ថែមហើយស្រោចទឹកជាប្រចាំថ្ងៃជាការស្រេច។
សូមបញ្ជាក់ថា សណ្តែកដីដែលកំពុងរងនូវទឹកភ្លៀងជោកជាំ ហើយនៅសេសសល់នេះជាក់ស្តែងម្ចាស់ចំការគាត់បាននិយាយថា បើសិនជាគាត់ដកយកទៅលក់នៅលើទីផ្សារ បានប្រាក់មកវិញយ៉ាងច្រើនណាស់ បានត្រឹម៤០ទៅ៥០ម៉ឺននឹងអស់ហើយ ដូចនេះនៅក្នុងរដូវវស្សានេះគាត់ត្រូវខាតបង់អស់ពាក់កណ្តាល ។ ចំពោះមូលហេតុដែលនាំឲ្យខូតខាតផលដំណាំនោះគឺមកពីកត្តាធម្មជាតិមេឃមានភ្លៀងធ្លាក់មកជោកជាំច្រើនពេក បើធៀបទៅនឹងរៀងរាល់ឆ្នាំកន្លងមក។
ចែករំលែកព័តមាននេះ