ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៧ ខែកក្កដា ឆ្នាំ២០២២ បានសម្រេចចេញដីកាឃុំខ្លួនជនសង្ស័យចំនួន២នាក់ ជាមុខសញ្ញាប្រើកាំភ្លើ.ងជ័រ និង
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៧ ខែកក្កដា ឆ្នាំ២០២២ បានសម្រេចចេញដីកាឃុំខ្លួនជនសង្ស័យចំនួន២នាក់ ជាមុខសញ្ញាប្រើកាំភ្លើ.ងជ័រ និងកាំបិតប៉័ងតោប្លន់យកលុយនៅកន្លែងអ៊ីនធើរណេត ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ.លួចមានស្ថានទម្ងន់ទោស ។
ជនសង្ស័យទាំង២នាក់ខាងលើនេះ ម្នាក់មានឈ្មោះ យក់ ប្រាវីត ភេទប្រុស អាយុ១៩ឆ្នាំ មុខរបរមិនពិតប្រាកដ ត្រូវបានឃាត់ខ្លួនស្នាក់នៅផ្ទះជួល ផ្លូវលំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ និងម្នាក់ទៀតឈ្មោះ មិត្ត វីរះ ភេទប្រុស អាយុ៣៣ឆ្នាំ មុខរបរមិនពិតប្រាកដ ពេលចាប់ខ្លួន គឺស្នាក់នៅផ្ទះជួលដូចគ្នា ។
សូមជម្រាបថា កាលពីវេលាម៉ោងប្រហែល៤និង៥០នាទីទៀបភ្លឺ ថ្ងៃទី១៧ ខែកក្កដា ឆ្នាំ២០២២ មានករណីចោរមួយក្រុមបានចូលធ្វើសកម្មភាពដោយប្រើកាំភ្លើ.ង (ជ័រ) និងកាំបិតភ្ជង់គំរា.មប្លន់ជនរងគ្រោះយកប្រាក់ប្រមាណ ១ ៥០០ ដុល្លារអាមេរិក ដែលប្រព្រឹត្តនៅចំណុចកន្លែងអ៊ីនធើរណេត ចំណុចផ្ទះលេខ១៥២ ផ្លូវលេខ២៥៥ ស្ថិតក្នុងភូមិ៣ សង្កាត់បឹងសាឡាង ខណ្ឌទួលគោក រាជធានីភ្នំពេញ និងមួយករណីទៀតកាលពីថ្ងៃទី៩ ខែឧសភា ឆ្នាំ២០២២ ជនសង្ស័យបានប្លន់នៅភូមិសន្សំកុសល សង្កាត់សន្សំកុសល ខណ្ឌមានជ័យ រាជធានីភ្នំពេញ ។
ក្រោយពេលកើតមានអំពើប្លន់នោះ និងទទួលបានបញ្ជាផ្ទាល់ពីលោកវរសេនីយ៍ឯក សុខ ហេង អធិការនគរបាលខណ្ឌទួលគោក កម្លាំងផ្នែកជំនាញព្រហ្មទណ្ឌខណ្ឌ បានសហការជាមួយនគរបាលខណ្ឌមានជ័យ នៅថ្ងៃទី២២ ខែកក្កដា ឆ្នាំ២០២២ បើកការស៊ើបអង្កេត និងស្រាវជ្រាវ រហូតឈានដល់ការឃាត់ខ្លួនមុខសញ្ញាជាជនសង្ស័យប្លន់នោះបានចំនួន២នាក់ និងបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជធានីភ្នំពេញ ។
សំណុំរឿងខាងលើនេះ ក៏បានស្ថិតនៅស្ថាប័នអយ្យការបើកការស៊ើបសួរ និងចោទប្រកាន់ជាផ្លូវការ រួចចាត់បញ្ជូនទៅខាងចៅក្រមសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ដើម្បីរង់ចាំកាត់ទោសទៅតាមផ្លូវច្បាប់ ៕
ចែករំលែកព័តមាននេះ