រាជធានីភ្នំពេញ៖ របាយការណ៍ក្រសួងទេសចរណ៍ បានឲ្យដឹងថា ស្ថានភាពភ្ញៀវទេសចរផ្ទៃក្នុង ប្រចាំសប្តាហ៍ នាថ្ងៃទី២៤-២៥ ខែកក្កដា ឆ្នាំ២០២២ បន្តធ្លាក់ចុះ គឺបណ្តាលមកពីកត្តាអាកាសធាតុ។
របាយការណ៍ រយៈពេល ២ថ្ងៃនៃចុងសប្តាហ៍កន្លងទៅនេះ កម្ពុជាទទួលបានភ្ញៀវទេសចរសរុបចំនួន ២១៣.៥៩០នាក់ ក្នុងនោះ ភ្ញៀវទេសចរជាតិ ចំនួន ១៩២.០៥០នាក់ និងភ្ញៀវបរទេសផ្ទៃក្នុងចំនួន ២១.៥៤០នាក់។
ចំពោះគោលដៅទេសចរណ៍សំខាន់ៗ ដែលភ្ញៀវបានទៅសម្រាកកម្សាន្ត រួមមាន៖ ខេត្តព្រះសីហនុ ទទួលបានភ្ញៀវទេសចរចំនួន ៣៣.១៧៤ នាក់ ខេត្តកំពត ទទួលបានភ្ញៀវទេសចរចំនួន៣១.៣២៣ នាក់ ខេត្តសៀមរាប ទទួលបានភ្ញៀវទេសចរ ចំនួន ២៦.៧៤៣នាក់ ខេត្តបាត់ដំបងទទួលបានភ្ញៀវទេសចរចំនួន ២០.៥១២នាក់ រាជធានីភ្នំពេញ ទទួលបានភ្ញៀវទេសចរចំនួន ១៨.០៩៨នាក់ ខេត្តកណ្តាល ទទួលបានភ្ញៀវទេសចរចំនួន ១៦.២៤៥នាក់ ខេត្តកែប ទទួលបានភ្ញៀវទេសចរ ចំនួន ១០.៥៣១នាក់ និងខេត្តពោធិ៍សាត់ ទទួលបានភ្ញៀវទេសចរចំនួន ៨.៤៩២នាក់។
តួលេខខាងលើនេះ កត់សម្គាល់ថា មានការបន្តថមថយ ប្រមាណ ៥,៦៧% ធៀបនឹងសប្តាហ៍កន្លងមក។ មូលហេតុ ដោយសារតែអាកាសធាតុ មិនអំណោយផល មានភ្លៀងធ្លាក់ច្រើននៅគ្រប់រាជធានីខេត្ត ដែលបានធ្វើឲ្យមានជំនន់ទឹកភ្លៀង នៅតាមតំបន់មួយចំនួន។ ជាក់ស្តែងក្នុងសប្តាហ៍កន្លងមក ទឹកបានហូរកាត់លើកំណាត់ផ្លូវជាតិលេខ៥ ដែលធ្វើឲ្យប៉ះពាល់ដល់ការធ្វើដំណើរ ហើយផ្លូវតភ្ជាប់ ទៅកាន់រមណីយដ្ឋានទឹកធ្លាក់ថ្មក្រាល ក្នុងខេត្តកំពង់ឆ្នាំង ត្រូវទឹកហូរផ្តាច់ មិនអាចធ្វើដំណើរកើត។
ទន្ទឹមនោះ អាជ្ញាធរខេត្តរាជធានីខេត្ត ក៏បានជូនដំណឹង ក្រើនរំលឹក និងចាត់វិធានការចាំបាច់នានា ដើម្បីគ្រប់គ្រងស្ថានភាពជំនន់ទឹក ទៅតាមស្ថានភាពរៀងៗខ្លួនផងដែរ៕ សុខ សារ៉ាយ
ចែករំលែកព័តមាននេះ