ខេត្តបាត់ដំបង ៖ ក្រសួងមហាផ្ទៃបានចេញលិខិត្រមួយច្បាប់ជូនដល់អាជ្ញាធរខេត្តបាត់ដំបង ឲ្យធ្វើការចុះពិនិត្យនិងដោះស្រាយ លើទីតាំងដីគម្រោងសាងសង់ផ្សាររបស់សហគមន៍នៅក្នុងឃុំកន្ទឺ១ ស្រុកបាណន់ ដែលលោកមេឃុំកន្ទឺ១ រំ.លោភយកធ្វើជាដីកម្មសិទ្ធផ្ទាល់ខ្លួន និងបានទៅប្រគល់ទៅឲ្យកូនប្រសារ សាងសង់ភូមិគ្រឹះរហូតដល់សព្វថ្ងៃនេះ។ នេះបើតាមយោងតាមលិខិតជូនដំណឹងរបស់ក្រសួងមហាផ្ទៃ ដែលកោះសន្តិភាព ទើបទទូលបាននៅល្ងាចថ្ងៃទី២១ កក្កដា ឆ្នាំ២០២២។
លិខិតជូនដំណឹងរបស់ក្រសួងមហាផ្ទៃ លេខ១២៧៣ ស ជ ណ ចុះថ្ងៃទី៣០ ខែឧសភា ឆ្នាំ២០២២ ជម្រាបជូនឯកឧត្តម អភិបាល នៃគណៈអភិបាលខេត្តបាត់ដំបង ។ កម្មវត្ថុ នៃលិខិតនេះ៖ ស្ដីពីការចុះផ្សាយរបស់គេហទំព័រ Kohsentepheapdaily ដែលបានចុះផ្សាយពាក់ព័ន្ធនឹងលោកមេឃុំកន្ទឺ១ យកដីគម្រោងសម្រាប់ធ្វើផ្សារ សង់វិឡាឲ្យកូននៅស្រុកបាណន់ ខេត្តបាត់ដំបង ។ បើយោងលើកាលបរិច្ឆេទ នៃលិខិតក្រសួងមហាផ្ទៃ គឺរដ្ឋបាលខេត្តបាត់ដំបង បានទទូលលិខិតនេះជាង០២ខែកន្លងមកហើយ តែរដ្ឋបាលខេត្ត តែគេមិនបានចុះពិនិត្យ ឬ ធ្វើការស្រាវជ្រាវលើទីតាំងគម្រោងដីផ្សារសហគមន៏ ដែលមេឃុំកន្ទឺ១ រំលោភយកធ្វើជាកម្មសិទ្ធិឯកជននោះទេ ។
រដ្ឋបាលខេត្ត ទើបតែបញ្ជូនលិខិតនេះ បន្តទៅកាន់រដ្ឋបាលស្រុកបាណន់ តាមរយៈដីកាអមមួយច្បាប់ ចុះថ្ងៃទី ១៥ កក្កដា ឆ្នាំ២០២២ ដើម្បីប្រគល់សិទ្ធិឲ្យអាជ្ញាធរស្រុកបាណន់ ជាអ្នកដោះស្រាយលើដីគម្រោងសាងសង់ផ្សារសហគមន៍ដែលមេឃុំកន្ទឺ១ រំ.លោ.ភយកទៅឲ្យកូនសាងសង់ភូមិគ្រឹះនោះទៅវិញ។ ប៉ុន្តែយ៉ាងណាក្ដី លោក ស្រេង សុខា អភិបាលស្រុកបាណន់ បានបញ្ជាក់ប្រាប់កោះសន្តិភាព តាមទូរស័ព្ទ នៅព្រឹកថ្ងៃទី ២២ កក្កដា នេះថា លោកមិនបានដឹង ហើយក៏មិនទាន់បានទទូលលិខិតរបស់ក្រសួងមហាផ្ទៃ ឬ ដីកាអមរបស់រដ្ឋបាលខេត្តនៅឡើយទេ។
លោកស្រេង សុខ ហាក់បានដឹងខ្លះៗអំពីប្រវត្តិដីគម្រោងបង្កើតផ្សារសគមន៍នៅឃុំកន្ទឺ១ខាងលើនេះ។ នេះបើតាមលោកបានបំភ្លឺប្រាប់កោះសន្តិភាព ។ លោកស្រេង សុខា បានប្រាប់ថា «ខ្ញុំមិនទាន់បានឃើញ ឬបាន
ទទួលលិខិតក្រសួងមហាផ្ទៃ ឬដីកាអមរបស់រដ្ឋបាលខេត្តនៅឡើយទេ រហូតដល់ពេលនេះ។ ប៉ុន្តែខ្ញុំធ្លាប់បានដឹងថា រឿងហ្នឹងកើតឡើង តាំងពីជំនាន់លោក ជុំ ញ៉ ធ្វើជាអភិបាលស្រុកបាណន់ម្លេះ»។ លោកអភិបាលស្រុករូបនេះបានបញ្ជាក់ថា «សំណុំរឿងដីគម្រោងធ្វើផ្សារសហគមន៏ នៅឃុំកន្ទឺ១ ខាងលើនេះ បានឡើងដល់ថ្នាក់ជាតិ ។ ជាពិសេស សំណុំរឿងនេះ បានធ្លាក់ក្នុងដៃអង្គភាពប្រឆាំងអំពើពុករលួយ រហូតអង្គភាពនេះកោះហៅសាមីខ្លួន និងអ្នកពាក់ព័ន្ធទៅសួរនាំទៀតផង។
ដូច្នេះខ្ញុំស្មានថា គេបញ្ចប់ទៅហើយ តែពេលនេះបែរជាថ្នាក់លើនៅបន្តសើរើទៀត តែយ៉ាងណា ខ្ញុំនឹងចាត់ចែងលើការងារនេះ នៅពេលណាលិខិតក្រសួងមហាផ្ទៃ មកដល់ដៃខ្ញុំ»។ សូមរំលឹងថា ដីគម្រោងសម្រាប់សាងសង់ផ្សារសហគមន៍ដែលគេអះអាងថា ត្រូវលោក វ៉ាន់ ណែវ មេឃុំកន្ទឺ១ ធ្វើរបងថ្មហ៊ុំព័ទ្ធ ដីរំលោភយកធ្វើជាកម្មសិទ្ធិឯកជន និងបានប្រគល់ឲ្យកូនប្រសារសាងសង់ភូមិគ្រឹះដ៏ធំស្កឹមស្កៃមកដល់សព្វថ្ងៃនេះ មានទំហំប្រហែល៥,០០០ម៉ែត្រការ៉េ ស្ថិតនៅភូមិថ្មី ឃុំកន្ទឺ១ ស្រុកបាណន់។
ដីនេះជាដីរបស់រដ្ឋ ដែលរដ្ឋបាល ឃុំកន្ទឺ១ មានគម្រោងសាងសង់ផ្សារ ដើម្បីឲ្យប្រជាពលរដ្ឋនៅក្នុងមូលដ្ឋានលក់ដូរ ចៀសវាងការធ្វើចំណាកស្រុក។ ប៉ុន្តែនៅអំឡុងឆ្នាំ២០១១ ស្រាប់តែលោក វ៉ាន់ ណែវ បានធ្វើរបងថ្មរឹងមាំ ដូចកំផែងវាំងហ៊ុមព័ទ្ធរំលោភយកគម្រោងដីផ្សារនោះទាំងអស់ ដែលមន្ត្រីមួយចំនួនអះអាងថា មានការឃុបឃិតគ្នាជាមួយមន្ត្រីជំនាញ និងលោក ជុំ ញ៉ អតីតអភិបាលស្រុកបាណន់ ក្នុងអំឡុងដែលអតីតអភិបាលស្រុករូបនេះ នៅមានអំណាចពេញក្នុងដៃ គ្រប់គ្រងអាណាចក្រស្រុកបាណន់ ។
លោក វ៉ាន់ ណែវ មេឃុំកន្ទឺ១ ធ្លាប់បានបំភ្លឺប្រាប់កោះសន្តិភាព ជុំវិញការរំលោភបំពានយកដីរដ្ឋខាងលើនេះថា លោកមិនបានទិញដីនេះទេ តែលោកបានធ្វើការដោះដូរគម្រោងដីផ្សាររបស់រដ្ឋនេះ ជាមួយនឹងដីកូនប្រសារលោក ដែលមានធំជាងគ្នាបន្តិច។ លោកមេឃុំរូបនេះ បានបញ្ជាក់ថា ការដោះដូរនោះ ក៏មានការឯកភាពពីមន្ត្រីមូលដ្ឋាន និង លោក ជុំ ញ៉ អភិបាលស្រុកបាណន់ ដែលលោកនៅគ្រប់គ្រងកាលសម័យនោះដែរ។
គេង្កេតឃើញសំណុំរឿងដីគម្រោងសាងសង់ផ្សារសហគមន៍ដ៏ចម្រោងចម្រាស់នេះ បានផ្ទុះឡើងខ្លាំងកាលពីឆ្នាំទៅមិញ រហូតមានមន្ត្រីមួយចំនួនលួចបញ្ជូនសំណុំរឿងពុករលួយនេះ ទៅកាន់អង្គភាពប្រឆាំងអំពើពុក
រលួយទៀតផង។ អំឡុងពេលនេះ ថ្នាក់លើបានបញ្ជាឲ្យលោក វ៉ាន់ ណែវ ផ្អាកការសាងសង់ភូមិគ្រឹះ ជាបណ្ដោះអាសន្នដើម្បីធ្វើការស្រាវជ្រាវ។ ប៉ុន្តែពេលនោះទាំងក្រសួងមហាផ្ទៃ ទាំងរដ្ឋបាលខេត្ត ហាក់មិនបានអើពើលើសំណុំរឿងនេះទេ។
ក្រោយពីអង្គភាព អេ ស៊ី យូ បានកោះហៅសាមីខ្លួនទៅបំភ្លឺ ស្រាប់តែក្រោយមក ក៏បាត់ស្ងាត់ឈឹងដូចចោរលួចសេះរហូតដល់សព្វថ្ងៃនេះ ហើយសំណង់ភូមិគ្រឹះរបស់កូនប្រសារលោក វ៉ាន់ ណែវ ក៏ចាប់ផ្ដើមដំណើរការសាងសង់រហូតចប់រួចរាល់។ ប៉ុន្តែយ៉ាងណា ស្របពេលដែលភូមិគ្រឹះដ៏ធំអស្ចារ្យកូនប្រសារ លោកមេឃុំកន្ទឺ១ សាងសង់រួចរាល់ និងជិតដល់ថ្ងៃខែសម្ភោធឡើងស្នាក់នៅទៅហើយ ស្រាប់តែលេចចេញនូវលិខិតអន្តរាគមន៏ពីក្រសួងមហាផ្ទៃ បញ្ជូនមកឲ្យលោកអភិបាលខេត្ត ចុះពិនិត្យនិងធ្វើដោះស្រាយឡើងវិញ ។
គេរង់ចាំមើលថា បើក្រសួងមហាផ្ទៃបញ្ជាឲ្យអាជ្ញាធរខេត្ត ចុះដោះស្រាយឡើងវិញ លើសំណុំរឿងដីគម្រោងសាងសង់ផ្សារសហគមន៍ខាងលើនេះមែន តើលោកអភិបាលខេត្ត ត្រូវដោះស្រាយបែបណា បើភូមិគ្រឹះដ៏ធំមហិមា ដែលហ៊ុមព័ទ្ធទៅដោយរបងថ្ម សាងសង់រួចទៅហើយ ? ប៉ុន្តែបើតាមប្រភពព័ត៏មាន អាជ្ញាធរខេត្ត ហាក់ទាល់តម្រិះក្នុងការដោះស្រាយ ហេតុនេះហើយ ទើបរដ្ឋបាលខេត្ត សម្រេចបញ្ជូនលិខិតក្រសួងមហាផ្ទៃ និង ចេញដីកាអមមួយច្បាប់ប្រគល់សិទ្ធិឲ្យអភិបាលស្រុកបាណន់ ជាអ្នកដោះស្រាយជំនួសវិញ៕
ចែករំលែកព័តមាននេះ