ឃើញចតយូរ ក៏ចូលសួរនាំក្រែងជួយបាន បែរជាបែកធ្លាយរឿងលក់រថយន្តក្នុងវត្ត
- បន្ទាយមានជ័យ
ជនសង្ស័យម្នាក់ ត្រូវបាននគរបាលឃាត់ខ្លួន បន្ទាប់ពីធ្វើសកកម្មភាពលួចរថយន្តរបស់វត្តយកទៅលក់ ហើយក៏ជួប
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ ត្រូវបាននគរបាលឃាត់ខ្លួន បន្ទាប់ពីធ្វើសកកម្មភាពលួចរថយន្តរបស់វត្តយកទៅលក់ ហើយក៏ជួបកម្លាំងនគរបាលការពារព្រំដែនគោកលេខ៨០៧ ដើរល្បាតនៅពេលយប់ ដោយមានការសង្ស័យសមត្ថកិច្ចក៏ធ្វើការឃាត់ខ្លួនយកទៅសួរនាំតែម្តង។ ការឃាត់ខ្លួននេះ ធ្វើឡើងនៅវេលាម៉ោង០៧និង៣០នាទីយប់ ថ្ងៃទី១៩ ខែកក្កដា ឆ្នាំ២០២២ នៅចំណុចអង់តែន097 ផ្លូវទៅដើមក្រឡាញ់ ស្ថិតក្នុងភូមិសាស្ត្រ ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ឯក ឡុង សំណាង មេបញ្ជាការនគរបាលវរសេនាតូចការពារព្រំដែនគោកលេខ៨០៧ បានឲ្យដឹងថា ជនសង្ស័យដែលឃាត់ខ្លួនរូបនេះមានឈ្មោះ ផាត វ៉ានី អាយុ៣៤ឆ្នាំ ជនជាតិខ្មែរ មុខរបរកម្មករ បច្ចុប្បន្នស្នាក់នៅភូមិរំសៃ ឃុំថាប់ស្តេត ស្រុកតាប្រាយ៉ា ខេត្តស្រះកែវ ប្រទេសថៃ។
លោកមេបញ្ជាការបានបញ្ជាក់ថា មុនពេលកើតហេតុ នៅវេលាម៉ោង០៧និង៣០នាទីយប់ ថ្ងៃទី១៩ ខែកក្កដា កម្លាំងប៉ុស្តិ៍អូរកំបុតចំនួន០៣នាក់ ដឹកនាំដោយលោកអនុសេនីយ៍ទោ ប៉ុក រតនា នាយរងប៉ុស្តិ៍ បានធ្វើការល្បាតតាមផ្លូវព្រំដែន ក្នុងភូមិសាស្ត្រដែលខ្លួនទទួលខុសត្រូវ ហើយក៏បានប្រទះឃើញរថយន្ត១គ្រឿង ម៉ាក Luxus RX300 ពណ៌ទឹកមាស ពាក់ផ្លាកលេខ ភ្នំពេញ 2AK3150 ឈប់ចតចោលនៅលើបណ្តោយផ្លូវលេខ៥៨ ត្រង់ចំណុចអង់តែន097 ផ្លូវទៅដើមក្រឡាញ់ ដោយមានរយៈពេលយូរ កម្លាំងសមត្ថកិច្ចក៏ចូលទៅសួរនាំម្ចាស់រថយន្ត ក្រែងលោមានអ្វីអាចឲ្យជួយបាន ។
លោកមេបញ្ជាការបញ្ជាក់បន្តថា ភ្លាមៗនោះ ម្ចាស់រថយន្តក៏បានឆ្លើយថា ចង់លក់ឡានតម្លៃ៣០០,០០០សែនបាត (៣សែនបាត) ដោយលឺដូច្នេះ កម្លាំងយើងមានការសង្ស័យក៏បាននាំខ្លួនបញ្ជូនមកទីបញ្ជាការដ្ឋានវរសេនាតូចការរពារព្រំដែនគោកលេខ៨០៧ ដើម្បីសាកសួរព័ត៌មានជុំវិញករណីចង់លក់រថយន្តទាំងយប់នេះតែម្តង។
លោកមេបញ្ជាការវរសេនាតូចការពារព្រំដែនគោកលេខ៨០៧ បានបញ្ជាក់ទៀតថា ក្រោយពីសួរនាំជនសង្ស័យ ក៏បានសារភាពថា ខ្លួនបានលួចយករថយន្តរបស់ព្រះសង្ឃនៅវត្តមួយក្នុងក្រុងប៉ោយប៉ែត រួចយកមកលក់។ ក្រោយពីទទួលបានចម្លើយសារភាព និងមានបទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលវរសេនាតូចក៏បានឃាត់ខ្លួនៃទាំងមនុស្ស និងរថយន្ត រួចប្រគល់ឲ្យកម្លាំងនគរបាលនៃអធិការដ្ឋាននគរបាលក្រុងប៉ោយប៉ែត ដើម្បីចាត់ការបន្តតាមនីតិវិធីច្បាប់តែម្តង៕
ចែករំលែកព័តមាននេះ