រលំបាក់ស៊ីទែនផ្ទុកស៊ីម៉ង់ត៌សម្រាប់លាយបេតុង អ្នកជិតខាងបារម្ភពីសុវត្ថិភាព
- មណ្ឌលគិរី
ខេត្តមណ្ឌលគិរី ៖ តាមប្រភពព័ត៌មានបឋមបានឱ្យដឹងថា មានករីណស៊ីទែនផ្ទុកស៊ីម៉ង់ត៌សម្រាប់
ខេត្តមណ្ឌលគិរី ៖ តាមប្រភពព័ត៌មានបឋមបានឱ្យដឹងថា មានករីណស៊ីទែនផ្ទុកស៊ីម៉ង់ត៌សម្រាប់លាយបេតុង បានបាក់រលំ បង្កការភ្ញាក់ផ្អើល និងធ្វើឲ្យអ្នកមានផ្ទះជិតខាងនោះ ព្រួយបារម្ភយ៉ាងខ្លាំងអំពីសុវត្ថិភាព ខណៈហេតុការណ៍គ្រោះថ្នាក់ខាងលើនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២០ កក្កដា ២០២២ នៅចំនុចជិតថ្នាលបណ្តុះកូនឈើសែនមនោរម្យ ស្ថិតក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
តាមប្រភពពីប្រជាពលរដ្ឋដែលឃើញហេតុការណ៍ផ្ទាល់បានឲ្យដឹងថា មុនពេលកើតហេតុ នាព្រឹកថ្ងៃទី២០ កក្កដា គេឃើញរថយន្តដឹកស៊ីម៉ង់ត៍រាប់សិបតោនបានឈប់ផ្ទេរស៊ីម៉ង់ត៍ចេញពីរថយន្តសណ្តោង បញ្ជូនទៅស៊ីទែនផ្ទុកដែលមានជើងទម្រកម្ពស់ប្រមាណ២០ម៉ែត្រ ចំនួនបី។
ប្រជាពលរដ្ឋបានបន្តថា នៅវេលាម៉ោងប្រមាណ១១និង៣០នាព្រឹកថ្ងៃដដែល ក៏មានភ្លៀងធ្លាក់មួយមេធំ លុះបានមួយស្រប៉ក់ ស្រាប់តែគេប្រទះឃើញថា ស៊ីទែនសម្រាប់ផ្ទុកស៊ីម៉ង់ត៍មួយក្នុងចំណោមបី បានបាក់ទ្រេតដល់ដីហុយទ្រលោម បង្កឲ្យមានការភ្ញាក់ផ្អើលតែម្តង។
ជុំវិញករណីខាងលើនេះ ថៅកែសំណង់ឈ្មោះ ឆៃ លី ដែលសង់គ្រឿងចក្រខ្នាតធំកណ្តាលក្រុងសែនមនោរម្យនេះ ត្រូវបានលោក លឹម សុភី ប្រធានមន្ទីររៀបចំដែនដី នគររូបនីយកម្ម សំណង់ និងសូរិយោដី ខេត្តមណ្ឌលគិរី ឱ្យដឹងយ៉ាងខ្លីថា «ចាំឲ្យជំនាញឆែកសិន»។
ដោយឡែកលោក តូច សុធារ៉ា ប្រធានមន្ទីរ ឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៏ខេត្តមណ្ឌលគិរី បានឲ្យដឹងថា «ទីតាំងដែលគេបានសង់សំណង់សម្រាប់លាយបេតុងនេះ គឺមិនមានច្បាប់ពីខាងមន្ទីររបស់លោកនោះទេ ហើយកន្លងមកនេះ មន្ទីរបានចេញលិខិតអញ្ជើញម្ចាស់អាជីវកម្មខាងលើនោះ ទៅសុំច្បាប់និងប្រឹក្សាបច្ចេកទេសពីមន្ទីរ ប៉ុន្តែម្ចាស់ទីតាំងគឺមិនសហការជាមួយមន្ត្រីជំនាញឡើយ»។
លោក តូច សុធារ៉ា បន្តថា នៅរសៀលម៉ោង២ ថ្ងៃទី២០ កក្កដា ២០២២ នេះមន្ទីរឧស្សាហកម្មនិងសហការជាមួយអាជ្ញាធរក្រុង សែនមនោរម្យ ចុះទៅពិនិត្យ ចាត់វិធានការទីតាំងនោះជាក់ស្តែង។
គិតត្រឹមម៉ោង២និង៣០នាទីរសៀលថ្ងៃទី២០ កក្កដា ២០២២ គេនៅមិនទាន់ដឹងថា តើមានមនុស្សណាម្នាក់រងរបួសឬស្លា.ប់ក្នុងហេតុការណ៍ខាងលើនេះទេ ដោយសារម្ចាស់ទីតាំងមិនសហការហើយបិទរបងជិត៕
ចែករំលែកព័តមាននេះ