អឺរ៉ុបបានដាក់ទណ្ឌកម្មសេដ្ឋកិច្ចលើប្រទេសរុស្ស៊ី រយៈពេល៦ខែបន្តទៀត បើទោះជាមានការគិតថា លោកប្រធានាធិបតីជាប់ឆ្នោត Donald Trump អាចនឹងផ្សះផ្សាទំនាក់ទំនងជាមួយប្រទេសនេះក្តី ។
ការសម្រេចចិត្តនេះ ត្រូវបានបញ្ជាក់ដោយប្រធានក្រុមប្រឹក្សាអឺរ៉ុប លោក Donald Tusk ដែលនិយាយថា សមាជិកក្នុងសហភាពអឺរ៉ុបបានជំរុញឲ្យមានការបន្តដាក់ទណ្ឌកម្មប្រមាណ១២ខែថែមទៀត ។ លោកនិយាយថា ៖ «មិត្តរួមការងាររបស់ពួកយើងមួយចំនួនចង់ឲ្យបន្តទណ្ឌកម្ម១២ខែទៀត ប៉ុន្តែវាច្បាស់ពីដំបូងហើយថា អ្វីដែលអាចធ្វើទៅបាននោះ គឺបន្តត្រឹម៦ខែប៉ុណ្ណោះ » ។
គួរបញ្ជាក់ថា ទាំងសហរដ្ឋអាមេរិក និងសហភាពអឺរ៉ុបបានដាក់ទណ្ឌកម្មសេដ្ឋកិច្ចលើរុស្ស៊ី បន្ទាប់ពីប្រទេសនេះដណ្តើមយក Crimea ពីប្រទេសអ៊ុយក្រែន ក្នុងឆ្នាំ២០១៤ ។
សហភាពអឺរ៉ុបបានហាមឃាត់ការធ្វើដំណើរ និងបង្អាក់គណនេយ្យរបស់មនុស្សប្រមាណ១៥០នាក់ក្នុងជម្លោះនេះ ។ លើសពីនេះ សហភាពអឺរ៉ុបក៏បានហាមឃាត់មួយចំនួនក្នុងផ្នែកធនាគារ ថាមពល និងការការពាររបស់រុស្ស៊ីផងដែរ ។
ប្រធានាធិបតីអ៊ុយក្រែន គឺ Petro Poroshenko បានអរគុណដល់អឺរ៉ុបសម្រាប់សកម្មភាពមួយនេះ ។
ជាមួយគ្នានឹងវិបត្តិអ៊ុយក្រែន យន្តហោះរបស់ប្រទេសម៉ាឡេស៊ី១គ្រឿង ក៏ត្រូវបានបាញ់ទម្លាក់ដោយមីស៊ីលរបស់រុស្ស៊ីផងដែរ ធ្វើឲ្យទំនាក់ទំនងរវាងរុស្ស៊ី និងលោកខាងលិចធ្លាក់ចុះខ្លាំងក្នុងរយៈកាលប៉ុន្មានទសវត្សរ៍មកនេះ ។
ប៉ុន្តែលោក Trump សន្យាថា នឹងផ្សះផ្សាទំនាក់ទំនងជាមួយប្រទេសនេះវិញ ហើយថែមទាំងបានសរសើរលោកប្រធានាធិបតី Vladimir Putin ជាសាធារណៈទៀតផង ។
ការល្អឡើងវិញនៃទំនាក់ទំនងជាមួយរុស្ស៊ី អាចនឹងតម្រូវឲ្យសហរដ្ឋអាមេរិកទទួលការដណ្តើមយក Crimea និងដកការដាក់ទណ្ឌកម្មចេញពីមន្ត្រីសំខាន់ៗរបស់រុស្ស៊ី ។
វាមានភាពងាយស្រួលថែមទៀត ខណៈ លោក Trump អាចដកទណ្ឌកម្មបានភ្លាម ដោយមិនចាំបាច់ពិភាក្សាជាមួយអឺរ៉ុប គឺគ្រាន់តែចុះហត្ថលេខាជាការស្រេច ។
លោក Tusk បន្តថា វាលឿននៅឡើយក្នុងការដឹងពីគោលនយោបាយនាពេលខាងមុខរបស់រដ្ឋាភិបាលថ្មី ។ លោកនិយាយថា ៖ «ពួកយើងទទួលបានសញ្ញាជាច្រើន ដោយត្រូវរង់ចាំការប្រកាសជាផ្លូវការរបស់លោកប្រធានាធិបតីថ្មីសិន » ៕
ចែករំលែកព័តមាននេះ