យុវជនទំនើងឈាមរាវចូលកា.ប់គូជម្លោះដល់ក្នុងថ្នាក់ ចាប់បាន5នាក់ រត់គេចរួច6នាក់
ខេត្ដកណ្ដាល ៖ កម្លាំងនគរបាលព្រហ្មទណ្ឌស្រុកអង្គស្នួល បានសហការជាមួយកម្លាំងនគរបាលប៉ុស្ដិ៍ម្កាក់ ឃាត់ខ្លួនក្រុមអ្នកលេងដាវសាម៉ូរ៉ៃ
ខេត្ដកណ្ដាល ៖ កម្លាំងនគរបាលព្រហ្មទណ្ឌស្រុកអង្គស្នួល បានសហការជាមួយកម្លាំងនគរបាលប៉ុស្ដិ៍ម្កាក់ ឃាត់ខ្លួនក្រុមអ្នកលេងដាវសាម៉ូរ៉ៃ និងកាំបិតផ្គាក់៥នាក់ដែលចិត្ដស្លុយចូលកាប់គូបដិបក្សដល់ក្នុងថ្នាក់រៀនតែម្ដង ។
មុនការលើកគ្នាចូលកាប់ដល់ក្នុងថ្នាក់រៀន ពួកគេបានដេញកាប់គូទំនាស់ ពេលកំពុងលេងបាល់បោះម្ដងមកហើយ តែមិនបានសម្រេច ព្រោះភាគីម្ខាងទៀតមានគ្នាច្រើនជាង ដែលបានរើសដុំថ្មដេញគប់តបតដៃវិញ ។ ដោយសារមិនអស់ចិត្តនោះទេ ក៏បានចូលទៅកាប់ដល់ក្នុងថ្នាក់រៀនបណ្ដាលឲ្យរងរបួសក្បាល បន្ទាប់មកបាននាំគ្នាជិះម៉ូតូរត់គេចខ្លួនបាត់ស្រមោល ។ ទោះបីជាបែបណា កម្លាំងនគរបាលបានធ្វើការស្រាវជ្រាវ និងចាប់ខ្លួនបានជាបន្តបន្ទាប់ ។ ហេតុការណ៍នោះបានកើតឡើងកាលពីវេលាម៉ោង១០និង៥០នាទីព្រឹក ថ្ងៃទី១៦ ធ្នូ នៅក្នុងវិទ្យាល័យត្រពាំងត្នោត ស្ថិតក្នុងភូមិត្រពាំងត្នោត ឃុំម្កាក់ ស្រុកអង្គស្នួល ។
ជនរងគ្រោះដែលត្រូវជនទាំងនោះកាប់ឲ្យរបួសមានគ្នា២នាក់ ក្នុងនោះម្នាក់ឈ្មោះ ខាន់ ឌីណា អាយុ១៩ឆ្នាំ ជាសិស្សថ្នាក់ទី១២(គ)មានទីលំនៅក្នុងភូមិបេង ឃុំម្កាក់ ស្រុកអង្គស្នួល របួសរយះក្បាលដេរចំនួន១២ថ្នេរ ។ ចំណែកម្នាក់ទៀតឈ្មោះ លី ហុកសេង អាយុ១៨ឆ្នាំ ជាសិស្សថ្នាក់ទី១២(គ) រស់នៅក្នុងភូមិវែង ឃុំម្កាក់ ស្រុកអង្គស្នួល របួសរយះក្បាលដេរ២ថ្នេរ ។
ដោយឡែកជនស្ទាវដៃដល់មានគ្នាចំនួន១១នាក់ និងត្រូវចាប់ខ្លួនបានចំនួន៥នាក់ ។
១-ឈ្មោះ កុង សម្បត្តិ ហៅប៊ិប អាយុ១៦ឆ្នាំ ជាសិស្ស មានទីលំនៅក្នុងភូមិកាន់ទ្រង់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ជាអ្នកបើកម៉ូតូ ។
២-ឈ្មោះ ចិន្តា ចាន់ថន ហៅថន អាយុ១៧ឆ្នាំ ជាសិស្សថ្នាក់ទី១១B វិទ្យាល័យបឹងប្រិយ មានទីលំនៅក្នុងភូមិទួល សង្កាត់ពន្សាំង ខណ្ឌព្រែកព្នៅ ជាអ្នកជិះពីក្រោយនិងកាន់កាំបិតផ្គាក់១ ។
៣-ឈ្មោះ រើន សំរិទ្ធី អាយុ១៦ឆ្នាំ ជាសិស្សថ្នាក់ទី១១B វិទ្យាល័យបឹងប្រិយ មានទីលំនៅក្នុងភូមិបឹងខ្ទំ សង្កាត់ពន្សាំង ខណ្ឌព្រែកព្នៅ ជាអ្នកបើកម៉ូតូ ។
៤-ឈ្មោះហាន សំអូន អាយុ១៦ឆ្នាំ ជាសិស្ស មានទីលំនៅក្នុងភូមិព្រៃស្នួល សង្កាត់ពន្សាំង ខណ្ឌព្រែកព្នៅ ជាអ្នកបើកម៉ូតូ ។
៥-ឈ្មោះ ភឿន សុគុណ ហៅតុលអាយុ១៨ឆ្នាំ ជាសិស្ស មានទីលំនៅក្នុងភូមិកោះរងៀង សង្កាត់ពន្សាំង ខណ្ឌព្រែកព្នៅ ជាអ្នកបើកម៉ូតូ ។
ដោយឡែកជនម្នាក់ក្នុងចំណោម៦នាក់ដែលរត់គេចខ្លួនត្រូវបានគេស្គាល់ឈ្មោះ រ៉ា ចាន់ឌី អាយុ២២ឆ្នាំ មុខរបរនៅផ្ទះ មានទីលំនៅក្នុងភូមិព្រៃស្វាយសង្កាត់ពន្សាំង ខណ្ឌព្រែកព្នៅ ។ ពួកគេបានជិះម៉ូតូចំនួន៤គ្រឿងធ្វើសកម្មភាព ប្រដាប់ដោយដាវ និងកាំបិតផ្គាក់ស្ទើរគ្រប់ដៃ ។ ខណៈនោះកម្លាំងនគរបាល បានដកហូតម៉ូតូ២គ្រឿង ៕
ចែករំលែកព័តមាននេះ