រាជធានី​ភ្នំពេញ ៖ តារា​សម្តែង និង​ជា​ពិធី​ការិនី VJ វីត វីត បាន​សម្រេច​ដើរ​ចេញពី​កម្ម​វី​ធី Saturday Night LIVE – Let’s Party របស់​ស្ថានីយទូរទស្សន៍ CTN ហើយ នៅ​ថ្ងៃ​ទី​១៦ ខែកក្កដា ឆ្នាំ​២០២២ ខាង​មុខ​នេះ ពោល​គឺ​នាង​នឹង​បញ្ចប់​ត្រឹមតែ​មួយ​ចុង​ក្រោយ​នៅ​ចុង​ស​ប្តា​ហ៍​នេះ​ប៉ុណ្ណោះ​។

យ៉ាងណា តារា​រូប​នេះ​ក៏​បាន​បង្ហាញ​ហេតុផល​ដ៏​សំខាន់​មួយ​ដែល​នាង​ត្រូវ​បង្ខំចិត្ត​ចាក​ចេញពី​កម្មវិធី​នេះ ទាំង​ពាក់កណ្តាល​ទីនោះ​គឺ​ការ​មើលថែ​ម្តាយ​ឈឺ ខណៈ​ពេល​ដែល​នាង​ក៏​បាន​សម្តែង​ការ​សោកស្តាយ​​ផង​ដែរ ព្រោះ​នាង​បាន​បាត់បង់​ឱកាស​ដែល​នាង​ធ្លាប់​បាន​ជួប​នៅ​ក្នុង​អាជីព​ជាង​១០​ឆ្នា​មកនេះ​។

វីត វីត បាន​បញ្ជាក់​ពី​ដំណើរ​ដើមទង​ពី​មុន​ការ​ចាប់ផ្តើម រហូត​ក្លាយជា​ពិធី​ការិនី​នៅ​ក្នុង​កម្មវិធី​ខាង​លើ​នេះ តាម​រយៈ​បណ្តាញ​សង្គម​ថា កាលពី​ថ្ងៃ​ទី​១០ ខែមីនា ក្រោយ​ពី​បាន​ចំណាយពេល​ប្រឹងប្រែង​​ធ្វើការ​ជាង​មួយ​ឆ្នាំ​កន្លង​មក នេះ​ជា​ពេលវេលា​ដែល​ខ្ញុំ​ត្រូវ​នាំ​ម្តាយ​ជាទី​ស្រឡាញ់​របស់ខ្ញុំ​ទៅ​វិស្សមកាល​នៅ​សហរដ្ឋអាមេរិក​។ ពួក​យើង​បាន​សប្បាយ​ជាមួយ​រដូវរងា​ដ៏​ស្រស់​ស្អាត ជីវិត​របស់ខ្ញុំ​ពោរពេញ​ដោយ​ភាព​រីករាយ និង​សុភមង្គល ដែល​ខ្ញុំ​បាន​ចែករំលែក​ពេលវេលា​ដ៏​ពិសេស​នេះ ជាមួយ​ម្តាយ​របស់ខ្ញុំ ដោយ​មិន​មាន​ក្តី​បារម្ភ​ណាមួយ​ឡើយ ។

នាង​បន្ត​ថា រឿង​ល្អ​មិន​នៅ​ជាមួយ​យើង​បាន​យូរ​មែន នៅ​ថ្ងៃ​ទី​១៤ ខែមីនា គឺជា​ថ្ងៃ​ដ៏​សោកសៅ​នៅ​អំឡុង​ថ្ងៃ​ឈប់​សម្រាក​របស់​យើង​នៅ​អា​មេ​រិ​ក ម្តាយ​របស់ខ្ញុំ​បាន​គាំងបេះដូង​ភ្លាម​ៗ និង​មាន​អាកា​រៈ​ធ្ងន់ធ្ងរ​។ នាង​ថា ខ្ញុំ​នៅ​ស្រុក​ឆ្ងាយ គ្មាន​អ្នក​ជួយ ហើយ​មិនដឹង​ថា​ត្រូវ​ទៅ​កន្លែង​ណា និង​ធ្វើ​អ្វី​បន្ទាប់​​ទៀត​ទេ​។ មន្ទីរពេទ្យ វេជ្ជបណ្ឌិត ការ​ធ្វើតេស្ត អាហារ ឱសថ និង​ប្រាក់​ដែល​សំខាន់​បំផុត​សម្រាប់​ចំណាយ​លើ​រឿង​ទាំង​អស់នេះ បាន​ធ្លាក់​មក​លើ​រូប​ខ្ញុំ ជាមួយនឹង​បញ្ហា​ប្រឈម​ចំពោះ​មុខជា​ច្រើន​ទៀត​។ ខ្ញុំ​នៅ​ម្នាក់ឯង ធ្វើ​វា​ដោយ​ខ្លួនឯង​នៅ​ឯ​បរទេស ហើយ​ធ្វើការ​មើលថែ​ម្ដាយ​ខ្ញុំ​ក្នុង​ពេល​លំបាក​ទាំង​អស់នេះ​។ ពេល​នោះ ខ្ញុំ​មាន​តែ​ភាព​អស់សង្ឃឹម ភាព​ឯកោ និង​ភាព​ស្ងៀមស្ងាត់​តែ​ប៉ុណ្ណោះ​ដែល​ជា​ដៃគូរ​ខ្ញុំ​។

នាង​បញ្ជាក់​ថា នៅ​ក្នុងអំឡុងពេល​មានរឿង​ទាំងនេះ ខ្ញុំ​បាន​ទទួល​ទូរស័ព្ទ​ពី​នាយក​ប្រតិបត្តិ​របស់ CBS ដោយ​គាត់​សួរនាំ​ខ្ញុំ​អំពី​ការ​ចូលរួម​ធ្វើ​ជា VJ នៃ​កម្មវិធី​ថ្មី Saturday Night LIVE – Let’s Party ដែល​គ្រោង​នឹង​ចាប់ផ្តើម​ក្នុង​ពេល​ដ៏​ខ្លី​ខាង​មុខ​។ ខ្ញុំ​មាន​សេចក្តី​រំភើប​ណាស់ ក្នុង​ការ​ដែល​បាន​ធ្វើ​ជា VJ នៃ​កម្មវិធី​នេះ ប៉ុន្តែ​ខ្ញុំ​ក៏​បាន​ពន្យល់​ពី​ស្ថានភាព​របស់ខ្ញុំ​ទៅ​កាន់​លោកនាយក​ប្រតិបត្តិ និង​បង្ហាញ​ពី​ភាព​មិន​អាច​ធ្វើ​ទៅ​រួច​របស់ខ្ញុំ​ក្នុង​ការ​ចូលរួម ដែល​វា​មើលទៅ​ដូច​ជា​ឱកាសល្អ​តែ​មួយ​គត់​ក្នុង​ឆាកជីវិត​របស់ខ្ញុំ​ត្រូវ​បាន​បាត់បង់​។

នាង​បញ្ជាក់​បន្ត​ថា គាត់​មានការ​យោគយល់ និង​គាំទ្រ​យ៉ាង​ខ្លាំង ប៉ុន្តែ​ប្រាកដ​ណាស់​ថា កម្មវិធី​នេះ នឹង​មិន​ចាប់ផ្តើម​ដោយ​គ្មាន​ខ្ញុំ​ទេ ហើយ​នេះ​បាន​ផ្តល់​ឱ្យ​ខ្ញុំ​នូវ​ជំនឿ​លើ​ខ្លួនឯង​យ៉ាងច្រើន​។ ប៉ុន្មាន​ស​ប្តា​ហ៍​ក្រោយមក សុខភាព​របស់​ម្តាយ​ខ្ញុំ​ក៏​បាន​ប្រសើរ​ឡើង​វិញ ធ្វើ​ឱ្យ​ខ្ញុំ​អាច​នាំ​គាត់​ត្រឡប់​មក​ប្រទេស​យើង​វិញ ហើយ​ខ្ញុំ​បាន​ធ្វើ​ដំណើរ​ដ៏​វែង​ឆ្ងាយ​ត្រឡប់​ទៅ​ផ្ទះ និង​ទៅ​កន្លែង​ដែល​ខ្ញុំ​ចូល​ចិត្ត ពោល​គឺ CBS ដែល​ខ្ញុំ​ត្រូវ​បាន​ស្វាគមន៍​ដោយ​បើកចំហរ​ឱ្យ​ក្លាយជា VJ Vit Vit នៃ​កម្មវិធី Saturday Night LIVE – Let’s Party ។

បើ​តាម វីត វីត បញ្ជាក់​ទៀត​ថា កម្មវិធី Saturday Night LIVE – Let’s Party បាន​ផ្តល់​ឱ្យ​ខ្ញុំ​នូវ​ក្តី​ស្រលាញ់ និង​គាំទ្រ​យ៉ាង​ខ្លាំង​ពី​សំណាក់​ទស្សនិកជន​នៅ​ទូ​ទាំង​ប្រទេស ដែល​ជា​រឿង​មួយ​ដែល​ខ្ញុំ​ស្ទើរ​តែ​មិន​ជឿ​ថា​អាច​ទៅ​រួច​។ ការ​ផ្តល់​ការ​យកចិត្តទុកដាក់​របស់ CBS ក្នុង​ការ​បណ្តុះបណ្តាល​ដល់​ខ្ញុំ និង​ការ​ដែល​ធ្វើ​ឱ្យ​ខ្ញុំ​មាន​អារម្មណ៍​ថា ខ្លួនឯង​ពិសេស គឺជា​អ្វី​ដែល​ខ្ញុំ​មិន​ធ្លាប់​មាននៅ​ក្នុង​អាជីព​របស់ខ្ញុំ ក្នុង​រយៈពេល​ជាង​១៥​ឆ្នាំ​មកនេះ ហើយ​ខ្ញុំ​ដឹងគុណ​យ៉ាង​ខ្លាំង​ចំពោះ CBS ទាំង​ការ​គាំទ្រ​ផ្នែក​ស្មារតី និង​ហិរញ្ញវត្ថុ នៅ​ក្នុង​ពេល​ដែល​ខ្ញុំ​ត្រូវការ​បំផុត ។ តែ​គួរ​ឱ្យ​សោកស្ដាយ សុខភាព​ម្ដាយ​របស់ខ្ញុំ​មិន​ទាន់​បាន​ប្រសើរ​ឡើង​តាម​អ្វី​ដែល​ពួក​យើង​បាន​រំពឹង​ទុក​នោះ​ទេ ដូច្នេះ​ហើយ​ខ្ញុំ​ត្រូវ​នៅ​ជាមួយ​គាត់​នៅផ្ទះ ក្នុង​នាម​ជា​អ្នក​ថែទាំ​បឋម​របស់​គាត់ ដែល​ធ្វើ​អោយ​ខ្ញុំ​មិន​អាច​បន្ត​ជា​ផ្នែក​មួយ​នៃ​កម្មវិធី Saturday Night LIVE – Let’s Party បាន​ទៀត​ទេ​។

វីត វីត បន្ថែម​ថា ដំណើរ​របស់ខ្ញុំ​ជាមួយនឹង​កម្មវិធី​ដ៏​អស្ចារ្យ​នេះ បាន​ផ្តល់​ឱ្យ​ខ្ញុំ​យ៉ាងច្រើន នឹង​ត្រូវ​បញ្ចប់​នៅ​ថ្ងៃ​ទី​១៦ ខែកក្កដា​។ អរគុណ​ទស្សនិកជន​ទាំងអស់​នៅ​ទូ​ទាំង​ប្រទេស​សម្រាប់​ការ​ស្រលាញ់ និង​គាំទ្រ អរគុណ CBS ចំពោះ​ការ​យកចិត្តទុកដាក់​ចំពោះ​សុខុមាលភាព​របស់​ស្ត្រី​យើង ហើយ​បេះដូង​ខ្ញុំ​នៅ​ជាមួយ​អ្នក ៕