លួចបានសម្រេច តែគេចមិនផុតពីបងប្អូនទាំង៣នាក់ស្រែកផ្អើលផ្លូវជាតិលេខ៥
ជនសង្ស័យឆក់ម្នាក់ត្រូវបានម្ចាស់ទូរស័ព្ទជិះម៉ូតូដេញតាមកៀរផ្តួល និងឃាត់ខ្លួនកាលពី
ជនសង្ស័យឆក់ម្នាក់ត្រូវបានម្ចាស់ទូរស័ព្ទជិះម៉ូតូដេញតាមកៀរផ្តួល និងឃាត់ខ្លួនកាលពី
រាជធានីភ្នំពេញ ៖ ជនសង្ស័យឆក់ម្នាក់ត្រូវបានម្ចាស់ទូរស័ព្ទជិះម៉ូតូដេញតាមកៀរផ្តួល និងឃាត់ខ្លួនកាលពីវេលាម៉ោងប្រមាណ១២ថ្ងៃត្រង់ ថ្ងៃទី១២ ខែកក្កដា ឆ្នាំ២០២២ បន្ទាប់ពីជិះម៉ូតូមួយគ្រឿងធ្វើសកម្មភាពឆក់យកទូរស័ព្ទមួយគ្រឿងនៅតាមបណ្តោយផ្លូវជាតិលេខ៥ ស្ថិតក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ជនសង្ស័យរូបនោះមានឈ្មោះ ម៉ាល ម៉ានុត ភេទប្រុស អាយុ២២ឆ្នាំ មានទីលំនៅភូមិខ១ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ ។ ចំណែកជនរងគ្រោះឈ្មោះ ឈុន ច័ន្ទតារារិទ្ធ ភេទប្រុស អាយុ១៧ឆ្នាំ មុខរបរសិស្ស មានទីលំនៅផ្លូវជាតិលេខ៥ ស្ថិតក្នុងភូមិខ២ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។ ហើយនៅក្នុងសកម្មភាពនេះ បានបណ្តាលអោយជនរងគ្រោះ និងប្អូនប្រុស២នាក់ទៀត បានរងរបួសរលាត់ដៃជើងផងដែរ។
បើតាមនគរបាលប៉ុស្តិ៍ បានអោយដឹងថា នៅមុនពេលកើតហេតុ ជនរងគ្រោះបានជិះម៉ូតូមួយគ្រឿងមានគ្នា៣នាក់បងប្អូន ចេញពីផ្ទះទៅសាលារៀន លុះពេលមកដល់ចំណុចកើតហេតុ ស្រាប់តែជនសង្ស័យម្នាក់ជិះម៉ូតូមួយគ្រឿងម៉ាក Honda Wave មកពីក្រោយ រួចធ្វើសកម្មភាពឆក់យកទូរស័ព្ទដៃរបស់ជនរងគ្រោះបានសម្រេច បន្ទាប់មកជិះរត់គេចខ្លួនតែម្តង។
តាមនគរបាលបានអោយដឹងទៀតថា នៅក្នុងសកម្មភាពនោះ ជនរងគ្រោះក៏បានស្រែកចោរៗហើយក៏ជិះម៉ូតូដេញតាម រហូតមកដល់មុខភូមិសាមគ្គី ផ្លូវជាតិលេខ៥ ជនរងគ្រោះក៏បានជិះម៉ូតូកៀរម៉ូតូរបស់ជនសង្ស័យឱ្យដួល ហើយក៏ត្រូវបានកម្លាំងនគរបាលមូលដ្ឋានជួយអន្តរាគមន៍ ឃាត់ខ្លួន ដោយឡែកខណៈពេលនោះ ជនរងគ្រោះក៏បានដួលម៉ូតូដែរ បណ្តាលអោយបងប្អូនទាំង៣នាក់បានរងរបួស ។
បន្ទាប់ពីឃាត់ខ្លួនជនសង្ស័យបានហើយ នគរបាលក៏បានធ្វើការដកហូតម៉ូតូមួយគ្រឿង ម៉ាក Honda Wave ពណ៌ខ្មៅ ពាក់ស្លាកលេខ ភ្នំពេញ 1AR-9666 និងទូរស័ព្ទម៉ាក One plus ពណ៌ខ្មៅ ជារបស់ជនរងគ្រោះ ដើម្បីប្រគល់អោយម្ចាស់វិញ៕
ចែករំលែកព័តមាននេះ