តាកែវ៖ ក្មេងស្ទាវមួយក្រុម ជាមុខសញ្ញាកាប់ប្លន់លួចម៉ូតូ និងឆក់យ៉ាងកក្រើកនៅក្នុងភូមិសាស្ត្រខេត្តតាកែវ ត្រូវបានកំលាំងកងរាជអាវុធហត្ថ ឃាត់ខ្លួនបានចំនួន ៦នាក់ និងម៉ូតូ ៣គ្រឿង។ ក្នុងក្មេងស្ទាវទាំងនេះ ស្ថិតក្នុងចំណោមបក្សពួក ១១នាក់ ដែលបានរួមដៃគ្នា ធ្វើសកម្មភាពបទល្មើស។
កាលពីព្រឹកថ្ងៃទី៨ ខែកក្កដា ឆ្នាំ២០២២ នេះ កងកំលាំងរាជអាវុធហត្ថខេត្តតាកែវ បានបង្ហាញមុខសញ្ញា ជាជនសង្ស័យកាប់ប្លន់ម៉ូតូ និងឆក់យ៉ាងកក្រើក នៅក្នុងខេត្តតាកែវ រយៈពេល ៣ខែកន្លងមកនេះ ចំនួន ៦នាក់ ក្នុងចំណោមបក្សពួក ១១នាក់។ ជនសង្ស័យទាំងនោះ អាយុចាប់ពី ១៧ឆ្នាំ ដល់ ១៨ឆ្នាំ។ កន្លងមក ក្រុមនេះ បានប្រព្រឹត្តបទល្មើសយ៉ាងកក្រើក ដោយកាប់ ធាក់ប្លន់យកម៉ូតូ និងឆក់កាបូបដ៏កក្រើក នៅក្នុងទឹកដីខេត្តតាកែវ។
លោកវរៈសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ បានប្រាប់កោះសន្តិភាពថា ជនសង្ស័យទាំង ៦នាក់នេះ គឺជាមុខសញ្ញា បង្កើតបទល្មើសជាច្រើនករណី ក្នុងនោះ មានកាប់ប្លន់ ធាក់ផ្តួលប្លន់យកម៉ូតូ និងធ្វើសកម្មភាពឆក់កាបូបយ៉ាងកក្រើកនៅក្នុងទឹកដីនៃខេត្តតាកែវ រយៈពេលជាង ៣ខែមកនេះ។
លោកមេបញ្ជាការរងកងរាជអាវុធហត្ថខេត្តតាកែវ បន្តថា ការឈានទៅដល់ការឃាត់ខ្លួនជនសង្ស័យនេះបាន គឺដំបូងកំលាំងយើង បានចុះទៅបង្ក្រាបករណីគ្រឿងញៀនទេ តែនៅពេលឃាត់ខ្លួនជនសង្ស័យ ក៏ឆែកឆេរកឃើញស្លាកលេខម៉ូតូថ្មីមួយ ទើបកំលាំងជំនាញ ធ្វើការស្រាវជ្រាវ និងសាកសួរជនសង្ស័យ ថាជាស្លាកលេខម៉ូតូ កែប 1B-4438 នោះជាស្លាកលេខម៉ូតូរបស់អ្នកណាគេ? ក្រោយពេលសួរនាំ និងអង្កេតយ៉ាងលម្អិត ទើបជនសង្ស័យ ព្រមសារភាព ថា ជាស្លាកលេខម៉ូតូរបស់ជនរងគ្រោះ ដែលបានមកពីការធ្វើសកម្មភាពធាក់ប្លន់យកម៉ូតូ នៅផ្លូវបំបែក ពេជ្រសារ ស្រុកគីរីវង់ ខេត្តតាកែវ កាលពីយប់ថ្ងៃទី២ ខែកក្កដា ឆ្នាំ២០២២ និងមានករណីកាប់ប្លន់ម៉ូតូជាច្រើនករណីទៀត នៅក្នុងភូមិសាស្ត្រខេត្តតាកែវ ដែលក្រុមជនសង្ស័យបានធ្វើសកម្មភាពបានសម្រេចកន្លងមក។
លោកវរសេនីយ៍ឯក ង៉ែត ចាន់ធី បានបន្តទៀតថា ចំពោះជនសង្ស័យទាំង ៦នាក់ ដែលបង្រ្កាបបាន នៅពេលនេះ រួមមាន៖ ទី០១ ឈ្មោះ វឿន រក្សា ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិខ្សឹង សង្កាត់រកាក្នុង ក្រុងដូនកែវ។ ទី០២ ឈ្មោះ ចែម លីហេង ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិបាក់កូដ ឃុំលាយបូរណ៍ ស្រុកត្រាំកក់។ ទី០៣ ឈ្មោះ ម៉ែន វីរៈ ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិតុំ សង្កាត់រកាក្រៅ ក្រុងដូនកែវ។ ទី០៤ មានឈ្មោះ តូច រតនា ភេទប្រុស អាយុ ១៨ ឆ្នាំ មុខរបរមិនពិតប្រាកដ រស់នៅភូមិបិនម៉ៅ សង្កាត់រកាក្រៅ ក្រុងដូនកែវ។ ទី០៥ មានឈ្មោះ មឿន ជីវ័ន្ត ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិសូរច័ន្ទ សង្កាត់រកាក្រៅ ក្រុងដូនកែវ និងទី ០៦ មានឈ្មោះ អ៊ុង សំនាង ភេទប្រុស អាយុ ១៨ឆ្នាំ មុខរបរមិនពិតប្រាកដ រស់នៅភូមិប៊ិនម៉ៅ សង្កាត់រកាក្រៅ ក្រុងដូនកែវ ។
ជនសង្ស័យទាំង ០៦នាក់ខាងលើ ត្រូវបានកំលាំងជំនាញ បានកសាងសំណុំរឿង បញ្ជូនទៅសាលាដំបូងខេត្តតាកែវ នៅព្រឹកថ្ងៃទី៨ ខែកក្កដានេះ។ ដោយឡែក ចំពោះជនសង្ស័យ ដែលជាបក្សពួកចំនួន ៥នាក់ កំពុងរត់គេចខ្លួននោះ សមត្ថកិច្ច នឹងធ្វើការស្រាវជ្រាវឃាត់ខ្លួនជាបន្តទៀត។
ប្រជាពលរដ្ឋ រស់នៅខេត្តតាកែវ ក្រៅពីសាទរនឹងប៉េអឹម ដែលបានចាប់ក្រុមចោរឆក់ប្លន់ នៅតាមផ្លូវសាធារណៈនេះ ប្រជាពលរដ្ឋ ក៏ស្នើដល់កងកម្លាំងសមត្ថកិច្ច បង្ក្រាបលើក្រុមអ្នកទទួលទិញម៉ូតូពីចោរទាំងនោះ។ បើមិនមានអ្នកទិញរបស់ចោរ ក៏ចោរ មិនដឹងឆក់ប្លន់ យកទៅលក់នៅឯណាដែរ។ ដូច្នេះអាជ្ញាធរសមត្ថកិច្ច ត្រូវតែស្រាវចាប់យកឱ្យអស់ ទាំងចោរ និងទាំងអ្នកទទួលទិញរបស់ចោរ៕ សេង សុធា
ចែករំលែកព័តមាននេះ