ភ័យស្ទើរលស់ព្រលឹង ! ដោយសាររថយន្តក្រុង វីរៈ ប៊ុនថាំ
ខេត្តសៀមរាប ៖ បន្ទាប់ពីទម្លាក់ភ្ញៀវទាំងយប់រួច រថយន្តក្រុងរបស់ក្រុមហ៊ុន វីរៈ ប៊ុនថាំ ១គ្រឿងបានបើកយ៉ាងលឿនសំដៅទៅឃ្លាំងវិញ ស្រាប់តែវាក់អើជាមួយមនុស្សដើរ …
ខេត្តសៀមរាប ៖ បន្ទាប់ពីទម្លាក់ភ្ញៀវទាំងយប់រួច រថយន្តក្រុងរបស់ក្រុមហ៊ុន វីរៈ ប៊ុនថាំ ១គ្រឿងបានបើកយ៉ាងលឿនសំដៅទៅឃ្លាំងវិញ ស្រាប់តែវាក់អើជាមួយមនុស្សដើរ ក៏បួងចង្កូតជ្រុលទៅបុកបង្កាន់ដៃស្ពានថ្មវត្តដំណាក់ខាងលិចបាក់អស់កំណាត់ខាងមុខ ចំណែកអ្នកធ្វើដំណើរនោះភ័យឡើងស្ទើរលស់ព្រលឹង ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៥ព្រលឹម ថ្ងៃទី៦ ខែធ្នូ ឆ្នាំ២០១៦ នៅចំណុចចុងស្ពានវត្តដំណាក់ ខាងត្បូងផ្សារចាស់ ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ។
ប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនដំបូងឃើញរថយន្តដឹកភ្ញៀវរបស់ក្រុមហ៊ុនវិរៈប៊ុនថាំ បើកពីលិចទៅកើតរួចបត់ទៅត្បូងយ៉ាងលឿន លុះដល់ចំណុចកើតហេតុស្រាប់តែវាក់អើជាមួយមនុស្សដើរក៏បួងចង្កូតជ្រុលទៅបុកបង្គោលបង្កាន់ថ្មស្ពានវត្តដំណាក់តែម្តង ។
ប្រភពពីនគរបាលចរាចរណ៍បានឲ្យដឹងថា បន្ទាប់ពីកើតហេតុភ្លាមៗ កម្លាំងជំនាញក៏បានទៅអូសរថយន្តរបស់ក្រុមហ៊ុន វិរៈ ប៊ុនថាំ យកទៅរក្សាទុកនៅគោលដៅមុខស្ពានព្រះអង្គចេកព្រះអង្គចម ដើម្បីឱ្យតំណាងក្រុមហ៊ុនចូលមកដោះស្រាយ ត្រូវជួសជុលស្ពាននោះឱ្យរដ្ឋវិញ ឬប្រគល់ឱ្យទៅខាងគមនាគមន៍ដើម្បីជួសជុល ។
ប្រភពបន្តថា អ្នកបើករថយន្តក្រុងនោះឈ្មោះ សុភា ធារ៉ា ភេទប្រុស អាយុ២៦ឆ្នាំ មុខរបរ អ្នកបើកបរ មានទីលំនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ចំណែកព្រូឡានឈ្មោះ ឌុង ប៊ុនឌិន ភេទប្រុស អាយុ១៨ឆ្នាំ រស់នៅខេត្តបាត់ដំបង បច្ចុប្បន្នស្នាក់នៅក្នុងក្រុមហ៊ុន រីឯរថយន្តដែលបុកបង្កាន់ដៃស្ពាននោះ ម៉ាកហ៊ីយ៉ាន់ដាយ ពណ៌សលាយលឿង ពាក់ស្លាកលេខ ភ្នំពេញ 3C-8854 ។
ក្រោយពេលកើហេតុ អ្នកបើកប និងព្រូឡាន ព្រមទាំងរថយន្តរបស់ក្រុមហ៊ុន វិរៈ ប៊ុនថាំ ប្រសិនបើតំណាងក្រុមហ៊ុនមិនមកដោះស្រាយតែនោះនឹងត្រូវបញ្ជូនទៅស្នងការដ្ឋាននគរបាលខេត្តដើម្បីស្រាយតាមនិតិវិធី ៕
ចែករំលែកព័តមាននេះ