ខេត្តប៉ៃលិន៖ ក្រោយទទួលបានការរាយការណ៍ពីលោកមេភូមិ និងប្រជាការពារភូមិទឹកផុសថា មានមុខសញ្ញាជួញដូរគ្រឿងញៀនដ៏សកម្ម ទើបសមត្ថកិច្ច បានឆ្មក់ចូលឃាត់ខ្លួនជនសង្ស័យម្នាក់ ដល់ក្នុងផ្ទះ។ ហេតុការណ៍ឃាត់ខ្លួននេះ បានកើតឡើង កាលពីវេលាម៉ោង ១១ព្រឹក ថ្ងៃទី២០ ខែមិថុនា ឆ្នាំ២០២២ នៅក្នុងដីចំការចន្ទីមួយកន្លែង ស្ថិតក្នុងភូមិទឹកផុស សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ប្រភពព័ត៌មានបានឱ្យដឹងថា កម្លាំងផែនប្រឆាំងគ្រឿងញៀន នៃអធិការដ្ឋាននគរបាលក្រុងប៉ៃលិន សហការជាមួយកម្លាំងប៉ុស្តិ៍រដ្ឋបាលសង្កាត់ប៉ៃលិន បានទៅដល់ទីតាំងខាងលើ ស្រាប់តែជនសង្ស័យ ព្យាយាមរត់គេចខ្លួន។ តែត្រូវសមត្ថកិច្ចចាប់ឃាត់បាន។ ជននោះ មានឈ្មោះ វង់ សុវណ្ណ ភេទប្រុស អាយុ ៣០ឆ្នាំ មុខរបរមិនពិតប្រាកដ ជនជាតិខ្មែរ សញ្ជាតិខ្មែរ រស់នៅភូមិភូមិទឹកផុស សង្កាត់ប៉ៃលិន ក្រុងប៉ៃលិន ខេត្តប៉ៃលិន មានផ្ទុយសារធាតុញៀន។
ប្រភពព័ត៌មានបានឱ្យដឹងទៀតថា វត្ថុតាងដកហូត រួមមាន ថ្នាំញៀនប្រភេទម៉ាទឹកកកចំនួន ៥កញ្ចប់ ទម្ងន់ ៤,១៦ក្រាម សាច់ថ្នាំសុទ្ធ ម៉ូតូសេរីចាស់ចំនួន ០១គ្រឿង ទូរស័ព្ទចំនួន ០៤គ្រឿង ម៉ាក ViVo ពណ៌ទឹកមាសចំនួន ០១គ្រឿង ម៉ាក lnfinixពណ៌ទឹកសមុទ្រចំនួន ០១គ្រឿង និងម៉ាក Nokia អិនចុចពិលចំនួន ០២គ្រឿង។ កាំបិតផ្គាក់ចំនួន ០៣ដើម ដាវចំនួន ០១ដើម ពូថៅដៃចំនួន ០១ដើម។
ក្រោយឃាត់ខ្លួន ជនសង្ស័យខាងលើ រួមទាំងវត្ថុតាង ត្រូវបានរក្សាទុកនៅអធិការដ្ឋាននគរបាលក្រុងប៉ៃលិន ដើម្បីសាកសួរ និងអនុវត្តនីតិវិធីបន្ត៕ នីយ៉ា
ចែករំលែកព័តមាននេះ